მექსიკაში, ნარკობარონ "ელ ჩაპოს“ შვილის დაკავება დიდ სისხლიან დაპირისპირებად იქცა - 29 დაღუპული, გადამწვარი ათობით მანქანა და ორი თვითმფრინავი

დააკავეს მექსიკელი ნარკობარონის, "ელ ჩაპოს“ შვილი, 32 წლის ოვიდიო გუზმან-ლოპესი. დაკავების ოპერაცია უკიდურესად რთული და სისხლიანი იყო და როგორც მექსიკის მედია წერს, ამ დროისთვის არსებული ინფორმაციით, სულ მცირე, 29 ადამიანი დაიღუპა.

ოვიდიო ლოპესი, მეტსახელად "თაგვი", არსებული იფორმაციით, მამის საქმიანობას აგრძელებდა და ის მსოფლიოში ერთ-ერთ უმსხვილეს ნარკოკარტელს, "სინალოას“ ხელმძღვანელობდა. ის ქალაქ კულიაკანში დააკავეს, რის შემდეგაც მეხიკოში გადაიყვანეს. აღსანიშნავია, რომ ლოპესის ექსტრადირებას მოითხოვს ამერიკის შეერთებული შტატები და ამერიკას 5-მილიოანიანი ჯილდო ჰქონდა დაწესებული მისთვის, ვინც ოვიდიოს ადგილსამყოფელის შესახებ ინფორმაციას მიაწვდიდა.

ამ დროისთვის არსებული ინფორმაციით, მექსიკის სასამართლომ მისი აშშ-ში ექსტრადირების პროცესი ერთი დღით შეაჩერა, თუმცა მედიისთვის მიზეზები უცნობია.

ოვიდიო გუზმანის დაკავებას მისი ბანდის წევრებსა და სამართალდამცველებს შორის შეტაკებები მოჰყვა. ხელისუფლებამ სამხედროები გამოიყვანა. მედიის ცნობით, დაღუპულთა შორის 10 სამხედრო პირი, ხოლო დანარჩენები ნარკოკარტელის წევრები არიან.

როგორც BBC-ი წერს, ბანდის განრისხებულმა წევრებმა გზები ჩახერგეს, დაწვეს ათობით მანქანა, თავს დაესხნენ თვითმფირნავებს ადგილობრივ აეროპორტში. დაიჭრა 35 სამხედრო მოსამსახურე. მექსიკის თავდაცვის მინისტრის, ლუის სანდოვალის განცხადებით, დაკავებულია 21 შეიარაღებული პირი.

გუსმან-ლოპესის მამა, ხოაკინ "ელ ჩაპო“ გუსმანი სასჯელს აშშ-ის ციხეში იხდის და მას სამუდამო პატიმრობა აქვს მისჯილი. 2019 წელს სასამართლომ ის დამნაშავედ მიიჩნია ნარკოტიკებით ვაჭრობისა და ფულის გათეთრების საქმეში. გამოძიების დრო გამოვლინდა ზოგიერთი სასტიკი დეტალი იმის შესახებ, თუ როგორ მოქმედებენ მექსიკის ნარკოკარტელები.

• "ელ ჩაპოს" შვილის დაკავების შემდეგ მისი ბანდის წევრებმა ათობით მანქანა დაწვეს და ასევე დამწვარია სულ მცირე, ორი თვითმფრინავი გაუქმდა 100-ზე მეტი ავიარეისი. თავდაცვის მინისტრმა სანდოვალმა განაცხადა, რომ მექსიკის საჰაერო ძალების ორი თვითმფრინავი იძულებული გახდა, ავარიულად დაშვებულიყო, მას შემდეგ რაც ისინი კარტელის წევრების სროლაში მოყვნენ.

ოპერაციის წარმატებით დასასრულებლად ხელისუფლებამ ვერტმფრენები გამოიყვანა. მექსიკის პრეზიდენტმა ანდრეს ლოპეს ობრადორმა თქვა, რომ მექსიკის ძალები პასუხისმგებლობით მოქმედებდნენ მშვიდობიან მოსახლეობაში მსხვერპლის თავიდან არასარიდებლად და ამ დროისთვის არ ვრცელდება ინფორმაცია მშვიდობიანი მოსახლეობის დაღუპვის შესახებ.

ხელისუფლება, უსაფრთხოების გამო, რამდენიმე დღის განმავლობაში მოსახლეობას სახლში დარჩენისკენ მოუწოდებს