"ის საფრთხეს უქმნიდა სამოქალაქო ავიაციას" - ამერიკულმა გამანადგურებლებმა ჩრდილოეთ ამერიკის საჰაერო სივრცეში შეჭრილი მე-4 ამოუცნობი ობიექტი ჩამოაგდეს - რა ხდება აშშ-სა და კანადის თავზე?
აშშ-ს სამხედროებმა მიჩიგანში, ჰურონის ტბის თავზე, მიმდინარე თვის განმავლობაში მე-4 ამოუცნობი მფრინავი ობიექტი ჩამოაგდეს. ინფორმაცია შტატის გუბერნატორმა, გრეტჩენ უიტმერმა დაადასტურა.
"მოხარული ვარ გაცნობოთ, რომ ის სწრაფად და უსაფრთხოდ ჩამოვაგდეთ", - თქვა მან.
20 000 ფუტის სიმაღლეზე მფრინავი ამოუცნობი ობიექტი დაახასიათეს, როგორც "რვაკუთხა სტრუქტურა". აშშ-ის ცნობით, მისი განეიტრალება სამოქალაქო თვითმფრინავებისთვის შესაძლო საფრთხის შექმნის თავიდან ასაცილებლად მოხდა. პენტაგონმა განაცხადა, რომ ობიექტი აშშ-ს სამხედრო ობიექტებთან ახლოს ფრინავდა და საფრთხეს უქმნიდა სამოქალაქო ავიაციას, თანაც, მათივე ვარაუდით, ის პოტენციური სათვალთვალო ინსტრუმენტი იყო.
აშშ-ის საჰაერო ძალების გენერალმა განაცხადა, რომ ობიექტი, სავარაუდოდ, კანადის წყლებში უნდა ჩავარდნილიყო. ჯერჯერობით უცნობია, ვინ აკონტროლებდა მას, ან იყო თუ არა განკუთვნილი ჯაშუშური საქმიანობისთვის.
ამერიკულმა და კანადურმა თვითმფრინავებმა ამ თვეში უკვე მეოთხე ამოუცნობი მფრინავი ობიექტი ჩამოაგდეს.
- 4 თებერვალი: ამერიკელები აგდებენ, სავარაუდოდ, სადაზვერვო საჰაერო ბურთს სამხრეთ კაროლინის სანაპიროსთან. ამერიკელი ჩინოსნების თქმით, ის ეკუთვნოდა ჩინეთს, რამდენიმე დღის განმავლობაში დაფრინავდა აშშ-ის საჰაერო სივრცეში და უთვალთვალებდა ამერიკის სამხედრო-სტრატეგიულ ობიექტებს. ჩინეთმა განაცხადა, რომ ბუშტი მათი იყო და მხოლოდ და მხოლოდ ამინდის კვლევისთვის იყენებდნენ მას.
- 10 თებერვალი: აშშ აგდებს ამოუცნობ საფრენ ობიექტს ალასკის ჩრდილოეთ ნაწილში. როგორც ცნობილი ხდება, მას არ ჰქონდა რაიმე ტიპის ძრავა ან მართვის სისტემა.
- 11 თებერვალი: გამანადგურებელმა ჩამოაგდო ძალიან მაღალ სიმაღლეზე მფრინავი ობიექტი, რომელიც მდებარეობდა კანადის საჰაერო სივრცეში აშშ-ის საზღვრიდან 160 კილომეტრში. მას აღწერდნენ, როგორც ცილინდრის ფორმის და გაცილებით მცირე ზომის ობიექტს, ვიდრე ეს იყო მფრინავი ბურთი.
- 12 თებერვალი: ამერიკულმა გამანადგურებელმა ჩამოაგდო მე-4 ობიექტი გურონის ტბის სიახლოვეს.
ერთი კვირის განმავლობაში 4 ობიექტის ჩამოგდებამ აშშ-სა და კანადაში ღელვა გამოიწვია. ჩინური საჰაერო ბურთის აშშ-ს თავზე დაფიქსირებამ გავლენა იქონია საერთაშორისო პოლიტიკაზეც. აშშ-ის სახელმწიფო მდივანმა, ანტონი ბლინკენმა პეკინში მისი პირველი ვიზიტიც კი გადადო.
წყარო: theguardian
მოამზადა: ანა სიბოშვილმა