"ცხოვრება უცნაურია, მაგრამ სამართლიანი. დღეს მიშას სასამართლოა, ისეთი გაუბედურებულია, შენ შეგეცოდებოდა… გილოცავ, დაბადების დღეს, ზურა" - რას წერს ხათუნა ხოფერია?

დღეს ყოფილი პრემიერის, ზურაბ ჟვანიას დაბადების დღეა. ის 59 წლის გახდებოდა. პოლიტიკოსი, ყოფილი პარლამენტარი ხათუნა ხოფერია სოციალურ ქსელში გარდაცვლილ მეგობარს იუბილეს ულოცავს.

"დაბადების დღეს გილოცავ, ზურა! ვბერდებით…. შენ ისევ 41 წლის ხარ. ორი მოწვევის პარლამენტის თავმჯდომარე, საქართველოს პრემიერ- მინისტრი. პირველი “ მწვანეთა” ლიდერი! იცი რა თქვა შენზე უწმინდესმა? - ზურაბ ჟვანია გამოირჩეოდა თავისი ინტელექტით, მაგრამ ამავე დროს, დიდი რწმენით! ის იყო მუდამ პირველი, პირველი სიკეთეში, სიკეთის კეთებაში”. ჰო, ნამდვილად ასეთი იყავი… არა, ხარ!..ცხოვრება უცნაურია, ძალზედ რთული, მაგრამ სამართლიანი! დღეს მიშას სასამართლოა… ისეთი გაუბედურებული და ღირსებააყრილია, შენ შეგეცოდებოდა… ჰო, შეგეცოდებოდა… არ ვიცი რად უღირდა ასეთი სიცოცხლე?!.. ან შენი სიკვდილი რად უღირდა?!…ცხოვრება ყველაფერს ალაგებს. ყველა მადლს, ქვაზე დადებულსაც კი, მადლის გამცემს უბრუნებს. ყველა ბოროტებას, ბოროტების ჩამდენს დაატეხს თავს. წლები მიდის და შენი მკვლელობისთვის საერთოდ აღარ ვიცლით. ბედს მივენდეთ… გვაპატიე!… უბრალოდ, ეს საშინელი მონატრების გრძნობა და შენი შეუცვლელობა როგორც ჭკუის დამრიგებლის და ლიდერის, სულ უფრო მტკივნეული ხდება!გილოცავ, დაბადების დღეს! შენ ისევ 41 წლის გახდი!მადლობა, რომ იყავი! მადლობა, რომ ხარ! მადლობა, რომ ყოველთვის იქნები!" - წერს ხოფერია "ფეისბუქში".

შეგახსენებთ, საქართველოს ყოფილი პრეზიდენტის, მიხეილ სააკაშვილისთვის სასჯელის გადავადებაზე სასამართლო დღეს იმსჯელებს.

სხდომა თბილისის საქალაქო სასამართლოში 13:00 საათზეა დანიშნული.

მიხეილ სააკაშვილისთვის სასჯელის გადადებასთან დაკავშირებით ადვოკატების შუამდგომლობაზე მოსამართლე გიორგი არევაძე განიხილავს.

პარალელურად, საქალაქო სასამართლოსთან შეკრებას და აქციას გეგმავენ მიხეილ სააკაშვილის მხარდამჭერები და პოლიტიკოსები.