„პალიტრა L“ ოლენა კრავეცისა და ნინო ქათამაძის საქველმოქმედო საღამოს პარტნიორია
Welcome to Georgia! ტურიზმის ეროვნული დაჯილდოების ორგანიზებით, გიწვევთ საქველმოქმედო საღამოზე ოლენა კრავეცთან ერთად! ღონისძიება ჩატარდება 24 ნოემბერს, 19:00 საათზე, სასტუმრო Golden Tulip Design Tbilisi-ში, სადაც თქვენ გელით ლიტერატურული და მუსიკალური საღამო ნინო ქათამაძესთან და ოლენა კრავეცთან ერთად.
ღონისძიებაზე მისულ სტუმრებს ოლენა კრავეცი უამბობს ისტორიებს, რომელშიც ბევრი ჩვენგანი დაინახავს საკუთარ თავსა და თავგადასავლებს. მისი სოლო - "პროზა და საკუთარი“ საღამოს გამორჩეული ნაწილი იქნება.
ღონისძიებაზე მოსულ სტუმრებს საჩუქრად გადაეცემათ გამომცემლობა ,,პალიტრა L-ის“ წიგნები: გურამ ოდიშარიას ,,დევნილთა უღელტეხილი“ უკრაინულ ენაზე და უკრაინელი თანამედროვე პოეტების კრებული ქართულ ენაზე.
ორგანიზატორები სტუმრებს ასევე გაუმასპინძლდებიან Mtsvane Estate-ის გამორჩეული ღვინით,
საღამოს კი დააგვირგვინებს ნინო ქათამაძის საოცარი ხმა რომელიც ყველას ასე ძალიან გვიყვარს. ღონისძიებაზე დასწრების საფასურია 200 ლარი.თანხის გადმორიცხვა შესაძლებელია შემდეგ ანგარიშზე :GE54BG0000000533933913შემოსული თანხა გადაირიცხება ნინო ქათამაძის და ასევე, თავად ოლენა კრავეცის საქველმოქმედო ფონდში.რეგისტრაციის ბმული: bit.ly/3UQr2tF
შეგახსენებთ რომ გამომცემლობა ,,პალიტრა L-ი“ კვალდაკვალ მიჰყვება მსოფლიოსა და საქართველოში განვითარებულ მოვლენებს. უკრაინისა და უკრაინელებისადმი სოლიდარობის ნიშნად ომის დაწყებიდან ძალიან მალევე გამოსცა თანამედროვე უკრაინელი პოეტების კრებული, რომელიც ქართულ ენაზე მწერალმა, შოთა იათაშვილმა მოამზადა, კრებულის ყდაზე კი გამომცემლობის უკრაინელმა დიზაინერმა, იულია კირაკოსოვამ იმუშავა. ეს კრებული საქველმოქმედოა და მისი გაყიდვებიდან შემოსული თანხა სრულად უკრაინელი ხალხის დასახმარებელ ფონდში ირიცხება.
იმავე მიზანს ემსახურება ქართველი მწერლის, გურამ ოდიშარიას მოთხრობის, ,,დევნილთა უღელტეხილის“ უკრაინულ ენაზე გამოცემაც. მოგეხსენებათ, 1993 წლის 27 სექტემბერს სოხუმი დაეცა... ამ დღის ტრაგედიამ კი ტალღასავით გადაუარა ქალაქს, სოფელს, ადამიანს... უღელტეხილსაც კი. სწორედ ამაზეა ეს მოთხრობა და: „შეიძლება გაურბოდე სიკვდილს, მაგრამ ფეხები უკან გრჩებოდეს; მიუყვებოდე ჯოჯოხეთურ გზას დაა გულის სიღრმეში არც გინდოდეს მისი დასრულება, რადგან... რადგან უკან გრჩება სამშობლოს ნაწილი, სახლი, ბავშვობა, მოგონებები... მხოლოდ უკან? – ზოგიერთები სულაც იქვე დარჩნენ – „ზეციური საქართველოს საზღვრამდე ისედაც თავიანთი ფეხით ამოსულები“...
ამდენად, ქართველი ხალხისთვის ნაცნობია ის ტკივილი, რომელსაც ახლა უკრაინელები განიცდიან, ქართველს გამოვლილი აქვს ის მძიმე გზა, რომელსაც ახლა ჩვენი მოძმე ერი შესდგომია. სწორედ ამიტომ ,,დევნილთა უღელტეხილის“ უკრაინულ ენაზე თარგმნა და მისი უკრაინელებისთვის სრულიად უსასყიდლოდ გადაცემა, ჩვენი საერთო სულისკვეთებისა და სოლიდარობის ერთგვარი მაგალითია.