"ბოლოს და ბოლოს თავისუფლების მიწაზე მოვხვდი" - ვითარება ლარსზე და ადამიანების ემოციები, რომლებმაც საქართველოში შემოსვლა შეძლეს
რუსეთში მობილიზაციის გამოცხადების შემდეგ, ათასობით ადამიანი ქვეყნის დატოვებას ცდილობს. რუსეთ საქართველოს საზღვარზე, ლარსის გამშვებ პუნქტთან რამდენიმე კილომეტრიანი რიგია.
რუსეთის ფედერალური საბაჟო სამსახურის ინფორმაციით, ზემო ლარსის გამშვებ პუნქტზე რიგში, საქართველოში შესვლას 2500 ავტომობილი ელოდა. ზოგიერთი ცნობით, რიგის სიგრძე 10 კილომეტრს შეადგენდა. მოგვიანებით, ზემო ლარსის პუნქტზე გამოჩნდა რუსების ჯავშანმანქანა, ახლახან კი ცნობილი გახდა, რომ იქ სამხედრო მობილიზაციის პუნქტის, კომისარიატის მოწყობას აპირებენ.
ekhokavkaza.com-ის ჟურნალისტი ანასტასია სლოვინსკაია, რომელიც პირადად ესაუბრა იმ ადამიანებს, რომლებმაც საზღვარი გადმოკვეთეს, ყვება, თუ რა ხდება საზღვრის მეორე, რუსეთის მხარეს.
"უპირველეს ყოვლისა, უნდა აღინიშნოს, რომ ამ მხრიდან ყველაფერი ისე არ გამოიყურება, როგორც რუსეთის მხრიდან - ხალხის ზღვა, მრავალკილომეტრიანი საცობი.
არ ვიცი რამდენად კარგად შემიძლია ემოციების წაკითხვა, არ ვიცი რამდენად კარგად ამოვიკითხე ემოციები მათი სახეებიდან (გულისხმობს ადამიანებს, რომლებმაც საზღვარი გადმოკვეთეს), მაგრამ რაც დავინახე, პირველი ემოცია - შვებაა", - ამბობს ანასტასია.
- მისი თქმით, მანქანების გარდა ბევრი ადამიანი სკუტერით და ველოსიპედითაა, ზოგიც ფეხით.
"მე ვკითხე მათ, რა მიგაქვთ თან? - და მათი პასუხი იყო, რომ ფაქტობრივად არაფერი, ორი მაისური და ფეხსაცმელი - სულ ეს არის. ადამიანები, რომლებიც მანქანით მიდიან, რა თქმა უნდა, მეტს წაიღებენ, მაგრამ ეს არ არის ტელევიზორი, ან მაცივარი."
- რამდენი ხნით აპირებენ საქართველოში დარჩენას?
ანასტასიას თქმით, ემოცია და მთავარი მიზანი, რაც ამ ადამიანებს ახლა ამოძრავებთ რუსეთის დაუყოვნებლივ დატოვებაა.
"შეიძლება ჰქონდეთ ექვსი თვის საკმარისი დანაზოგი, მაგრამ რა უნდა გააკეთონ შემდეგ, უცნობია. ახლა მათთვის მთავარი ამოცანაა, ჰქონდეთ დრო რუსეთის დასატოვებლად, სანამ საზღვარი დაიკეტება, ყოველ შემთხვევაში, მამაკაცებისთვის", - ამბობს ჟურნალისტი.
- ekhokavkaza.com ასევე აქვეყნებს იმ ადამიანების კომენტარებს, რომლებმაც საზღვარი გადმოკვეთეს.
არ მინდა, რომ დანაშაულის თანამონაწილე ვიყო.
იმედი მაქვს, ეს სიგიჟე დასრულდება.
რუსეთში ცხოვრების პერსპექტივებს უკვე ვეღარ ვხედავ.
„ერთადერთი, რაც განწყობას ამაღლებს, ისაა, რომ ბოლოს და ბოლოს თავისუფლების მიწაზე მოვხვდი - ამბობენ რუსები, რომლებმაც ლარსი გადმოკვეთეს.