გვიან ღამით წალენჯიხის მუნიციპალიტეტის მერის მანქანა დაიწვა - ეჭვობენ, რომ ცეცხლი განზრახ გააჩინეს

ინტერნეტსივრცეში გავრცელდა ფოტო და ვიდეომასალა, რომლის თანახმადაც წალენჯიხის მერის გიორგი (გია) ხარჩილავას მანქანა გვიან ღამით დაიწვა. თამარ ბელქანია, რომელმაც ვიდეო ატვირთა, ამბობს, რომ მანქანას ცეცხლი, დაახლოებით, ღამის 4 საათზე გაუჩნდა.

"ახლა ჩვენ ვართ წალენჯიხის მუნიციპალიტეტის მერის გიორგი ხარჩილავას სახლის წინ, გუშინ გვიან ღამე, სავარაუდოდ, მანქანას ესროლეს საწვავით სავსე რაღაც. ზუსტად არ ვიცი, მე არ ვარ გამომძიებელი, მანქანა არის სრულად დამწვარი. აქვე გადის გაზის გაყვანილობა, მთავარია, რომ მსხვერპლი არ არის, თუმცა ვხედავთ რაც ხდება. დამწვარი მანქანის ნაწილები გადაიტანეს პოლიციაში, თუმცა აქ ყვითელ ლენტსაც ვერ ვხედავ. სიტყვები არ მყოფნის, რომ გითხრათ, რომ უსაფრთხოდ ვგრძნობ თავს, ტყუილია. დიდი იმედი მაქვს, რომ გამოძიება დაადგენს ყველაფერს", - აცხადებს თამარ ბელქანია.

შეგახსენებთ, გიორგი ხარჩილავა ერთადერთი ოპოზიციონერი მერია, რომელმაც ადგილობრივ თვითმმართველობის ბოლო არჩევნებში გაიმარჯვა.

როგორც AMBEBI.GE-ს შინაგან საქმეთა სამინისტროში განუცხადეს, მომხდარზე გამოძიება სსკ-ის 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.