“ჯოჯოხეთსაც წაუღია…" - ილონ მასკის განცხადებით, ის გააგრძელებს უკრაინაში Starlink-ის სატელიტური კავშირის დაფინანსებას
SpaceX-ის ხელმძღვანელის, ილონ მასკის განცხადებით, მისი კომპანია უფასოდ გააგრძელებს უკრაინაში Starlink-ის სატელიტური კავშირის უზრუნველყოფას. ამის შესახებ იგი Twitter-ის პირად გვერდზე წერს.
“ჯოჯოხეთსაც წაუღია… მიუხედავად იმისა, რომ Starlink-ი ჯერ კიდევ კარგავს ფულს და სხვა კომპანიები გადასახადების გადამხდელების მილიარდობით დოლარს იღებენ, ჩვენ გავაგრძელებთ უკრაინის მთავრობის დაფინანსებას”, - წერს მასკი.
- ცნობისთვის, მასკის ამ განცხადებამდე CNN-მა გაავრცელა ინფორმაცია, რომლის მიხედვითაც, მათ მოიპოვეს დოკუმენტები, რომელიც ადასტურებს, რომ ილონ მასკის SpaceX-მა პენტაგონს გაუგზავნა წერილი იმასთან დაკავშირებით, რომ კომპანია ვეღარ შეძლებს Starlink-ის სერვისის დაფინანსებას.
წერილში მასკი პენტაგონს სთხოვს, თავის თავზე აიღოს უკრაინაში Starlink-ის გამოყენების დაფინანსება, რომელიც SpaceX-ის მტკიცებით, წლის დარჩენილ პერიოდში 120 მილიონ დოლარზე მეტი, მომდევნო 12 თვის განმავლობაში კი - შეიძლება 400 მილიონ დოლარამდე დაჯდება.
"ჩვენ არ ვართ იმ მდგომარეობაში, რომ უკრაინას დამატებითი სატელიტური ინტერნეტ ტერმინალები ვაჩუქოთ, ან დავაფინანსოთ არსებული ტერმინალები განუსაზღვრელი ვადით“, - წერს SpaceX-ის სამთავრობო გაყიდვების დირექტორი წერილში.