ავტორი:

"შერიგებას სთხოვდა და არ ურიგდებოდაო. შემაკავებელი ორდერი ჰქონია გამოწერილი" - რას ამბობენ თერჯოლაში მოხდარი ფემიციდის საზარელი ფაქტის შესახებ ადგილობრივები

"შერიგებას სთხოვდა და არ ურიგდებოდაო. შემაკავებელი ორდერი ჰქონია გამოწერილი" - რას ამბობენ თერჯოლაში მოხდარი ფემიციდის საზარელი ფაქტის შესახებ ადგილობრივები

რამდენიმე საათის წინ თერჯოლაში შემზარავი ფაქტი მოხდა. 37 წლის თამილა ლილუაშვილს ყოფილმა ქმარმა ბენზინი გადაასხა და თვითმხილველების თვალწინ დაწვა. შემთხვევა მაღაზიათა ქსელ "მაგნიტში" მოხდა, სადაც გარდაცვლილი მენეჯერად მუშაობდა.

ქალი ცეცხლის ალში ადგილზევე დაიწვა. ფაქტის შეემსწრეები ცდილობდნენ მას მიშველებდნენ, თუმცა უშედეგოდ. მიუხედავად იმისა, რომ ამ პროცესში ისინიც დაშავდნენ, ქალისთვის დახმარების აღმოჩენა მაინც ვერ შეძლეს. სხეულის 60-70%-იანი, მესამე-მეოთხე ხარისხის დამწვრობა მიიღო თავად მოძალადემაc.

როგორც სამედიცინო ცენტრ "იმერმედის“ ექიმმა, თინათინ ჩაფიძემ ჟურნალისტებს განუცხადა, პაციენტი კლინიკაში შოკურ მდგომარეობაში შეიყვანეს. ის ამ დროისთვის რეანიმაციულ განყოფილებაში იმყოფება.

ექიმის განცხადებით, 41 წლის მამაკაცის სიცოცხლეს ამ ეტაპზე, საფრთხე არ ემუქრება.

"პაციენტი უმძიმეს შოკურ მდგომარეობაში დაახლოებით, 20:20 საათზე შემოიყვანეს. სხეულის დაახლოებით, 60-70%-იანი, მესამე-მეოთხე ხარისხის დამწვრობა იყო. ის შეყვანილია რეანიმაციულ განყოფილებაში შემდგომი მკურნალობის და დაკვირვების მიზნით“, - განაცხადა ექიმმა.

ადგილობრივების ცნობით, გარდაცვლილს ორი მცირეწლოვანი შვილი დარჩა.

როგორც ბოლო დროს მომხდარი ფემიციდის უმრავლესობის შემთხვევაში, სცენარი აქაც იდენტური იყო - ყოფილ ცოლზე ძალადობის გამო კაცს შემაკავებელი ორდერი ჰქონდა გამოწერილი.

"წლები უყვარდათ ერთმანეთი, ვიდრე დაქორწინდებოდნენ. შემდეგ არ ვიცი რა მოხდა, კაცი გამუდმებით ძალადობდა თურმე და დაშორდნენ. შერიგებას სთხოვდა და არ ურიგდებოდაო. შემაკავებელი ორდერიც ჰქონია გამოწერილი კაცს, მაგრამ ვერაფერმა დაიცვა ეს გოგო. ორი ბავშვი დაობლდა" - უყვება ambebi.ge -ს გარდაცვლილი ქალის მეზობელი.

შსს-ში აცხადებენ, რომ მომხდარ ფაქტზე გამოძიება სისხლის სამართლის კოდექსის 11 პრიმა - 109-ე მუხლით დაიწყო, რაც ოჯახის წევრის მიმართ განსაკუთრებული სისასტიკით ჩადენილ განხრახ მკვლელობას გულისხმობს.