ცნობილია კალიფორნიელი თავდამსხმელის ვინაობა - ვინ იყო ჰუ კან ტრანი და რა აკავშირებდა ცეკვის სტუდიასთან, სადაც ცეცხლი გახსნა?
აშშ-ში, კალიფორნიის ქალაქ მონტერეის პარკში, რომელიც ლოს-ანჯელესიდან აღმოსავლეთით, დაახლოებით 11 კმ-ში მდებარეობს, მასობრივი სროლის შედეგად 10 ადამიანი დაიღუპა, 10 კი - დაშავდა.
ხელისუფლების განცხადებით, 72 წლის მამაკაცი, რომელმაც ჩინური ახალი წლის აღსანიშნავი ფესტივალის მახლობლად მდებარე ცეკვის სტუდიაში ცეცხლი გახსნა, გარდაცვლილია. მოგვიანებით, ის ალჰამბრას მახლობლად მდებარე მეორე ცეკვის სტუდიაშიც შეიჭრა, სადაც მას ადამიანების ჯგუფი დაუპირისპირდა და განაიარაღეს. მან თავდასხმიდან მალევე, საკუთარ ფურგონში მოიკლა თავი. პოლიციამ მანქანაში რამდენიმე მტკიცებულება იპოვა, რომელიც ჰუ კან ტრანს ცეკვის ორივე სტუდიასთან აკავშირებდა.
ეჭვმიტანილი ჩინეთიდან გადმოსახლებული ემიგრანტია და პერიოდულად სატვირთო მანქანის მძღოლად მუშაობდა. პოლიციის შერიფმა თავდამსხმელის ფოტოც გაავრცელა.
პოლიცია მკვლელის მოტივის გარკვევას ცდილობს. 72 წლის მამაკაცის ნაცნობების თქმით, ის რეგულარულად სტუმრობდა მონტერეის სამეჯლისო ცეკვის სტუდიას. მათგან სამი CNN-ს ესაუბრა და განაცხადეს, რომ ის საცეკვაო სტუდიას აფინანსებდა კიდეც და ცეკვის არაფორმალურ გაკვეთილებსაც ატარებდა. ერთ-ერთი მეგობრის თქმით, ტრანი ყოფილ მეუღლესაც სწორედ სტუდიაში შეხვდა.
გამოცემა ჰუ კან ტრანის ყოფილ მეუღლესაც გაესაუბრა. მამაკაცი მას 2005 წელს გაშორდა. ქალის თქმით, ტრანს მასზე არასდროს უძალადია, მაგრამ ფეთქებადი ბუნების იყო და წვრილმანებზე ცეცხლდებოდა. ტრანის ნაცნობის თქმით, მამაკაცი ცეკვის სტუდიას თითქმის ყოველდღე სტუმრობდა. მათი ნაცნობობის პერიოდში (2000-2010 წლებში), მეგობრის თქმით, ტრანი ხშირად გამოხატავდა გაღიზიანებას ცეკვის ინსტრუქტორებთან დაკავშირებით, რადგან მისი თქმით, მათ თითქოს არ მოსწონდათ ტრანი და ცუდად ლაპარაკობდნენ მასზე.
წყარო: cnn
მოამზადა: ანა სიბოშვილმა