"რბოლა იწყება" - Google-ის მთავარი კონკურენტი საძიებო სისტემა Bing-ის ახალი ვერსია იქნება, სადაც ხელოვნურ ინტელექტს გამოიყენებენ: რა შესაძლებლობები ექნება მას

Microsoft-ი საძიებო სისტემა Bing-ის ახალ ვერსიას ქმნის, სადაც ხელოვნურ ინტელექტს და ამ მიმართულებით არსებულ უახლეს მიღწევებს გამოიყენებს.

საძიებო სისტემა OpenAI-ის ChatGPT ტექნოლოგიას გამოიყენებს, რომელიც უკვე მთელ მსოფლიოშია პოპულარული.

ამ ნაბიჯით, Microsoft-ის Bing-ი, Google-ის საძიებო სისტემას, რომელიც ამჟამად დომინანტობს, ყველაზე დიდ კონკურენციას გაუწევს. "რბოლა დღეს იწყება", - თქვა Microsoft -ის ხელმძღვანელმა, სატია ნადელამ.

ChatGPT ღრმა შესწავლის ტექნიკას იყენებს, რათა ძიების მოთხოვნებზე ადამიანის მსგავსი პასუხები შეიმუშავოს.

ნადელას თქმით, ეს ონლაინ ძიების ხასიათსა და კომპიუტერულ პროგრამებთან ადამიანების ურთიერთობას შეცვლის. "ეს ტექნოლოგია თითქმის ყველა პროგრამული უზრუნველყოფის კატეგორიას შეცვლის, რომელიც ჩვენ ვიცით.", - თქვა ნადელამ.

Bing საძიებო შეკითხვებს ახლა უფრო დეტალური პასუხებით უპასუხებს - არა მხოლოდ ვებსაიტების ბმულებით. მომხმარებლებს ასევე შეეძლებათ ბოტს ესაუბრონ, რათა თავიანთი მოთხოვნები უკეთ მოარგონ ძიებას.

კომპანიის ცნობით, Bing-ის ახალი საძიებო სისტემა მოხმარებაში უახლოეს მომავალში ჩაეშვება. Bing-ის განახლების შესახებ განცხადება მას შემდეგ გაკეთდა, რაც Google-მა საკუთარი ახალი ჩათბოტის, Bard-ის შესახებ ახალ დეტალებზე განაცხადა.

Microsoft-ი სან-ფრანცისკოში დაფუძნებულ OpenAI-ის ღია მხარდამჭერია და მილიარდობით ინვესტიციას ახორციელებს ხელოვნურ ინტელექტში. გასულ თვეში კომპანიამ გამოაცხადა, რომ ის OpenAI-სთან მრავალწლიან თანამშრომლობას აპირებს.

წყარო: bbc

მოამზადა: ანა სიბოშვილმა