"რუსეთის ტყვეობაში "აზოვსტალიდან“ 131 უკრაინელი ქალი ჯარისკაცი იმყოფება" - უკრაინის ვიცე-პრემიერი ირინა ვერეშჩუკი

მარიუპოლის ქარხანა "აზოვსტალიდან“ რუსეთის ტყვეობაში ამჟამად 130-ზე მეტი უკრაინელი ქალი ჯარისკაცი იმყოფება. ამის შესახებ ვიცე-პრემიერმა დროებით ოკუპირებული ტერიტორიების რეინტეგრაციის საკითხებში, ირინა ვერეშჩუკმა განაცხადა.

"აზოვსტალიდან გვყავს 131 ქალი, მათ შორის არიან აზოვის პოლკის მსახურნი, სამხედრო ექიმები, მესაზღვრეები, საზღვაო ქვეითთა 36-ე ბრიგადა, ეროვნული გვარდიელები, შეიარაღებული ძალები და სხვა ფორმირებები“, - დასძინა მან.

ვერეშჩუკმა ხაზგასმით აღნიშნა, რომ უკრაინა შეეცდება მათ გათავისუფლებას და სთხოვა მსოფლიო საზოგადოებას, ყურადღება მიაპყროს რუსეთის არასათანადო ქმედებებს სამხედრო ტყვეებთან მიმართებაში.

შეგახსენებთ, რომ 16-20 მაისს მარიუპოლის დამცველებმა "აზოვსტალი“ დატოვეს, რის შემდეგაც რუსეთის ტყვეობაში იმყოფებიან. რუსული მხარის ინფორმაციით, ქარხანა 2439-მა მებრძოლმა დატოვა. "წითელი ჯვრის“ წარმომადგენლებმა უკრაინელი დამცველები სამხედრო ტყვეებად დაარეგისტრირეს.