"მოწინააღმდეგემ ფრონტის გარკვეულ მონაკვეთებზე საომარი მოქმედებების ინტენსივობა სამჯერ გაზარდა" - ზალუჟნი
უკრაინის შეიარაღებული ძალების მთავარსარდლის, ვალერი ზალუჟნის განცხადებით, რუსებმა სამჯერ გააძლიერეს საომარი მოქმედებების ინტენსივობა ფრონტის გარკვეულ მონაკვეთებზე.
უკრაინული მედიის ინფორმაციით, ეს განცხადება ზალუჟნიმ ევროპაში ნატო-ს გაერთიანებული ძალების მთავარსარდალთან და ევროპაში აშშ-ის ძალების მეთაურთან, გენერალ კრისტოფერ კავოლისთან სატელეფონო საუბრისას გააკეთა.
ზალუჟნის თქმით, რუსები ყოველდღიურად 80-მდე შეტევას ახორციელებენ.
"განვიხილეთ ფრონტზე არსებული მდგომარეობა, რომელიც დაძაბული, მაგრამ კონტროლირებადია. მოწინააღმდეგემ სამჯერ გააძლიერა საომარი მოქმედებების ინტენსივობა ფრონტის გარკვეულ მონაკვეთებზე - ყოველდღიურად 80-მდე შეტევა. ჩვენი ჯარისკაცების სიმამაცისა და ოსტატობის წყალობით ვინარჩუნებთ თავდაცვას“, - აღნიშნა ზალუჟნიმ.
მისი თქმით, პარტნიორები აცნობიერებენ უკრაინისთვის რაკეტსაწინააღმდეგო და საჰაერო თავდაცვის სისტემების მიწოდების აუცილებლობას და ამ მიზნით მნიშვნელოვან ძალისხმევას ახორციელებენ.