"მას "ქართულ ოცნებასთან“ თანამშრომლობით დიდი მომავალი აქვს“ - რას ამბობს გიორგი ვაშაძე თეონა აქუბარდიას მიერ "სტრატეგია აღმაშენებლის" დატოვებაზე?
ერთი ტყუილი იკადრა დღეს და ძალიან ცუდია - მან თქვა, რომ ომბუდსმენის კანდიდატების გამოკითხვაზე არ ვიღებთო მონაწილეობას, არადა პაატა მანჯგალაძე არის ამ გასაუბრებებზე , - ამის შესახებ "სტრატეგია აღმაშენებლის“ ლიდერმა, გიორგი ვაშაძემ ყოფილ თანაპარტიელზე, თეონა აქუბარდიაზე განაცხადა, რომელმაც "სტრატეგია აღმაშენებელი“ რამდენიმე დღის წინ დატოვა.
როგორც ვაშაძემ აღნიშნა, მან გუნდის წევრებს ბოდიშიც კი მოუხადა იმის გამო, რომ თეონა აქუბარდია პარლამენტში თავისი ინიციატივით შეიყვანა.
"სიღრმისეულ კომენტარებში არ შევალ, მხოლოდ იმას ვიტყვი, რომ ჩემს თანაპარტიელებს ბოდიშიც მოვუხადე მასთან დაკავშირებით, რადგან ჩემი ინიციატივა იყო მისი შეყვანა. სამწუხაროდ, "სტრატეგია აღმაშენებელმა“ ვერაფერი მიიღო ამ პროცესიდან. ის, რომ მას ცოტა სხვანაირი პოზიცია აქვს, მხოლოდ ჩემი აზრი არ არის“,- განაცხადა ვაშაძემ.
ამასთან, ვაშაძე ფიქრობს, რომ აქუბარდიას "ქართულ ოცნებასთან“ თანამშრომლობით "დიდი მომავალი აქვს“.
"პარლამენტში სამუშაო ჯგუფები რომ აღარ არის, ახლა მოუნდა სამუშაო ჯგუფში შესვლა და რომელ სამუშაო ჯგუფში, არ ვიცი - დამთავრდა ეს სამუშაო ჯგუფები. არ მინდოდა ამ დეტალებში შევსულიყავი.
თქვენ ისიც იცით, რომ სამწუხაროდ, [თეონა აქუბარდია] ჩვენი პარტიის დიდი სახე არ ყოფილა. მძიმე ვითარება გვქონდა და ყველაფერი თავისთავად მოხდა. ვფიქრობ, რომ მას "ქართულ ოცნებასთან“ თანამშრომლობით დიდი მომავალი აქვს“, - განაცხადა გიორგი ვაშაძემ.
რაც შეეხება კითხვას იმის შესახებ, ხომ არ იგულისხმა გიორგი ვაშაძემ სწორედ თეონა აქუბარდია, როდესაც განაცხადა, რომ "ქართული ოცნების“ სატელიტი იქნება ყველა დეპუტატი, რომელიც სახალხო დამცველის პოზიციაზე არასამთავრობო ორგანიზაციების მიერ მხარდაჭერილი კანდიდატების გარდა, რომელიმე სხვას დაუჭერს მხარს, ვაშაძემ აღნიშნა: "ყველა, ვინც ამას ხმას მისცემს, აღარ არის ოპოზიცია და ის არის "ქართული ოცნება“ - თეონა იქნება თუ პეტრე, ნებისმიერი, ვინც ამ ნაბიჯს გადადგამს, იქნება "ქართული ოცნება“ და მოღალატე. ეს არის ყველაფრის ღალატი - ესაა ხალხის, მანდატის და ღირსების ღალატი"