"ვაპირებდი დედაჩემის მოკვლას ფანჯრიდან გადმოგდების გზით" - რას ამბობს ჩვენებაში დედის მკვლელობაში ბრალდებული 17 წლის ბიჭი
პროკურატურამ 14 აგვისტოს თბილისში მომხდარი დანაშაულის შესახებ გაავრცელა ინფორმაცია. საგამოძიებო უწყების განცხადებით, 17 წლის შვილმა, 19 წლის მეგობრის დახმარებით, დედა მოკლა.
მკვლელობაში ბრალდებულები დაკავებულები არიან. "მთავარი არხი" ავრცელებს ინფორმაციას იმის შესახებ, თუ რა თქვა დედის მკვლელობაში ბრალდებულმა შვილმა ჩვენებაში:
"მე რამილ ნასიბოვს მოვუყევი და გავანდე ჩემი გადაწყვეტილების შესახებ, რაც მქონდა მიღებული. მე მას ვუთხარი, რომ ვაპირებდი დედაჩემის მოკვლას ფანჯრიდან გადმოგდების გზით. მე მას ვთხოვე, რომ წამოსულიყო და ასეთ სიტუაციაში მარტო არ დავეტოვებინე და იგი დამთანხმდა. სტუმრების წასვლის შემდეგ, ჟალამ დაიწყო სუფრის ალაგება და სამზარეულო ოთახში ნივთების გადატანა, სწორედ სამზარეულო ოთახში არის ის ფანჯარა, საიდანაც მე და რამილს დაგეგმილი გვქონდა ჟალას გადაგდება", - ამბობს ბრალდებული.
- ცნობისთვის, შინაგან საქმეთა სამინისტროს მიერ ჩატარებული გამოძიებით დადგინდა, რომ 14 აგვისტოს, თბილისში, ლილოს დასახლებაში, ჯგუფურად, შურისძიების მიზნით, გენდერის ნიშნით შეუწყნარებლობის მოტივით, შვილმა დედას დანით, განსაკუთრებული სისასტიკით, სხეულის სხვადასხვა არეში მრავლობითი ჭრილობები მიაყენა, ხოლო შვილის მეგობარმა დაზარალებული შებოჭა და მას გაქცევის საშუალება არ მისცა. მიღებული დაზიანებების შედეგად დაზარალებული ადგილზე გარდაიცვალა.
სამართალდამცველებმა ორივე ბრალდებული იმავე დღეს დააკავეს. გარდაცვლილის შვილს ნ.ხ.-ს ბრალდება საქართველოს სისხლის სამართლის კოდექსის 11 პრიმა 109-ე მუხლის „თ“, „ი“, „კ“ და „მ“ ქვეპუნქტებით (განზრახ მკვლელობა, ჩადენილი გენდერული ნიშნით, ჯგუფურად, ოჯახის წევრის მიმართ, განსაკუთრებული სისასტიკით), ხოლო რ.ნ.-ს საქართველოს სისხლის სამართლის კოდექსის 109-ე მუხლის „თ“, „ი“ და „მ“ ქვეპუნქტებით (განზრახ მკვლელობა, ჩადენილი გენდერული ნიშნით, ჯგუფურად, განსაკუთრებული სისასტიკით) წარედგინათ, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.
ნახეთ ასევე: