"ეფ-ეს-ბე“-ს თანამშრომლები უკრაინელებს ეძებენ, რათა მათ რუსეთში მომხდარი "ტერორისტული თავდასხმები“ დააბრალონ" - უკრაინის დაზვერვა
მოსკოვში, რუსეთის უშიშროების ფედერალური სამსახურის, "ეფ-ეს-ბე“-ს თანამშრომლები უკრაინაში მიმდინარე ომის მოწინააღმდეგე ადამიანებს, განსაკუთრებით უკრაინული წარმოშობის პირებს ეძებენ, რათა მათ რუსეთში განხორციელებული "ტერორისტული თავდასხმები“ დააბრალონ. ინფორმაციას უკრაინის თავდაცვის სამინისტროს მთავარი სადაზვერვო სამმართველო ავრცელებს.
- "მოსკოვში, სამოქალაქო ტანსაცმელში გამოწყობილი ადამიანთა ჯგუფები, რომლებიც საკუთარ თავს "ეფ-ეს-ბე“-ს ოფიცრებად წარადგენენ, კარდაკარ ჩხრეკას ატარებენ”, - აღნიშნავს უკრაინის თავდაცვის სამინისტროს მთავარი სადაზვერვო სამმართველო.
მათივე ცნობით, რუსეთის უსაფრთხოების სამსახურის წარმომადგენლები, მოსახლეობას ეკითხებიან, ახლოს თუ ცხოვრობენ ან ბინას თუ ქირაობენ უკრაინელები. ისინი ასევე უკრაინაში რუსეთის ე.წ. სპეცოპერაციის შესახებ მოქალაქეთა შეხედულებებით ინტერესდებიან. უკრაინის დაზვერვის თქმით, ამ მოქალაქეებს შესაძლოა დაბრალდეთ ტერორისტულ თავდასხმებში მონაწილეობა, რომლებიც რუსეთში სპეცსამსახურების მიერაა ორკესტრირებული.