ავტორი:

ზამთარი რუსული გაზის გარეშე - როგორ ემზადება ევროპა: შეშა, როგორც ოქრო, შეშის ქურდები და  თაღლითური სქემები

ზამთარი რუსული გაზის გარეშე - როგორ ემზადება ევროპა: შეშა, როგორც ოქრო, შეშის ქურდები და  თაღლითური სქემები

პოსტსაბჭოთა ქვეყნებში მცხოვრებ ადამიანებს, რომლებმაც 90-იანი წლების უშუქობა, გაზის გარეშე ცხოვრება, ეკონომიკური პრობლემები გამოიარეს, არაფერი გააკვირვებთ. მსგავსი პრობლემების წინაშე კი, შესაძლოა, ახლა ევროპის განვითარებული ქვეყნები აღმოჩდნენ. ანალიტიკოსები ევროპაში მკაცრ ზამთარს პროგნოზირებენ, რომელიც სხვადასხვა ფაქტორით იქნება გამოწვეული. მთავარი მიზეზი კი რუსეთ-უკრაინის ომი და პუტინის მიერ ბუნებრივი აირის იარაღად გამოყენებაა.

ვლადიმერ პუტინმა ევროპას გაზის მიწოდება შეუწყვიტა. ეს ერთგვარი ფასია, რომლის გადახდაც ცივილურ სამყაროს რუსეთისთვის დაწესებული სანქციების საპასუხოდ უწევს.

  • ვეროპელი ლიდერები ეძებენ ალტერნატიულ ენერგეტიკულ წყაროებს. მიუხედავად იმისა, რომ არსებობს გარკვეული რესურსი და მარაგი, როგორც ჩანს, კრიზისი მაინც გაურდაუვალია და ლიდერები საზოგადოებას აფრთხილებენ, რომ ზამთარში შესაძლოა, როგორც შუქი, ასევე გაზი დადგენილი გრაფიკით მიეწოდოთ. ისინი მოქალაქეებს მოუწოდებენ, რომ ეკონომიურად გამოიყენონ ენერგეტიკული რესურსები.

ბერლინში მცხოვრები იორგ მერტენსი washingtonpost-თან ამბობს, რომ იცოდა, რუსეთის წინააღმდეგ დასავლეთის წასვლას თავისი ფასი ექნებოდა და რომ ყოველივე ენერგეტიკულ რესურსებზე და მის ფასზე აისახებოდა, მაგრამ გადასახადების რაოდენობამ, რომელიც აგვისტოში მიიღო, მაინც ყოველგვარ მოლოდინს გადააჭარბა. მერტენსი ამბობს, რომ 70%-ით უფრო მეტი გადაიხადა წინა თვესთან შედარებით.

გარდა ენერგეტიკული რესურსების კუთხით არსებული პრობლემებისა, გერმანიაში 1970 წლის შემდეგ ყველაზე უფრო უარესი ვითარებაა ინფლაციის კუთხით, რაც კიდევ უფრო მეტ ეკონომიკურ პრობლემას ქმნის. ექსპერტთა შეფასებით, მაღალი შემოსავლების მქონე ოჯახები გაუძლებენ ამას, თუმცა საშუალო და დაბალი სოციალური საფეხურის მქონე ოჯახებისთვის ყველაზე დიდი დარტყმა იქნება.

როგორც washingtonpost-ი წერს, ზიანი მთელ ევროპას მიადგება, თუმცა ყველაზე მეტად დაზარალებულ ქვეყნებს შორის იქნებიან გერმანია, საფრანგეთი, იტალია, ნიდერლანდები და დიდი ბრიტანეთი მიუხედავად იმისა, რომ ეს უკანასკნელი დიდწილად რუსულ გაზზე არ არის დამოკიდებული. ეკონომიკის საკითხთა ექსპერტების გამოთვლებით, გადასახადები ზამთარში ევროპის მასშტაბით 210 პროცენტით მოიმატებს..

სწორედ ამიტომ, შესაძლოა, ზამთარში ევროპის მოსახლეობის დიდ ნაწილს გამათბობლების გამორთვა მოუწიოთ.

პოლონეთში მოსახლეობისთვის კვამლის და გამონაბოლქვის საწინააღმდეგო ნიღბების დარიგების საკითხს განიხილავენ, რადგანაც არ გამორიცხავენ, რომ გათბობისთვის ნაგვის დაწვა დასჭირდეთ. გერმანიაში, დასავლეთ ბერლინის მაცხოვრებლები ნახშირისა და შეშის ღუმელებს ამზადებენ, რომლებიც "ცივი ომის" შემდეგ შეინახეს.

  • გარდა ამისა, გამოჩდნენ შეშის ქურდები, რომლებმაც იგრძნეს შესაძლებლობა. ისინი უკანონოდ ჭრიან და იპარავენ ტყიდან შეშას და ამასთანავე, იპარავენ ხის მორებს სატვირთო ავტომობილებიდან. გაჩნდა შეშის გაყიდვის ახალი თაღლითური სქემა. თაღლითები ქმნიან ყალბ ვებსაიტებს და რეგისტრირდებიან, როგორც შეშის გამყიდველები, რომლებიც რეალურად მყიდველს ატყუებენ - ფულს იღებენ და ქრებიან. მათ უკვე ათასობით მსხვერპლი ჰყავთ.

რამდენიმე ქვეყანაში შეშისთვის განკუთვნილი ღუმელების დეფიციტია.

  • "შეშა ახლა ოქროა“, - ამბობს 62 წლის გერმანელი ჰანს ლუნინგჰეიკი, რომლის თქმითაც, ზამთრისთვის შეშის ღუმელის დამზადება შეუკვეთა.

საფრანგეთის ხელისუფლება აფრთხილებს მოქალაქეებს მიმდინარე წლის ბოლოსთვის ელექტროენერგიის დაზოგვისთვის მოემზადონ. საფრანგეთში აცხადებენ, რომ გარკვეული პერიოდის განმავლობაში მოქალაქეებს შუქი, შესაძლოა, გრაფიკით მიეწოდოთ.ასევე იგეგმება, რომ ელექტროენერგიის დაზოგვის მიზნით, ეიფელის კოშკის მთავარი მანათობელი შუქურა საღამოს 23:45 წუთზე ჩააქრონ.

გარდა ამისა, საფრანგეთში მთავრობა მოსახლეობას რეკომენდაციას აძლევს, რომ გამათბობელს 19 გრადუსზე ზემოთ არ აუწიონ და ამით ენერგეტიკული რესურსის დაზოგვას შეუწყონ ხელი.

ბოლოდროინდელმა გამოკითხვამ აჩვენა, რომ დიდ ბრიტანეთში ყოველი მეოთხე ადამიანი აპირებს გამორთოს ზამთარში გამათბობელი. საინტერესოა, რომ დიდი ბრიტანეთი, ევროპის სხვა ქვეყნებისგან განსხვავებით, დიდად არ არის დამოკიდებული რუსულ გაზზე, თუმცა ომის შემდეგ ფასები მკვეთრად გაზრდილია, რის გამოც ბრიტანელებსაც მოუწევთ დანარჩენი ევროპის ბედის გაზიარება.

უნგრეთში ამბობენ, რომ მოსახლეობის უმეტესობა ზამთრისთვის შეშას იმარაგებს და მისი ფასი მკვეთრად გაიზარდა.

იტალიაში მყოფი ქართვეელი ემიგრანტები გვიყვებიან, რომ განსაკუთრებით ქვეყნის ჩრდილოეთით დეფიციტურად იქცა დაპრესილი ნახერხი, რომელიც აქამდე გათბობის ალეტრანტიულ, ბიოსაშუალებად მიიჩნეოდა და რომლითაც ძალიან ცოტა იტალიელი თუ სარგებლობდა.

ევროპული ქვეყნები ცდილობენ, შეამცირონ ენერგეტიკული რესურსების მოხმარება და შეავსონ რეზერვები, ჩაანაცვლონ რუსული ბუნებრივი აირი. ხელისუფლების წარმომადგენლები მოსახლეობას ფინანსურ დახმარებასაც ჰპირდებიან. მაგალითად, გერმანიის მთავრობა გეგმავს, ასობით ათასი ადამიანი დაამატოს იმ ადამიანთა სიაში, რომლებისთვისაც დახმარებას გასცემენ.

მაგრამ ნაკლებად სავარაუდოა, რომ სრულად ანაზღაურდეს ხარჯები, რის გამოც ანალიტიკოსები მიუთითებენ, რომ სიღარიბის მაჩვენებელი მკვეთრად გაიზრდება.