ავტორი:

მილიარდერ კოლომოისკის სახლის ჩხრეკის პარალელურად, შსს-ს ყოფილი მინისტრის ავაკოვის სახლიც გაჩხრიკეს - კორუფციული სკანდალები და დიდი წმენდა უკრაინაში

მილიარდერ კოლომოისკის სახლის ჩხრეკის პარალელურად,  შსს-ს ყოფილი მინისტრის ავაკოვის სახლიც გაჩხრიკეს - კორუფციული სკანდალები და დიდი წმენდა უკრაინაში

უკრაინაში, ერთ დროს პრეზიდენტ ზელენსკისთან დაახლოებული ბიზნესმენებისა და ყოფილი სახელმწიფო მოხელეების სახლების ჩხრეკა მიმდინარეობს. 1-ლ თებერვალს ოლიგარქ იგორ კოლომოისკის სახლის ჩხრეკის პარალელურად ყოფილი შინაგან საქმეთა მინისტრის, არსენ ავაკოვის სახლიც გაჩხრიკეს.

ავაკოვის ბინის ჩხრეკისას, გამომძიებლები დაინტერესდნენ ფრანგული წარმოების Airbus ვერტმფრენების შეძენის შესახებ ინფორმაციით. შეგახსენებთ, რომ იანვარში ამ ტიპის ვერტმფრენის ჩამოვარდნის შედეგად 14 ადამიანი დაიღუპა, მათ შორის უკრაინის შსს მინისტრი.

მომხდარს ავაკოვი სოციალურ ქსელში გამოეხმაურა და ერთგვარი განმარტება გააკეთა, მისი თქმით, საინტერესო ვერაფერი აღმოაჩინეს. აღსანიშნავია, რომ უკრაინაში მოღვაწეობის დროს საქართველოს ექსპრეზიდენტი მიხეილ სააკაშვილი ავაკოვს არაერთხელ დაუპირისპირდა და კორუფციაში ამხილა.

"გამომძიებლები დაინტერესდნენ შინაგან საქმეთა სამინისტროს მიერ შვეულმფრენ Super Puma-ს (Airbus Helicopters H225) შესყიდვასთან დაკავშირებული კონტრაქტებით. ისინი კორექტულად იქცეოდნენ, მაგრამ ასეთი საგამოძიებო მოქმედების მიზანშეწონილობა ცოტა სულელურად გამოიყურება, კონტრაქტის დადებიდან 6 წლის შემდეგ. მათ საინტერესო ვერაფერი იპოვეს“, - წერს ავაკოვი.

არსენ ავაკოვი უკრაინის შინაგან საქმეთა სამინისტროს ხელმძღვანელობდა 2014 წლიდან 2021 წლამდე, რის შემდეგაც დენის მონასტირსკიმ შეცვალა, რომელიც 18 იანვარს, ქალაქ ბროვარში (კიევის რეგიონი) Airbus H225 Super Puma ვერტმფრენის ჩამოვარდნის შედეგად გარდაიცვალა. კატასტროფის მიზეზები ჯერ დადგენილი არ არის.

უკრაინაში მომხდარ ინციდენტამდე ამ ტიპის ვერტმფრენს კიდევ ერთი გახმაურებული ავიაკატასტროფა უკავშირდება. 2016 წელს ნორვეგიის სანაპიროსთან H225LP ჩამოვარდა, რომელშიც ორი პილოტი და 11 მგზავრი იმყოფებოდა. არცერთი მათგანი არ გადარჩენილა. შემდგომ გაირკვა, რომ ვერტმფრენის გადაცემათა კოლოფში არსებული მექანიზმი დაზიანებული იყო.

გამოძიების პერიოდში ამ ვერტმფრენებით ფრენა დროებით აიკრძალა, ცვლილებები განხორციელდა ამ მექანიზმის დიზაინში, მიიღეს ახალი სტანდარტები შემოწმებისა და მუშაობის რეჟიმებისთვის, რის შემდეგაც რამდენიმე ქვეყანამ მაინც დაიტოვა ეს მოდელები.

2018 წელს საფრანგეთმა და უკრაინამ შეთანხმება გააფორმეს 552 მილიონ ევროს ღირებულების ორმოცდაათზე მეტი ვერტმფრენის შესაძენად. ამ დროს ავაკოვი შინაგან საქმეთა მინისტრი იყო.

ბროვარში ჩამოვარდნილი ვერტმფრენი უკრაინამ 2020 წელს მიიღო. ავარიის შემდეგ, ზოგიერთი ჟურნალისტი ვარაუდობდა, რომ ვერტმფრენებს შესაძლოა, ტექნიკური დეფექტი ჰქონოდათ.

უკრაინის უშიშროების სამსახური ტრაგედიის სამ ძირითად ვერსიას განიხილავს: ფრენის წესების დარღვევას (პილოტის შეცდომა), ვერტმფრენის ტექნიკურ გაუმართაობას და დივერსიას.

შეგახსენებთ, რომ გუშინ უკრაინის სახელმწიფო უშიშროების სამსახურისა და ეკონომიკური უსაფრთხოების ბიუროს აგენტებმა მილიარდერ იგორ კოლომოისკის სახლიც გაჩხრიკეს. გავრცელებული ინფორმაციით, ჩხრეკა უკავშირდება შესაძლო მაქინაციებს კომპანიებში Ukrnafta და Ukrtatnafta, რის თაობაზეც საქმეა აღძრული. "ლაპარაკია დიდი ოდენობის ნავთობპროდუქტების გაფლანგვასა და გადასახადებისთვის თავის არიდებაზე", - წერს "უკრაინსკაია პრავდა". როგორც ირკვევა, აქ იგულისხმება 40 მილიარდი გრივნის (76 მილიარდი რუსული რუბლის) ღირებულების ნავთობპროდუქტების ფუჭად ხარჯვა და საბაჟოზე გადასახადებისთვის თავის არიდება.

Ukrnafta აწარმოებს ნავთობის 90%-ს უკრაინაში და არის ბენზინგასამართი სადგურების ერთ-ერთი უმსხვილესი მფლობელი, Ukrtatnafta ფლობს ქვეყნის უდიდეს ნავთობგადამამუშავებელ ქარხანას, რომელიც მდებარეობს კრემენჩუგში (ის ომის დაწყებიდან მალევე დაიხურა დაბომბვის შედეგად დაზიანების გამო).

იგორ კოლომოისკი ადრე ორივე კომპანიის თანამფლობელი იყო, მაგრამ 2022 წლის ნოემბერში მათი ნაციონალიზაცია მოახდინა. მაშინ უკრაინის პრეზიდენტმა ვოლოდიმირ ზელენსკიმ ეს "თავდაცვის სექტორის გადაუდებელი საჭიროებების უზრუნველყოფის აუცილებლობით“ განმარტა. აღსანიშნავია, რომ ვოლოდიმირ ზელენსკი წლების წინ მიიჩნეოდა კოლომოისკის პროტეჟედ. როგორც ამბობდნენ, ის პრეზიდენტი სწორედ უკრაინელი ოლიგარქის მხარდაჭერით გახდა.

თავად იგორ კოლომოისკიმ Lb.ua-ს განუცხადა, რომ ომის დასრულებამდე არანაირ კომენტარსა და შეფასებას არ გააკეთებდა.

გუშინ, უკრაინის გენერალურმა პროკურატურამ ოფიციალურად წარუდგინა ბრალი უკრაინის ექსთავდაცვის მინისტრის მოადგილეს, ვიაჩესლავ შაპოვალოვს და თავდაცვის სამინისტროს სახელმწიფო შესყიდვების მთავარი დეპარტამენტის ყოფილ დირექტორს, ბოჰდან ხმელნიცკის, რომლებმაც თანამდებობა საკადრო წმენდის პირველი დიდი ტალღის დროს, მიმდინარე წლის 22-24 იანვარს დატოვეს.

23 იანვარს უკრაინის პარლამენტის ფრაქცია "ხალხის მსახურის“ თავმჯდომარე დავით არახამიამ განაცხადა, რომ ზოგიერთმა ჩინოსანმა "გონი დაკარგა და შიშის და სინდისის ქენჯნის გარეშე მოროდიორობს“.

"24 თებერვლიდან, ოფიციალური და არაოფიციალური არხებით ყველა დონის თანამდებობის პირებს მუდმივად აფრთხილებდნენ, რომ ფოკუსირება მოახდინონ ომზე, დაეხმარონ დაზარალებულებს, შეამცირონ ბიუროკრატია და შეწყვიტონ საეჭვო ბიზნესი. ამ გზავნილმა ზოგიერთამდე მიაღწია და ზოგამდეც, სამწუხაროდ, არა.

როგორც ჩანს, ზოგს ამ გაზაფხულზე აუცილებლად "ჩავსვამთ“, რადგან ადამიანურად არ ესმით, ეს მოხდება ომის კანონების თანახმად...“ - დააანონსა ზელენსკის გუნდის წევრმა.