ხატია დეკანოიძის განცხადებით, "ნაციონალური მოძრაობა“ საპარლამენტო ბოიკოტის საკითხს არ განიხილავს
"ნაციონალური მოძრაობის“ წევრის, ხატია დეკანოიძის განცხადებით, მათი პარტია საპარლამენტო ბოიკოტის საკითხს არ განიხილავს. მისი თქმით, ფრაქციასა და პარტიაში ბოიკოტის შესახებ არანაირი გეგმა არ არის.
როგორც დეკანოიძე ამბობს, კომიტეტებსა და პლენარულ სხდომებში მონაწილეობას აპირებენ და თუ ხელისუფლებას 12 პუნქტის შესრულება აინტერესებს, ერთობლივად უნდა განიხილონ ინიციატივები, რომლებსაც ოპოზიცია წარადგენს.
"ჩვენ ყველა საჯარო სხდომებსა და საკომიტეტო მოსმენებს დავესწრებით. ასევე ვაპირებთ დავესწროთ 6 სექტემბერს პირველ პლენარულ სხდომას.
ვმუშაობთ საკანონმდებლო ინიციატივებზე. ეს ეხება საარჩევნო გარემოს გაუმჯობესებას და ასევე, ოპოზიციას სამოქალაქო სექტორთან ერთად სხვადასხვა მიმართულებით წარმოდგენილი აქვს მნიშვნელოვანი ინიციატივები. ამ ყველაფრის გარშემო ვაგრძელებთ მუშაობას.
ძალიან მნიშვნელოვანია რამდენიმე საკითხი - არჩევნები, სახალხო დამცველის წარდგენის წესის დამტკიცება, ანტიკორუფციული მიმართულებით საკანონმდებლო ჩარჩოს გაძლიერება და 12 პუნქტის შესრულება, რაც ჯერჯერობით მხოლოდ იმიტაციური პროცესია.
თუ ხელისუფლებას აინტერესებს ის, რომ 12 პუნქტი შესრულდეს, მაშინ კომიტეტებსა და სხდომებზე ერთობლივად უნდა იქნას განხილული ის ინიციატივები, რომლებსაც წარადგენს ოპოზიცია. მათ შორის ეს ეხება ფართო ინკლუზიურ პროცესს სამოქალაქო სექტორთან ერთად“,- განაცხადა ხატია დეკანოიძემ.