"მოგების გარდა, არსებობს კიდევ ერთი შანსი...." - "საუკუნის თამაშის" მოლოდინი და კალათბურთის მსოფლიოს ჩემპიონატზე გასვლის ისტორიული შესაძლებლობა

საქართველოს ეროვნული საკალათბურთო ნაკრები დღეს უმნიშვნელოვანეს მატჩს გამართავს. კალათბურთის ფედერაციაში ამ თამაშს "საუკუნის მატჩს" უწოდებენ, რადგან ისტორიაში პირველად, ჩვენმა გუნდმა სესაძლოა, მსოფლიოს ჩემპიონატზე ასპარეზობის უფლება მიიღოს.

"ჩვენს ეროვნულ გუნდს არსებობის ისტორიაში პირველად, მსოფლიოს ჩემპიონატზე გასვლის რეალური შანსი აქვს. ილიას ზუროსის გაწვრთნილ საქართველოს საკვალიფიკაციო ეტაპის ბოლო მატჩში, რომელიც თბილისი არენაზე 26 თებერვალს, 20:00 საათზე დაიწყება, ისლანდიის დამარცხება სანუკვარ შედეგს მოუტანს.

მოდით, თვალი გადავავლოთ, თუ რა სიტუაციაშია საქართველო და აქამდე მოსასვლელად რა გზა გამოიარა. მსოფლიოს ჩემპიონატზე გასვლის შანსი რეალური 2017 წლიდან გახდა, როცა ფიბა-მ მუნდიალისთვის ცალკე შესარჩევი ტურნირის ჩატარება დაიწყო. მანამდე იყო ის, რომ ევრობასკეტი 2 წელიწადში ერთხელ იმართებოდა და მსოფლიოზე სწორედ ევროპის ჩემპიონატზე მოწინავე ადგილების დამკავებელი გუნდები გადიოდნენ – ხან 6, ხანაც 7 საუკეთესო", - ნათქვამია ფედერაციის მიერ გამოქვეყნებულ ინფორმაციაში.

• მათივე ცნობით, 2017 წლიდან ფიბა-მ ევრობასკეტის ჩატარება 4 წელიწადში ერთხელ დააწესა, მსოფლიოს ჩემპიონატზე გუნდების რაოდენობა 32-ამდე გაზარდა და მასზე გასასვლელად ცალკე 2-წლიანი საკვალიფიკაციო ტურნირის ჩატარება დაიწყო. ევროპას მსოფლიოზე 12-გუნდიანი კვოტა დაუწესდა. პირველ ჯერზე საქართველომ პირველი ჯგუფური ეტაპი დაძლია, მაგრამ მეორეში აღარ გაუმართლა. მეორე საკვალიფიკაციო ეტაპი კი, რომელიც 2021 წელს დაიწყო, საქართველოს ნაკრებმა რიგიანად ჩაატარა და საქმე იქამდე მიიყვანა, რომ მსოფლიოზე გასასვლელად ისლანდიის დამარცხება აკლია.

მსოფლიოს ჩემპიონატზე ევროპიდან 12 გუნდი გადის. 9 ნაკრები ცნობილია – ესპანეთი, იტალია, საბერძნეთი, გერმანია, სლოვენია, საფრანგეთი, ლიეტუვა, ფინეთი და ლატვია. ბოლო ტურში დაჩენილი 3 საგზურის მფლობელიც უნდა გამოვლინდეს. ერთ-ერთი მათგანისთვის საქართველო და ისლანდია იბრძვიან.

საქართველო პირველ ჯგუფურ ეტაპზე ესპანეთთან, უკრაინასთან და ჩრდილოეთ მაკედონიასთან იყო. ზუროსის გუნდმა მაკედონიელები 2-ჯერ დაამარცხა, ხოლო ესპანეთთან და უკრაინასთან მოგება-წაგებები გაიყო და ჯგუფში მე-2 ადგილის დაკავებით მომდევნო ეტაპზე გავიდა.

ზუროსის გუნდს მეორე ჯგუფში პირველიდან მხოლოდ უკრაინასთან და ესპანეთთან დაგროვილი ქულები გადაჰყვა, ჩრდილოეთ მაკედონიასთან 2 მოგება კი იმ მოტივით ჩამოეჭრა, რომ ჩვენი პარალელური ჯგუფიდან მოკვეთეს რუსეთი. ფიბა-ს გადაწყვეტილებით, პარიტეტის პრინციპი დაცული რომ ყოფილიყო, იმ ჯგუფის ყველა წევრს რუსეთთან თამაშები გაუუქმდათ, ჩვენთან კი – ჩრდილოეთ მაკედონიასთან.

• რუსეთთან ჩვენს კონკურენტ ისლანდიას მოგება არ ჰქონია და არაფერი დაუკარგავს მასთან ნაჩვენები შედეგის ანულირებით, ხოლო საქართველომ ჩრდილომაკედონიელებთან 2 მარცხი დაკარგა და მეორე ჯგუფურ ეტაპზე მოპოვებული 3 გამარჯვებით (ჰოლანდიასთან 2 და ისლანდიაში 1) თავი ისლანდიაზე კომფორტულ სიტუაციაში ჩაიყენა.

მეორე და გადამწყვეტ ჯგუფში, რომელშიც 6 გუნდია და 3 საკეთესო მსოფლიოს ჩემპიონატზე გადის, პირველი და მეორე ადგილები ესპანეთსა და იტალიას აქვთ გარანტირებული, ბრძოლა მე-3 საგზურისთვისაა, რომელსაც ერთმანეთს საქართველო და ისლანდია ეცილება.

თეორიულად არსებობს ერთი ვარიანტი, რომელიც ჩვენი უპირატესობაა. რაკი საქართველოს ისლანდიაში მოგებული აქვს 3 ქულით და მეტოქეზე ცხრილში ქულით წინაა, 1, 2 და 3 ქულით დამარცხების შემთხვევაში ილიას ზუროსის გუნდი ისლანდიაზე წინ იქნება. ეს არის ვარიანტი, რომლის იმედად საქართველოს ნაკრების არც ერთი წევრი არაა და დღეს ილიას ზუროსის გუნდი მხოლოდ მოსაგებად ითამაშებს.

ისლანდიის ნაკრებმა წინა მატჩში დაისვენა. კუნძულელებმა ესპანეთს უმასპინძლეს და წამყვანი მოთამაშეები არ დატვირთეს. ეს თავად ისლანდიელთა მწვრთნელმა, ბალდურ რაგნარსონმა განაცხადა. მსოფლიო გრანდისთვის თავი რომ შეეკლათ და თუნდაც მოეგოთ, ეს ისლანდიელებს არაფერს მისცემდა, თუკი თბილისში დამარცხდებოდნენ. ერთადერთი, იმას იხეირებდნენ, რომ 1 ქულით გამარჯვებაც ეყოფოდათ, ახლა კი მინიმუმ 4 ქულით მოგება სჭირდებათ, საქართველოს ცხრილში რომ გადაასწრონ.

<iframe width="560" height="315" src="https://www.youtube.com/embed/6hGkowzPLNs" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

• ილიას ზუროსის კომენტარი მატჩის წინ:

"გუნდში ყველას ესმის, რას ნიშნავს ეს თამაში. ჩვენ დიდი ხანია ამისთვის ვიბრძვით, ვცდილობთ, ამ მატჩისთვის მოვემზადოთ. გვაქვს შანსი, ვთამაშობთ სახლში. ეს გადამწყვეტი მატჩია, რომელიც შესაძლებლობა გვაძლევს პირველად ვითამაშოთ მსოფლიო ჩემპიონატზე.გვჯერა საკუთარი მოთამაშეების. სიმართლე გითხრათ, რთული პერიოდი გვქონდა. შერმადინმა და შენგელიამ გასულ კვირას თასის თამაშები ითამაშეს. ჩვენი მატჩის შემდეგ, თოკომ რამდენიმე საათში ვირტუსთან ერთად ევროლიგაზე ითამაშა.

არ მჯერა, რომ არსებობს ბევრი ისეთი მოთამაშე, რომელიც ამდენს გააკეთებდა საკუთარი ქვეყნისთვის. ეს აჩვენებს, თუ რამდენად უნდა ჩვენს კაპიტანს აქ ყოფნა და ნაკრებში თამაში. ჩვენ რთული მატჩი გველის. ჩვენი მეტოქე განსაკუთრებული ნაკრებია. სამქულიანებს ისვრიან და სწრაფად თამაშობენ. შესაბამისად, დაცვაში კარგად უნდა ვითამაშოთ და მეტოქეს ხშირად არ უნდა ვასროლინოთ."

• დუდა სანაძე

"არ გვინდა დიდ ემოციებს ავყვეთ, იმიტომ რომ დიდმა ემოციებმა შეიძლება გვავნოს. ყველა მოთამაშე მზადაა ამ თამაშისთვის. ყველას ისეთი შეგნება და მოტივაცია გვაქვს რომ ისტორია დავწეროთ."

საქართველოსთვის ისტორიული მატჩი 20:00 საათზე დაიწყება.