ავტორი:

ვინ არის რუსი "სატანისტური სტილისტი", რომელსაც დემნა გვასალიას მარჯვენა ხელს უწოდებენ და რატომ ადანაშაულებენ მას Balenciaga-ს სკანდალურ ფოტოსესიაში?

ვინ არის რუსი "სატანისტური სტილისტი", რომელსაც დემნა გვასალიას მარჯვენა ხელს უწოდებენ და რატომ ადანაშაულებენ მას Balenciaga-ს სკანდალურ ფოტოსესიაში?

ფრანგული მოდის სახლი Balenciaga უკვე მეორე კვირაა სკანდალის ეპიცენტრშია: ბრენდს, ორი სარეკლამო კამპანიის გამო, რომლებიც 16 და 21 ნოემბერს გამოვიდა, პედოფილიასა და ბავშვთა პორნოგრაფიის გავრცელებაში ადანაშაულებენ.

ყველაფერი კი ასე დაიწყო, 16 ნოემბერს Balenciaga-მ ახალი პროდუქციის ხაზის გაშვება დააანონსა, რომელიც მოიცავდა საყოფაცხოვრებო ნივთებს: ჭურჭელს, ძაღლის აქსესუარებს (როგორიცაა საყელო და თასი), ავეჯს, ლარნაკებს... გადაღებისთვის ბრენდმა დოკუმენტალისტი ფოტოგრაფი გაბრიელ გალიმბერტი დაიქირავა. Balenciaga-ს ახალი კონცეფცია ეხმიანებოდა სათამაშოების ისტორიების იდეას - მასში ბავშვებიც მონაწილეობდნენ, ირგვლივ კი კომპანიის ახალი ხაზის ნივთები იყო განთავსებული...

გადაღებებში 6 ბავშვი მონაწილეობდა. ზოგიერთ სურათზე ბავშვებს ხელში უჭირავთ ტყავის ქამრებში გამოწყობილი დათუნიები, საყელოები საკეტებითა და ხელბორკილებით. სინამდვილეში, ეს ის ზურგჩანთებია, რომელიც Balenciaga-ს კრეატიულმა დირექტორმა დემნა გვასალიამ წარმოადგინა ჯერ კიდევ შემოდგომაზე, 2023 წლის გაზაფხული-ზაფხულის ჩვენებაზე, თუმცა ამჯერად ასეთმა აღკაზმულობამ მომხმარებლებში BDSM ესთეტიკასთან ასოცირება გამოიწვია, რის შემდეგაც სკანდალის პირველი ტალღა დაიწყო. მალე ბრენდმა კამპანია სოციალური ქსელებიდან და ოფიციალური ვებ-გვერდიდან ამოიღო და "ინსტაგრამზე" ბოდიში მოიხადა...

ხუთი დღის შემდეგ, Balenciaga-მ ახალი სარეკლამო კომპანია დაიწყო. ეს გახლდათ Garde-Robe-ს ხაზი, რომელშიც მოდელები (მათ შორის ბელა ჰადიდი, იზაბელ ჰუპერტი და ნიკოლ კიდმანი) ოფისში პოზირებენ. ირგვლივ საოფისე ატრიბუტიკა ჩანს, მათ შორის ქაღალდების გროვა. სწორედ ეს გაზეთები გახდა ბრენდის მიმართ ნეგატივის ახალი ტალღის მიზეზი.

სოციალური ქსელების მომხმარებლებმა კამპანიის ფარგლებში გავრცელებულ სარეკლამო ფოტოებზე აღმოაჩინეს ბავშვთა პორნოგრაფიაზე სასამართლო გადაწყვეტილებების ამობეჭდილი მასალები. აღნიშნული კამპანიების გამო ბრენდი მომხმარებლებმა გააკრიტიკეს და ბავშვთა წინააღმდეგ ძალადობის რეკლამირებაშიც დაადანაშაულეს.

  • ვინ არის დამნაშავე

თავის სოციალურ მედიაში, "ბალენსიაგამ" რამდენჯერმე მოიხადა ბოდიში, როგორც სათამაშოების კამპანიისთვის, ასევე ფოტოებზე მოხვედრილი გაზეთებისთვის. პირველ შემთხვევაში, ბრენდმა სრული პასუხისმგებლობა აიღო, ცდილობდა დაეცვა ფოტოგრაფის რეპუტაცია. თავად გაბრიელ გალიმბერტიმ აღნიშნა, რომ დაზუსტებების მიუხედავად, ნეგატივის ნაკადის წინაშე აღმოჩნდა. განცხადებაში გალიმბერტიმ თქვა, რომ გადაღებებისას ის არ ირჩევს სუბიექტებს ან მოდელებს და დასძინა, რომ მსგავსი ბრალდებები "არასწორია და საზოგადოების ყურადღება რეალური პრობლემებიდან და დამნაშავეებიდან გადააქვს სხვა მიმართულებით".

ფოტოგრაფის კარიერა უკვე დაზარალდა. სკანდალის შემდეგ გაუქმდა მისი გამოფენა ყაზახეთში, სოციალურ ქსელებში მუქარის ნაკადი არ შეწყვეტილა და ზოგიერთმა კოლექციონერმა უარი თქვა მისი ნამუშევრების შეძენაზე.

სკანდალიდან ერთი დღის შემდეგ კომპანიამ განაცხადა, რომ ნიუ-იორკის სასამართლოს 25-მილიონიანი სარჩელით მიმართა კომპანია North Six-ის წინააღმდეგ, რომელმაც Garde-Robe-ის კამპანია დაგეგმა და განახორციელა. სარჩელში Balenciaga დავობს, რომ კამპანიის ფარგლებში გადაღებული ფოტოები მათთან შეთანხმების გარეშე გავრცელდა და გააჩინა "ცრუ ასოციაცია Balenciaga-სა და ბავშვთა პორნოგრაფიას შორის“.

კომპანიის ადვოკატი, რომელსაც Balenciaga უჩივის, საპასუხოდ აცხადებს, რომ გადაღებებზე კომპანიის წარმომადგენლებიც იყვნენ, დოკუმენტების შესახებაც იცოდნენ და სხვა რეკვიზიტებიც თავად მიიტანეს. ამასთანავე, იურისტის თქმით, გადაღების დიზაინერი ფოტოების შერჩევასა და გამოქვეყნებაზე პასუხისმგებელი არ ყოფილა.

მთავარი კითხვა - ვინ არის დამნაშავე, ისევ ღიაა... არსებობს ორი ვერსია:

ზოგიერთი მომხმარებელი დარწმუნებულია, რომ ბრენდის უმაღლესი მენეჯმენტი, მათ შორის კრეატიული დირექტორი დემნა გვასალია, მინიმალურად იყო ჩართული პროცესებში. დანარჩენები დარწმუნებულნი არიან, რომ დემნა გვასალიამ არა მხოლოდ ღია შუქი მისცა კოლექციას, არამედ პროვოკაცია პირადად დაგეგმა.

Balenciaga-ს გარშემო ატეხილ სკანდალს გამოეხმაურა ამერიკელი ვარსკვლავი კიმ კარდაშიანი, რომელიც ბრენდთან აქტიურად თანამშრომლობდა. კარდაშიანი აცხადებს, რომ მომხდარის შემდეგ Balenciaga-სთან თანამშრომლობას უნდა გადახედოს:

"როგორც 4 შვილის დედა, შეძრული ვარ ფოტოებით. ბავშვების უსაფრთხოება უზენაესია და ჩვენს საზოგადოებაში ადგილი არ უნდა ჰქონდეს რაიმე სახით ბავშვთა მიმართ ძალადობის ნორმალიზებას. ვაფასებ, რომ Balenciaga-მ კამპანია ჩახსნა და ბოდიში მოიხადა. საჭიროა ზომების გატარება, რომ ეს აღარასოდეს მოხდეს“, - დაწერა კიმ კარდაშიანმა.

  • რა ელის Balenciaga-ს?

Balenciaga-მ ოფიციალურ განცხადებაში განაცხადა, რომ ბრენდი ითანამშრომლებს ბავშვთა დაცვის ორგანიზაციებთან. ეს არ არის პირველი შემთხვევა, როდესაც ფრანგული ბრენდი ყურადღების ცენტრში მოექცა. Balenciaga ყოველთვის ითვლებოდა პროვოკაციულ მოდის სახლად. 2015 წელს ბრენდში დემნა გვასალიას მოსვლასთან ერთად, მსგავსი პროვოკაციები გახშირდა...

ჯერ კიდევ ძნელი სათქმელია, რა იქნება რეალური შედეგები. ბლოგერები სოციალურ ქსელებში წვავენ ბრენდის ნივთებს. მოდელებმა ბელა ჰადიდმა და იზაბელ ჰუპერტმა სოციალურ ქსელებში წაშალეს პოსტები Garde-Robe კამპანიის ფოტოებით. Business of Fashion დემნა გვასალიას წელს ჯილდოს აღარ გადასცემს მოდის ინდუსტრიაში შეტანილი წვლილისთვის...

უარეს შემთხვევაში, კერინგის კონგლომერატმა, რომელშიც შედის Balenciaga, შეიძლება გაათავისუფლოს კრეატიული დირექტორი. მაგრამ ეს სცენარი ნაკლებად სავარაუდოა, თუ გავითვალისწინებთ ალესანდრო მიკელეს ბოლოდროინდელ წასვლას Gucci-დან...

  • ვინ არის ლოტა ვოლკოვა?

კიდევ ერთი სახელი და გვარი, რომელიც "ბალენსიაგას" გარშემო არსებულ სკანდალთან ასოცირდება, რუსი წარმოშობის სტილისტი ლოტა ვოლკოვაა, რომელსაც დემნა გვასალიას მარჯვენა ხელს ეძახიან... ვოლკოვა ბრენდის ერთ-ერთი მთავარი თანამშრომელია.

ვინ არის ქალი, ზუსტად არაა ცნობილი. ზოგიერთი წყაროს თანახმად, იგი დაიბადა 1984 წელს ნოვოსიბირსკში ან - 1983 წელს ვლადივოსტოკში. ერთი სიტყვით, ვოლკოვას პერსონა საიდუმლოებით არის მოცული... მაგრამ დანამდვილებით ცნობილია, რომ მისი მამა იყო მეზღვაური, ბევრს მოგზაურობდა და ქალიშვილთვის სხვადასხვა ქვეყნებიდან ხშირად ჩამოჰქონდა საჩუქრები. 17 წლის ასაკში ლონდონში გაემგზავრა დიზაინისა და ხელოვნების შესასწავლად, 2004 წელს კი საკუთარი ბრენდი Lotta Skeletrix გამოუშვა. 2007 წელს გადავიდა პარიზში, სადაც გადამზადდა სტილისტად, გაიცნო დემნა გვასალია და ყველაფერი ასე დაიწყო...

დემნასთან შეხვედრის შემდეგ, დაიწყო თანამშრომლობა ბრენდებთან Vetements-თან და Balenciaga-სთან. ვოლკოვამ მონაწილეობა მიიღო Adidas-ის ბრენდის კამპანიებში 2018 და 2019 წლებში.

  • რატომ ადანაშაულებენ ლოტა ვოლკოვას Balenciaga-ს სკანდალურ ფოტოსესიაში? - სოციალურ ქსელში ლოტა ვოლკოვას "ინსტაგრამზე" პოსტების ნახვის შემდეგ, ეჭვობდნენ, რომ სწორედ სტილისტი იყო Balenciaga-ს წინასაშობაო ფოტოსესიის იდეოლოგიური ინსპირატორი. მის ანგარიშში არის პენტაგრამების სურათები, ბავშვების შემაშფოთებელი სურათები, სათამაშოები და წითელი ლაქები, რომლებიც სისხლს ჰგავს.

ვოლკოვას "სატანისტური სტილისტი" უწოდეს ინსტაგრამის კონტენტის გამო, რომელიც მოიცავდა ძალადობის სცენებს და სატანისტურ სურათებს. ბრალდებების გავრცელების შემდეგ კი ქალმა სოციალური ქსელები დახურა.

ვოლკოვას წარმომადგენელმა Newsweek-თან განაცხადა, რომ ”ის გმობს ბავშვების შეურაცხყოფას ნებისმიერი ფორმით” და დასძინა, რომ ”არ უმუშავია Balenciaga-სთან და მის გუნდთან 2017 წლის შემდეგ და არ მიუღია მონაწილეობა ბრენდის ბოლო სარეკლამო კამპანიებში...