ელვის პრესლის ერთადერთი შვილი, ლიზა მარია 54 წლის ასაკში გარდაიცვალა - სავარაუდო მიზეზად გულის შეტევა სახელდება: სხვა დეტალები ჯერ არ ხმაურდება
ლიზა მარია პრესლი, როკ-ენ-როლის ლეგენდა ელვის პრესლის ერთადერთი შვილი, 54 წლის ასაკში გარდაიცვალა. ინფორმაციას ლიზას დედა, პრისცილა პრესლი ავრცელებს.
"დამძიმებული გულით უნდა გაგიზიაროთ გამანადგურებელი ამბავი, რომ ჩემმა მშვენიერმა ქალიშვილმა, ლიზა მარიამ დაგვტოვა", - ამბობს პრისცილა პრესლი. მედიის ცნობით, ლეგენდარული მომღერლის შვილი უგონო მდგომარეობაში იპოვეს საკუთარ სახლში, კალიფორნიაში. გავრცელებული ინფორმაციით, ლიზა მარია გულის შეტევის შემდეგ გადაიყვანეს კლინიკაში.
1968 წელს დაბადებული ლიზა მარია მამის კვალს გაჰყვა და თვითონაც მომღერალი გახდა.
"ის იყო ყველაზე ემოციური, ძლიერი და მოსიყვარულე ქალი, რომელიც ოდესმე მინახავს",- ნათქვამია პრისცილას განცხადებაში. გარდაცვალების შესაძლო მიზეზების დეტალები ლიზას დედას არ გაუმხელია.
ვარსკვლავმა, გარდაცვალებამდე, სულ სამი ალბომი გამოუშვა. მისი 2003 წელს გამოსული სადებიუტო ალბომის ასი ათასობით ეგზემპლარი გაიყიდა და კრიტიკოსებისგან პოზიტიური შეფასებები მიიღო. მომღერალი ასევე ცნობილი იყო პოპ ლეგენდა მაიკლ ჯექსონთან, მსახიობ ნიკოლას ქეიჯთან და მუსიკოს დენი კიუსა და მაიკლ ლოკვუდთან გახმაურებული ქორწინებების სერიით. მას 4 შვილი ჰყავს. ლიზა მარია უკანასკნელად "ოქროს გლობუსის" დაჯილდოებაზე იხილა მაყურებელმა, მას დედაც თან ახლდა.
წყარო: bbc
მოამზადა: ანა სიბოშვილმა