"შვილმა დედას მრავლობითი ჭრილობები მიაყენა, შვილის მეგობარმა კი ქალი შებოჭა და გაქცევის საშუალება არ მისცა" - რა ინფორმაციას ავრცელებს პროკურატურა გახმაურებული მკვლელობის საქმეზე

პროკურატურამ ბრალდება წარუდგინა 17 წლის ბიჭს, რომელმაც დედა დანით მოკლა. ბრალდება ასევე წარედგინა ახალგაზრდა ბიჭის მეგობარსაც, რომელიც მას დედის მკვლელობაში ეხმარებოდა.

"შინაგან საქმეთა სამინისტროს მიერ ჩატარებული გამოძიებით დადგინდა, რომ 14 აგვისტოს, თბილისში, ლილოს დასახლებაში, ჯგუფურად, შურისძიების მიზნით, გენდერის ნიშნით შეუწყნარებლობის მოტივით, შვილმა დედას დანით, განსაკუთრებული სისასტიკით, სხეულის სხვადასხვა არეში მრავლობითი ჭრილობები მიაყენა, ხოლო შვილის მეგობარმა დაზარალებული შებოჭა და მას გაქცევის საშუალება არ მისცა. მიღებული დაზიანებების შედეგად დაზარალებული ადგილზე გარდაიცვალა.

სამართალდამცველებმა ორივე ბრალდებული იმავე დღეს დააკავეს. გარდაცვლილის შვილს ნ.ხ.-ს ბრალდება საქართველოს სისხლის სამართლის კოდექსის 11 პრიმა 109-ე მუხლის „თ“, „ი“, „კ“ და „მ“ ქვეპუნქტებით (განზრახ მკვლელობა, ჩადენილი გენდერული ნიშნით, ჯგუფურად, ოჯახის წევრის მიმართ, განსაკუთრებული სისასტიკით), ხოლო რ.ნ.-ს საქართველოს სისხლის სამართლის კოდექსის 109-ე მუხლის „თ“, „ი“ და „მ“ ქვეპუნქტებით (განზრახ მკვლელობა, ჩადენილი გენდერული ნიშნით, ჯგუფურად, განსაკუთრებული სისასტიკით) წარედგინათ, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.

პროკურატურა ბრალდებულების მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს”,- აღნიშნულია ინფორმაციაში.

იხილეთ ასევე:

• "ჟანა ვერასოდეს წარმოიდგენდა, რომ შვილი და მისი მეგობარი მოკლავდნენ..." - 34 წლის ქალი საკუთარ სახლში სადისტურად მოკლეს: რას ჰყვება მეზობელი?