"აშშ გაანადგურებს რუსულ ჯარს, თუ რუსეთი უკრაინაში ბირთვულ იარაღს გამოიყენებს" - СIA-ის ყოფილი დირექტორი პუტინს აფრთხილებს
"აშშ და მისი მოკავშირეები გაანადგურებენ რუსეთის ჯარს და მათ აღჭურვილობას უკრაინაში, ასევე ჩაძირავენ შავ ზღვაში მის ფლოტს, თუ რუსეთის პრეზიდენტი ვლადიმერ პუტინი გამოიყენებს ბირთვულ იარაღს", - ამის შესახებ აშშ-ის ცენტრალური სადაზვერვო სააგენტოს (CIA) ყოფილმა დირექტორმა, გადამდგარმა გენერალმა, დევიდ პეტრეუსმა განაცხადა და პუტინი გააფრთხილა.
- კითხვას, რუსეთის მიერ ბირთვული იარაღის გამოყენება უკრაინაში, გამოიწვევს თუ არა ომში აშშ-ისა და ნატო-ს ჩართვას, პეტრეუსი პასუხობს, რომ "ამაზე აშშ-სა და ნატო-ს აუცილებლად ექნება შესაბამისი პასუხი."
პეტრეუსის განმარტებით, მართალია, უკრაინა ნატო-ს წევრი არ არის, თუმცა თუკი რუსეთი ბირთვულ იარაღს გამოიყენებს, არსებობს უდიდესი ალბათობა, რომ რადიაცია გავრცელდება ნატო-ს წევრ ქვეყნებში, რაც ნატო-ს მხრიდან აღიქმება, როგორც თავდასხმა წევრ სახელმწიფოზე.
"გარდა ამისა, ბირთვული იარაღის გამოყენება იმდენად საშინელი რამაა, რომ არ შეიძლება ეს უპასუხოდ დარჩეს. არავის სურს, ბირთვულ ესკალაციაში აღმოჩენა, მაგრამ უნდა ვაჩვენოთ, რომ ამას არ მივიღებთ", - აცხადებს პეტრეუსი.
- მისი თქმით, პუტინის მხრიდან მობილიზაციის გამოცხადება და მინიშნება ბირთვული იარაღის გამოყენების ალბათობაზე, კრემლის ლიდერის "სასოწარკვეთილებაზე მიუთითებს."
"ბრძოლის ველზე არსებული რეალობა (გულისხმობს უკრაინის წარმატებას), რომელსაც რუსეთი ახლა აწყდება, ვფიქრობ, შეუქცევადია, ვერანაირი შაბლონური მობილიზაცია, ბირთვული იარაღის გამოყენების მუქარა ვერ გამოიყვანს პუტინს ამ კონკრეტული სიტუაციიდან. რაღაც მომენტში ეს უნდა აღიაროს, რაღაც მომენტში მოლაპარაკებები უნდა დაიწყოს“, - ამბობს CIA-ის ყოფილი დირექტორი.
პეტრეუსი აცხადებს, რომ პუტინის მხრიდან ბირთვული იარაღის გამოყენებაზე მუქარას, მსოფლიო სერიოზულად უნდა მოეკიდოს.
წყარო: the guardian