დიმიტრი როგოზინი აღმოსავლეთ უკრაინაში, საკუთარ დაბადების დღეზე მოლხენისას დაიჭრა - რა წერს რუსული და უკრაინული მედია?
რუსეთის კოსმოსური სააგენტოს ყოფილი დირექტორი, ცნობილი რუსი პოლიტიკოსი და პროპაგანდისტი დიმიტრი როგოზინი აღმოსავლეთ უკრაინაში დაბომბვის შედეგად დაიჭრა, - ინფორმაციას რუსული მედია ავრცელებს.
"როსკომოსის“ ყოფილი ხელმძღვანელი, რომელიც ახლა ხელმძღვანელობს რუსი სამხედრო მოხალისეების გუნდს დონბასის რეგიონში, საავადმყოფოში გადაიყვანეს მას შემდეგ, რაც დონეცკში, სასტუმრო, სადაც ის იმყოფებოდა, დაბომბეს", - ვკითხულობთ რუსულ გამოცემებში.
გავრცელებული ინფორმაციით, მის სიცოცხლეს საფრთხე არ ემუქრება.
"ზურგში დავიჭერი, ვიცოცხლებ. ნამსხვრევი სანტიმეტრით ასცდა ხერხემალს", - განუცხადა როგოზინმა ერთ-ერთ რუსულ გამოცემას.
უკრაინული გამოცემა "უნიანი" წერს, რომ როგოზინი დაბადების დღეს დონეცკის ოლქში მდებარე სასტუმრო "შეშ-ბეშის" რესტორანში აღნიშნავდა, რა დროსაც მოხდა დაბომბვა. რესტორანში მოლხენისას ასევე დაიჭრა თვითგამოცხადებული დონეცკის სახალხო რესპუბლიკის ე.წ. მთავრობის წარმომადგენელი ვიტალი ხოცენკო, მისი დაცვის წევრი კი გარდაიცვალა.