პანდემია, სავარაუდოდ, ვირუსის ჩინეთის ლაბორატორიიდან გაჟონვამ გამოიწვია - რა წერია აშშ-ის ენერგეტიკის დეპარტამენტის ახალ დასკვნაში
ვირუსმა, რომელმაც კორონავირუსის პანდემია გამოიწვია, სავარაუდოდ, ჩინეთის უხანის ლაბორატორიიდან გაჟონა და ის არ ყოფილა ჩინეთის ბიოლოგიური იარაღის პროგრამის ნაწილი. ამის შესახებ საუბარია აშშ-ის ენერგეტიკის დეპარტამენტის განახლებულ კვლევაში, რომელიც თეთრ სახლს გადაეცა.
აღნიშნული კვლევის გამოქვეყნებას კი წინ უსწრებდა ამერიკის ფედერალური ბიუროს დასკვნა, რომელიც გვარწმუნებს, რომ კოვიდ-19-ის გამომწვევი ვირუსი ჩინეთის ლაბორატორიიდან გავრცელდა.
აშშ-ის ენერგეტიკის დეპარტამენტის განახლებული დასკვნები ეწინააღმდეგება აშშ-ის ოთხი სხვა სადაზვერვო სააგენტოს მოხსენებებს, რომლებმაც დაასკვნეს, რომ ეპიდემია ინფიცირებული ცხოველისგან ადამიანზე ბუნებრივი გადაცემის შედეგად დაიწყო.
კორონავირუსის გავრცელების შესახებ სხვადასხვა მოსაზრებები არსებობს. ერთ-ერთი თეორიის მიხედვით, ვირუსი დაუდგენელი ცხოველისგან გადაედოთ ადამიანებს, კიდევ ერთი ვერსიის თანახმად, ის ჩინეთში, უხანის კვლევითი ლაბორატორიიდან შემთხვევით გავრცელდა.
- ამერიკის ცენტრალურ სადაზვერვო სააგენტოში ჯერჯერობით ვერ საუბრობენ დარწმუნებით კორონავირუსის გავრცელების რომელი თეორიაა უფრო მეტად სარწმუნო, თუმცა ჩამოყალიბდნენ მოსაზრებაზე, რომ კოვიდი არ უნდა ყოფილიყო ჩინური ბიოლოგიური იარაღის პროგრამის ნაწილი.
აღსანიშნავია, რომ აშშ-ის ენერგეტიკის დეპარტამენტი, როგორ განცხადებაში წერენ, "საფუძვლიან, ფრთხილ და ობიექტურ გამოძიებას Covid-19-ის წარმოშობის გასარკვევად კვლავ განაგრძობს."
აშშ-ს 2021 წლის დაზვერვის თავდაპირველი ანგარიშის თანახმად, კოვიდ-19 პირველად უხანში დაფიქსირდა, არაუგვიანეს 2019 წლის ნოემბრისა, როდესაც უხანის ვირუსოლოგიის ინსტიტუტის მკვლევრები ავად გახდნენ და ჰოსპიტალიზაცია დასჭირდათ.
გავრცელებული ინფორმაციით, ისინი კორონავირუსის კვლევაში იყვნენ ჩართულნი. თავად ჩინეთის ოფიციალურმა პირებმა ეს ინფორმაცია უარყვეს.
ჯანდაცვის მსოფლიო ორგანიზაციის მონაცემებით, კორონავირუსმა მსოფლიოს მასშტაბით, 7-მილიონამდე ადამიანის სიცოცხლე იმსხვერპლა.
წყარო: theguardian
მოამზადა: ანა სიბოშვილმა