"თავდამსხმელი საცხოვრებელ სახლთან ჩაუსაფრდა და ცეცხლსასროლი იარაღიდან ესროლა" - რა ხდება ცნობილი ჯავის ქუჩაზე მომხდარ მკვლელობაზე და ვინ არის მოკლული?
მკვლელობა მოხდა თბილისში, ჯავის ქუჩაზე, რომლის გამოძიება შინაგან საქმეთა სამინისტრომ, სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს. მოკლულია 45-წლამდე მამაკაცი.
ამის შესახებ "ინტერპრესნიუსს“ შსს-ში განუცხადეს.
გავრცელებული ცნობით, განზრახ მკვლელობაში ბრალდებული პირი დადგენილია და მიმდინარეობს შესაბამისი მოქმედებები.
ამასთანავე, არსებული ინფორმაციით, ახალგაზრდა მამაკაცი, რომელსაც ჯავის ქუჩაზე ესროლეს, წარსულში, სხვადასხვა მძიმე დანაშაულზე მრავალჯერ იყო ნასამართლევი.
ასევე, არსებული ინფორმაციით, მრავალჯერაა ნასამართლევი ის პირიც, რომელმაც ახალგაზრდა მამაკაცს ცეცხლსასროლი იარაღიდან ესროლა.
გარდაცვლილის ახლობლის თქმით, "თავდამსხმელი საცხოვრებელ სახლთან ჩაუსაფრდა და ცეცხლსასროლი იარაღიდან ესროლა".
ჩვენი ინფორმაციით, მოკლული ბონდო კისიევია.
ცნობისთვის, "ნაციონალური მოძრაობის“ დეპუტატის საკრებულოში, მამუკა გუგეშაშვილის ინფორმაციით, რამდენიმე წუთის წინ, ჯავის ქუჩაზე ახალგაზრდა მამაკაცი მოკლეს. შესაბამისი განცხადება მან თბილისის საკრებულოს სხდომაზე გააკეთა.