მიკოლაივში დაბომბვის შედეგად დაღუპულთა რაოდენობა შვიდამდე გაიზარდა
უკრაინის სამხრეთ ნაწილში მდებარე ქალაქ მიკოლაივში ხუთსართულიან საცხოვრებელ კორპუსზე რუსული ძალების მიერ დღეს განხორციელებული თავდასხმის შედეგად შვიდი ადამიანი დაიღუპა, ერთი კი დაშავდა, - ამის შესახებ უკრაინის გენერალური პროკურატურა იუწყება.
მათივე ინფორმაციით, თავდასხმა ქალაქის ორ რაიონში მოხდა.
"მეორე რაიონში დაზიანებულია კერძო საცხოვრებელი სახლები, ავტომობილები, საწარმოების სამრეწველო ფართები და საწყობები, მაღაზიები, ავტოგასამართი სადგური“, - აცხადებენ უწყებაში.
პროკურატურის წინასწარი მონაცემებით, დაბომბვა განხორციელდა S-300 ტიპის რაკეტებით.
უწყების ცნობით, გამოძიება ომის კანონებისა და ჩვეულებების დარღვევის ფაქტზე დაიწყო.