ავტორი:

"მე ცხოვრებაშიც მაქვს ჩემი სირთულეები და ოჯახიც რომ არ არის კარგად, ამან ძალიან დამაზარალა" - რა შეცვალა ნიკოლოზ სააკაშვილის ცხოვრებაში მამის დაპატიმრებამ?

"მე ცხოვრებაშიც მაქვს ჩემი სირთულეები და ოჯახიც რომ არ არის კარგად, ამან ძალიან დამაზარალა" - რა შეცვალა ნიკოლოზ სააკაშვილის ცხოვრებაში მამის დაპატიმრებამ?

საქართველოს ექსპრეზიდენტის მიხეილ სააკაშვილის უმცროსი ვაჟი ამბობს, რომ მამის დაპატიმრებამ მის ცხოვრებაში უამრავი რამ შეცვალა.

ნიკოლოზ სააკაშვილის თქმით, მამამისი პოლიტიკური პატიმარია და აქვე აღნიშნავს, რომ მისი მდგომარეობის სირთულიდან გამომდინარე, ის აუცილებლად უნდა გადაიყვანონ საზღვარგარეთ.

"რომ ჩამოვიდა, ეს "ფეისბუქიდან" გავიგე. მაშინ ონლაინ სკოლა იყო კოვიდის გამო, მაგრამ საერთოდ ვერ ვსწავლობდი, რადგან ძალიან ემოციებში ვიყავი. ის, რაც მოხდა, დიდი ცვლილება იყო ჩემთვის ემოციურად.

ზოგადად მიშა ყოველთვის საზღვარგარეთ იყო ხოლმე და მე ვიყავი საქართველოში. ახლა აქ ვნახულობ, ეს კარგია ჩემთვის, მასთან საუბრის შემდეგ ვიზრდები ადამიანურად. ჩემი აზრით, მიშას ჰქონდა ძალიან წარმატებული პოლიტიკური კარიერა, მინუსებით და პლიუსებით. ამდენი გააკეთა და ახლა რა ხდება, რომ ვუყურებ, არ მინდა პოლიტიკოსობა, ისედაც არ მქონდა დიდი სურვილი, მაგრამ ახლა ზუსტად ვიცი, რომ ჩემთვის ასეთი ცხოვრება არ არის მისაღები.

დაკავება მოულოდნელი არ იყო, მაგრამ ამდენი ხანი რომ იქნებოდა ასეთ მდგომარეობაში, არ მეგონა. მეგონა, რომ საზღვარგარეთ მაინც გადაიყვანდნენ სამკურნალოდ. რთულია, როცა ვხედავ, რომ ცუდ მდგომარეობაშია. ძალიან შეცვლილია. როგორც ადამიანურად, ისე ჯანმრთელობის თვალსაზრისით. ადრე უფრო იყო მასში პოლიტიკური ცეცხლი, ახლა საქართველოზე საერთოდ არ საუბრობს ჩემთან. უკრაინის ომზეა გადართული. ჩაუქრა ეს პოლიტიკური ცეცხლი და სხვა რამეებით დაკავდა.

ციხეში ნახვა ძალიან რთული იყო. თვითონ ის ფაქტი იყო ძალიან რთული, რომ ციხეში მოხვდა. ჩემთვის ყველაზე შთამბეჭდავი ის იყო, როდესაც მივედი ციხეში და შუშის იქით დავინახე და ტელეფონით ვესაუბრებოდი. ძალიან რთული იყო. შემდეგ ძალიან ემოციური იყო, როცა კლინიკაში მივედი და ჩავეხუტე.

მე ჩემს ცხოვრებაშიც მაქვს ჩემი სირთულეები, მაგრამ მაინც ოჯახი რომ არ არის კარგად, ძალიან დამაზარალა ამან. რატომ არის ციხეში მიშა და ახლა კლინიკაში - ეს პოლიტიკური მიზეზებია. ამას ბევრი გამეორება არ უნდა. ამას ევროპაშიც ამბობენ" - ამბობს ნიკოლოზ სააკაშვილი "მთავარ არხთან" საუბარში.