"ვეებერთელა ლოდები მოწყდა და გამაყრუებელი ხმით, გრუხუნით ჩამოცვივდა" - ფოტოები ვარძიიდან, სადაც წვიმის შემდეგ ქვათა ცვენა დაიწყო

ვარძიის მუზეუმის მიმდებარე ტერიტორიაზე, მთის ფერდობზე ქვათა ცვენა დაიწყო. კულტურული მემკვიდრეობის ეროვნული სააგენტოს ინფორმაციით, მომხდარის შედეგად ძეგლს საფრთხე არ დამუქრებია.

"18 ოქტომბერს, დილის საათებში, ვარძიის მუზეუმის მიმდებარე ტერიტორიაზე, პერიმეტრზე შესასვლელ შლაგბაუმთან, მთის ფერდობზე დაიწყო ქვათა ცვენა (დაგორდა ლოდები).

თუმცა, როგორც აღინიშნა, ეს არის მუზეუმის მიმდებარე ტერიტორია კულტურული მემკვიდრეობის ძეგლის - ვარძიის სამონასტრო კომპლექსისგან მოშორებით.

მომხდარის შედეგად ძეგლს საფრთხე არ დამუქრებია”, - აღნიშნულია ინფორმაციაში.

• ვარძიაში ქვათა ცვენის შესახებ წერს ადგილობრივი, კუკური მეტრეველი და ქვათა ცვენის ამსახველ ფოტოებს აქვეყნებს:

"წუხანდელი გადაუღებელი წვიმის შემდეგ ამ დილით ვარძიის სამონასტრო კომპლექსის წინა ნაწილში, ვეებერთელა ლოდები მოწყდა და გამაყრუებელი ხმით და გრუხუნით შესასვლელში ჩამოცვივდა და დაიმსხვრა. საბედნიეროდ, მცველი უვნებელად გადარჩა", - წერს მეტრეველი.