ავტორი:

სააკაშვილის შთამბეჭდავი უძრავი ქონება უკრაინაში და სოლიდურ ფასად ნაქირავები პენტჰაუსი კიევში - რას წერდა უკრაინული მედია ექსპრეზიდენტის სახლებსა და იასკოს ორსულობაზე?

სააკაშვილის შთამბეჭდავი უძრავი ქონება უკრაინაში და სოლიდურ ფასად ნაქირავები პენტჰაუსი კიევში - რას წერდა უკრაინული მედია ექსპრეზიდენტის სახლებსა და იასკოს ორსულობაზე?

17 იანვარს ტელეკომპანია "იმედმა“ გაავრცელა ინფორმაცია, რომ მიხეილ სააკაშვილის ნოტარიული თანხმობით, გიული ალასანიამ, სააკაშვილისა და ლიზა იასკოს შვილს, ჟასმინ იასკოს კიევის ცენტრში (კუდრიავსკას ქუჩაზე) მდებარე ძვირადღირებული ბინა და თანხა 27 ათასი დოლარის ოდენობით გადაუფორმა. ინფორმაცია გიული ალასანიას არ დაუდასტურებია.

ლიზა იასკოს ორსულობა

ინფორმაცია ლიზა იასკოს ორსულობის შესახებ ჯერ კიდევ რამდენიმე თვის წინ გავრცელდა. 2022 წლის 2 თებერვალს გამოქვეყნებულ სტატიაში წერდნენ, რომ ლიზა ორსულად იყო მიხეილისგან, მაგრამ ქალს ფოტოებზე მუცელი ჯერჯერობით არ ეტყობოდა. უკრაინული მედია ასევე წერდა, რომ ელიზაბედ იასკო დაკავებულ სააკაშვილს მხარს უჭერდა, მაგრამ მას შემდეგ რაც გაირკვა, რომ სააკაშვილს ქართველი მომღერლის სოფო ნიჟარაძისგან ქალიშვილი ჰყავს, სავარაუდოდ, იასკო ძალიან განაწყენებული იყო. მედია იასკოს კიევში იტალიურ რესტორანში შეხვდა და კითხვები დაუსვა.

"მე არ ვარ ის ადამიანი, ვინც უნდა გააკეთოს კომენტარი მსგავს თემაზე. მე და მიხეილი სამოქალაქო ქორწინებაში ვართ. ჩვენ გვაქვს ჩვენი ოჯახური გეგმები. სხვა ყველაფერი, თუ იყო, მის წარსულში იყო და მე საერთოდ არ მაინტერესებს, აბსოლუტურად არ მაინტერესებს ინფორმაცია მიშას მრავალრიცხოვანი სიყვარულის ისტორიის შესახებ. თუ ვინმე დაინტერესებულია სააკაშვილის პოლიტიკური სიტუაციიდან ყურადღების გადატანით, ამას წარმატებით აკეთებს. ჩემთვის მთავარია მისი სიცოცხლე და თავისუფლება და სხვა ყველაფერი ჭორია", - ამბობდა იასკო.

მანამდე 2022 წლის 2 იანვარს, უკრაინულ მედიაში გამოქვეყნდა კიდევ ერთი სტატია წყვილის შესახებ, მას შემდეგ, რაც ახალი წლის ღამეს, მიხეილ სააკაშვილმა ელის მარიას შესახებ პოსტი პირველად გამოაქვეყნა.

მაშინ მედია წერდა, გასულ ზაფხულს "სტრანამ" გადაიღო ფოტო, სადაც აღბეჭდილია "იდუმალი ქალი", რომელიც მიხეილ სააკაშვილის ოდესის აპარტამენტებში გამოჩნდა. შეგახსენებთ, რომ სააკაშვილს აქვს პენტჰაუსი ელიტარულ ცათამბჯენში, რომელიც შავ ზღვას გადაჰყურებს. აპარტამენტების სამზარეულოში მოხდენილი, შავგვრემანი ქალი ტრიალებდა, როგორც ჩანს, საუზმის შემდეგ მაგიდას ალაგებდა.

"ასევე სახლში იყო მუქ ხალათში გამოწყობილი მამაკაცი, რომელიც ფიზიკურად ძალიან ჰგავდა სააკაშვილს. მიხეილის სამზარეულოში მყოფი გოგონა ძალიან ჰგავს ქართველ მომღერალს. მართლაც, სოფოს სურათებით თუ ვიმსჯელებთ, ამ ზაფხულს ის და მისი ქალიშვილი ოდესაში ისვენებდნენ, პარკებსა და რესტორნებში სეირნობდნენ და სანაპიროზეც იყვნენ. გაითვალისწინეთ, რომ იმ დროს სააკაშვილს უკვე ჰქონდა ურთიერთობა ლიზა იასკოსთან. ჩვენი წყაროს ინფორმაციით, მიშა და ლიზა წელიწადნახევარი-ორი წელია ერთად არიან" - წერია "სტრანას" მიერ გამოქვეყნებულ სტატიაში.

რა ქონება აქვს მიხეილ სააკაშვილს უკრაინაში?

2016 წლის 30 ოქტომბერს interfax-ი მაშინდელი ოდესის რეგიონული სახელმწიფო ადმინისტრაციის ხელმძღვანელის, საქართველოს ექს-პრეზიდენტის მიხეილ სააკაშვილის ქონების შესახებ წერდა. სტატიის მიხედვით, სააკაშვილი საქართველოში ფლობს მიწის ორ ნაკვეთს, ერთი 6820 კვადრატული მეტრი ფართობით და მეორე 500 კვადრატული მეტრი ფართობით. ასევე მის სახელზეა თბილისში არსებული კორპუსის ბინა, რომლის ფართობი 97 კვ.მ-ია.

უკრაინაში არსებული უძრავი ქონებიდან სააკაშვილმა დეკლარაციაში შეიტანა მხოლოდ ოდესის ბინა, რომელიც 54 კვ.მ ფართობის არის. სხვა ძვირფას მოძრავ ქონებასთან ერთად დეკლარაციაში მოხვდა Rolex Deepsea და Hublot კლასიკური საათები. მაღალჩინოსანს მანქანა არ ჰყავს.

დეკლარაციის მიხედვით, 2015 წელს მისმა შემოსავალმა 38 601 გრივნა შეადგინა.

ოდესის პენტჰაუსზე მაშინ უკრაინული მედია აქტიურად წერდა, რასაც თავად მიხეილ სააკაშვილიც გამოეხმაურა.

სააკაშვილი უკრაინაში ცხოვრების ბოლო წლებში კიევიდან 23 კილომეტრში, ელიტურ სოფელ ლესნიკში ცხოვრობდა. სოფელს სახელი ტყესთან სიახლოვის გამო აქვს და სწორედ ამ ღირსების გამო ეს ადგილი სულ უფრო პოპულარული ხდება. აქ ცხოვრობენ უკრაინელი პოლიტიკოსები, ბიზნესმენები, შოუ-ბიზნესის წარმომადგენლები.

სააკაშვილი ყველა ინტერვიუში ამბობდა, რომ სახლი მას დედამ, გიული ალასანიამ აუშენა.

ოფიციალურ დოკუმენტებშიც ჩანს, რომ გიული ალასანიამ აქ მიწა 2017 წელს შეიძინა და ჯერ კიდევ მშენებლობის დაწყებამდე ერთი პატარა შენობის და მიწის ფასი უკვე თითქმის ნახევარი მილიონი დოლარი იყო.

„კიევის გარეუბანში, სახლში ვარ. ამ სოფელს ქვია მეტყევეები, “ლესნიკები”. მე სოფლის ნაწილში ვცხოვრობ, ჩვეულებრივი სოფელია, თავისი მამლებით, ძაღლების გაბმული ყეფით, სოფლის გარემოთი და ორღობეებით, მაგრამ კიევთან არის ძალიან ახლოს“, – ამბობდა მაშინ მიხეილი.

ნაქირავები ძვირადღირებული ბინა კიევში

კიევის ცენტრში არსებული ეს ბინა სააკაშვილის არცერთ დეკლარაციაში არ ფიქსირდება. როგორც უკრაინულ საიტ bykvu.com-ზე 2017 წელს გამოქვეყნებულ სტატიაშია ნათქვამი, „ოდესის ოლქის ყოფილმა გუბერნატორმა მიხეილ სააკაშვილმა ბინა კიევის ცენტრალურ ქუჩაზე თვეში 6 ათას დოლარად იქირავა".

2 სართულისგან შემდგარი მდიდრული პენტჰაუსი 252 კვ.მ-ია. ბინა მდებარეობს კოსტელნაიას ქუჩაზე, 37-ში, სადაც სამართალდამცავებმა პოლიტიკოსი დილით დააკავეს (სწორედ ამ პენტჰაუსის სახურავზე დააკავეს 2017 წელს უკრაინელმა სამართალდამცავებმა).

ბინას აქვს საკუთარი გათბობის და კონდიცირების სისტემა. პენტჰაუსში სულ ხუთი ოთახია, ისინი ეგვიპტურ სტილშია გაფორმებული. ბინას აქვს პანორამული ფანჯრები, რომელიც გადაჰყურებს მიხაილოვსკის ტაძარს, ასევე არის სამი სველი წერტილი.

"რემონტი გაკეთებულია ეგვიპტურ სტილში. პენტჰაუსი შედგება მდიდრული ტერასისგან მიხაილოვსკის ტაძრის პანორამული ხედით, სამზარეულო-სტუდია, ოფისი და რამდენიმე საძინებელი. ასევე, ბინა აღჭურვილია ელეგანტური 3 სველი წერტილით“, - ნათქვამია ქონების ვებგვერდზე.

ვინ შეიძინა ბინა, რომელსაც სააკაშვილი წლები ქირაობდა და საერთოდ, რა ბედი ეწია ამ ბინას, უცნობია... თუმცა, ეს არის ერთადერთი ბინა, რომელიც ოფიციალურად მის სახელს კიევში უკავშირდება...

ლიზა იასკოს დუმილი

გავრცელებული ინფორმაცია, რომ ლიზა იასკოსა და მიხეილ სააკაშვილს საერთო შვილი, ჟასმინი ჰყავთ, ამ დრომდე არ დაუდასტურებიათ თავად სააკაშვილს და ლიზა იასკოს. რადას დეპუტატი ამჯერად, შვეიცარიაში, დავოსის ეკონომიკურ ფორუმზე იმყოფება, საიდანაც ორი დღის განმავლობაში ფოტოებს აქვეყნებს.