"პოლიციასთან საუბრისთვის თავში ურტყეს "დუბინკები", წესიერი სამედიცინო დახმარება არც აღმოუჩენიათ" - რას წერს ზურაბ ჯაფარიძის მეუღლე?
პოლიციამ "გირჩი-მეტი თავისუფლებისთვის“ ლიდერი ზურაბ ჯაფარიძე გუშინ, პარლამენტთან მიმდინარე აქციაზე დააკავა. როგორც უწყებაში აცხადებენ, ჯაფარიძე ადმინისტრაციული წესით, კერძოდ, სკ-ის 166/173 -ე მუხლებით დააკავეს.
ცოტა ხნის წინ პოლიტიკოსის მეუღლემ, ნათია ქორიძემ "ფეისბუქში" პოსტი გამოაქვეყნა, სადაც წერს, რომ ზურა ჯაფარიძეს პოლიციელები "დუბინკებით" გაუსწორდნენ.
"ზურა გუშინ დააკავეს. პოლიციელებთან საუბრის გარდა არაფერი გაუკეთებია გუშინ აქციაზე, ძალადობა მისთვის მიუღებელია. საუბრისთვის თავში ურტყეს "დუბინკები", ეტყობა კიდეც დაზიანებები თურმე, მე თვითონ ვერ ვნახულობ მას. გაზიც შეასხეს სახეში, ისევე, როგორც უამრავ ადამიანს. ახლა დაკავებული ყავთ დიღმის იზოლატორში.
წესიერი სამედიცინო დახმარება როგორც ჩანს, არც აღმოუჩენიათ. მხოლოდ გამაყუჩებელი მისცეს გუშინ. ეს რა ქვეყანაში ვცხოვრობთ? სად მივდივართ საერთოდ? რა მომავალს ვქმნით?" - წერს ქორიძე.
ცნობისთვის, 7 მარტს საკანონმდებლო ორგანოსთან მასშტაბური აქცია გაიმართა. საზოგადოება აპროტესტებდა "აგენტების კანონის" განხილვას, მიუხედავად ამისა, პარლამენტმა კანონი პირველი მოსმენით მიიღო. ამის შემდეგ აქციაზე ვითარება დაიძაბა. ადგილზე მობილიზებულმა სპეცდანიშნულების რაზმმა პროტესტანტების დაშლა დაიწყო. მათ არაერთხელ გამოიყენეს ე.წ. წიწაკის სპრეი, წყლის ჭავლი, თუმცა, ადამიანები ადგილზე ბრუნდებოდნენ და პროტესტს განაგრძოდნენ. აქცია დილამდე გაგრძელდა. შინაგან საქმეთა სამინისტროს ბოლო მონაცემებით, დაკავებულია 66 მოქალაქე.
ნახეთ ასევე:
- "აქციაზე დავაკავეთ 66 პირი... დემონსტრანტების ქმედებების შედეგად 50 სამართალდამცავი დაშავდა" - რა განცხადებას ავრცელებს შსს გუშინდელ მოვლენებზე?
- ირაკლი კობახიძის საგანგებო განცხადება გუშინდელ მოვლენებზე: მან ოპოზიციას "ბოლშევიკები" უწოდა - "სინამდვილეში მათ არაფერი აქვთ ახლო ევროპასთან"
- "მივუსამძიმრებ მათ დედებს, რომ ასეთები გაზარდეს" - თამრიკო ჭოხონელიძე სპეცრაზმელებზე