საზოგადოების პროტესტის მიუხედავად, კანონპროექტი "უცხოური გავლენის გამჭვირვალობის" შესახებ პარლამენტმა პირველი მოსმენით მიიღო, რასაც მასშტაბური პროტესტი მოჰყვა. ხელისუფლებამ რუსთაველზე შეკრებილი პროტესტანტების ცრემლსადენი გაზითა და წყლის ჭავლით დაშლა, ფაქტობრივად, კანონპროექტისთვის კენჭისყრიდან მალევე დაიწყო, რათა გზა გაეთავისუფლებინა პარლამენტთან "ქართული ოცნების" დეპუტაციისთვის. არეულობა რუსთაველის გამზირზე და მიმდებარე ქუჩებზე შუაღამემდე გაგრძელდა, დაშავდა ათობით ადამიანი, დააკავეს პროტესტანტთა ნაწილი. ხელისუფლება ამტკიცებს, რომ ეს ამერიკული კანონია და ევროინტეგრაციას ხელს არ უშლის, თუმცა თავად ევროპაში თუ ამერიკაში ასე არ ფიქრობენ, გვიან ღამევე გაავრცელეს განცხადებები, როგორც აშშ-ის სახელმწიფო დეპარტამენტის, ისე ევროკავშირის წარმომადგენლებმა.
უმწვავესი იყო სახელმწიფო დეპარტამენტის ოფიციალური წარმომადგენლის ნედ პრაისის განცხადება.
“ღრმა შეწუხების გრძნობა გვაქვს. ბოლო დღეების განმავლობაში ჩვენგან ხშირად გაგიგიათ ამ გრძნობის შესახებ. ღრმა შეწუხების გრძნობაა ამ კანონპროექტის შესაძლო ეფექტების გამო.
ეს კანონპროექტი ყველაზე ფუნდამენტურ უფლებებს დაარტყამს, რომლებიც ცენტრალურია საქართველოს ხალხის მისწრაფებებისთვის კონსოლიდირებული დემოკრატიისთვის, ევროატლანტიკური ინტეგრაციისთვის, უფრო ნათელი მომავლისთვის. იგი დამოუკიდებელ ხმებს გააჩუმებს და მათ სტიგმატიზაციას მოახდენს, საქართველოს იმ მოქალაქეებისა, რომლებსაც მეტი არაფრის გაკეთება სურთ, ვიდრე ერთად მუშაობა, რათა უფრო ნათელი მომავალი შექმნან. მომავალი, რომელიც ევროპასთან ინტეგრირებულია, დემოკრატიულია, თავისუფალია, სადაც საქართველო დამოუკიდებელი და სუვერენული ქვეყანაა...
თუმცა ახლა, ვხედავთ კანონპროექტს, რომელიც უზარმაზარი უკან დახევა იქნება. ეს იქნება ქართველი ხალხის მისწრაფებების მხრივ უკან დახევა, უკან დახევა იქნება აშშ-ის შესაძლებლობაში განაგრძოს ქართველ ხალხთან პარტნიორობა…
ნებისმიერი, ვინც ხმას აძლევს ამ კანონპროექტს, პასუხისმგებელი იქნება ქართველი ხალხის ამ ევროატლანტიკური მისწრაფებებისთვის ძირის გამოთხრისთვის. არ გვსურს ამის ნახვა. აშშ-ის გარდა ეს არის ევროკავშირი, გაერო და, რაც ყველაზე მნიშვნელოვანია, ქართველი ხალხი, ქართული სამოქალაქო საზოგადოების ჯგუფები. ყველა მათგანმა ამ კანონპროექტის შესახებ ძალიან ძლიერი შეშფოთება გამოხატეს”, - თქვა პრაისმა.
ცნობილია, რომ "უცხოური გავლენის გამჭვირვალობის შესახებ" დოკუმენტი მოძრაობა "ხალხის ძალის“ იმ დეპუტატებმა მოამზადეს, რომლებმაც გასულ წელს "ქართული ოცნება" დატოვეს, თუმცა საპარლამენტო უმრავლესობაში დარჩნენ. აღნიშნული კანონპროექტის მიხედვით, ის არასამთავრობო ორგანიზაციები და მედიასაშუალებები, რომლებიც საქართველოს პარტნიორებისგან ფინანსდებიან, "უცხოური გავლენის აგენტებად" უნდა დარეგისტრირდნენ.
ჩვენი პარტნიორებისგან გაწეულ სიკეთეებს და დახმარებას თუ გავითვალისწინებთ, ყველაზე მსხვილი ბენეფიციარი და დიდი "აგენტი“ საქართველოს მთავრობა გამოდის, რადგან ქვეყანაში სწორედ უცხოური გრანტების საშუალებით ხორციელდება ათასგვარი მნიშვნელოვანი პროექტი, ხშირ შემთხვევაში, დონორზე ინფორმაცია საზოგადოების ყურამდე არც მიდის და ამას ხელისუფლება თავის დამსახურებად მიიწერს.
გარდა იმისა, რომ ეს ინიციატივა ანტიკონსტიტუციურია, საერთაშორისო ექსპერტები თანხმდებიან იმ საერთო საფრთხეებზე, რისი მოტანაც "გავლენის აგენტების“ კანონს შეუძლია. ისინი ვარაუდობენ, რომ კანონის დამტკიცების შემთხვევაში, ევროპული და ამერიკული ფონდები დახმარებაზე უარს იტყვიან, რაც კატასტროფა იქნება ქვეყნისთვის. შედეგად მოსალოდნელია, ფინანსური დახმარება ევროკავშირიდან და აშშ-დან არა მარტო არასამთავრობო ორგანიზაციებს, არამედ ქვეყანას შეუმცირდება. პირველ რიგში, დახმარება შეუწყდებათ სიპებსა და აიპებს, ვისკენაც სამოქალაქო სექტორზე მეტი ფინანსები მიემართება. საქართველოში დაიხურება ბევრი პროექტი, რომლებიც მათი დაფინანსების არეალშია და ეს დახმარება სხვა რეგიონებზე გადამისამართდება, რაც ქვეყნისთვის ძალზე დამაზიანებელი იქნება. ყველაზე მთავარი, რაც კანონის დამტკიცებას მოჰყვება ის იქნება, რომ საქართველოსთვის ევროკავშირში გაწევრების გზა სამუდამოდ ჩაიკეტება. ექსპერტების თქმით, ყველა გრანტი და სესხი, რასაც სახელმწიფო იღებს, ჩვენმა დასავლელმა პარტნიორებმა რომ გააჩერონ, პირველივე წელს, მშპ -ს ვარდნა მინიმუმ 15% იქნება.
ambebi.ge -მ მოიძია იმ პროექტების ჩამონათვალი, რომლებიც საქართველოში ბოლო წლებში უცხოური გრანტების მეშვეობით განხორციელდა, ან ჯერაც ხორციელდება. გთავაზობთ ამ პროექტების არასრულ ჩამონათვალს (მითითებული თანხები - დოლარებში):
ევროპულ-ქართული ინსტიტუტის ხელმძღვანელი გიორგი მელაშვილი ამბობს, რომ აღნიშნული კანონპროექტი საქართველოს ევროპული მომავლის პირდაპირი საბოტაჟია და ამას სავალალო შედეგი ექნება საქართველოს ევროპული მომავლისთვის - ყველაზე საშინელი ის შეიძლება მოხდეს, რომ ამ კანონის შედეგად საქართველო პირისპირ დარჩება რუსეთთან დასავლეთის მხარდაჭერის გარეშე.
გიორგი მელაშვილი:
:დასავლური დახმარების მთავარი ბენეფიციარი საქართველოს მთავრობაა, რომელმაც მარტო ევროკავშირიდან 2021 წელს 159 მილიონი აშშ დოლარის პირდაპირი დახმარება მიიღო. ამას ემატება იაფი კრედიტის პროგრამა, რაშიც 72 მილიონი დაიხარჯა, ევრაზიის საინვესტიციო ბანკმა 66 მილიონი გაიღო, ევროპის რეკონსტრუქციის და განვითარების ბანკმა - 50 მილიონი და ა.შ. ბოლო 10 წლის განმავლობაში უშუალო გრანტის სახით (ანუ ფული, რომელსაც დაბრუნება არ სჭირდება) 3 მილიარდ ლარამდეა შემოსული საქართველოში. ამავდროულად, არის მიკრო და მაკროსაფინანსო დახმარებები, სესხები - უპროცენტო და დაბალპროცენტიანი, შეღავათიანპროცენტიანი, თანხები, რომელიც სახელმწიფოს ყოველდღიური ოპერირებისთვის სჭირდება. ამის დათვლა ძალიან რთულია და იგულისხმება 10-ჯერ მეტი თანხები. საუბარია უზარმაზარ თანხებზე, დეტალური სტატისტიკა ახლა მუშავდება და უახლოეს პერიოდში ეგეც გვექნება.
ამ რუსული კანონის მიღების ერთადერთი ამოცანაა საქართველოს და ევროკავშირის დაშორება. მისი არც საჭიროება და არც დრო იყო, მით უფრო დღეს, როცა საქართველოს კანდიდატის სტატუსი განიხილება და შანსი გვაქვს, ერთხელ და სამუდამოდ, რუსულ წუმპეს თავი დავაღწიოთ. ეს კანონი შეგვიძლია შევაფასოთ როგორც საქართველოს ევროპული მომავლის პირდაპირი საბოტაჟი. ვერც ერთი სფერო, რომელშიც პროგრესს ვხედავთ, დაწყებული ურბანული განვითარებით (მაგალითისთვის მოვიყვან თბილისის მეტროპოლიტენისთვის გამოყოფილ თანხებს - მის განახლებაში უახლოეს პერიოდში იბიარდიმ უზარმაზარი თანხის ჩადება გადაწყვიტა) და ავტობუსების შეძენით დამთავრებული. ყველა ავტობუსს აქვს ევროკავშირის დროშა და ეს იმიტომ, რომ ის ჩვენი დასავლელი პარტნიორების მიერ არის დაფინანსებული. თბილისში რაც მსხვილი ინფრასტრუქტურული პროექტები იგეგმება, ყველა მათგანზე არსებობს საერთაშორისო დახმარება, ან საერთაშორისო მხარდაჭერა დაფინანსების კუთხით. იგივე ეხება რეგიონებს - საქართველოსთვის ყველაზე მნიშვნელოვან სატრანსპორტო არტერიას, დასავლეთისა და აღმოსავლეთის მაგისტრალს რომ თავი დავანებოთ, სოფლებში გზები, წყალგაყვანილობის ქსელები, ნაგვის გადამუშავება... ყველაფერზე უზარმაზარი ევროპული ფულია დახარჯული, ეს არანაირი გავლენა არ არის, ამას ჰქვია მეგობრების დახმარება, რათა ნორმალურ ქვეყნად ჩამოვყალიბდეთ.
ვიმეორებ, საქართველოში საერთაშორისო დასავლური დახმარების ყველაზე დიდი მიმღები საქართველოს მთავრობაა. მთავრობის თითქმის ყველა წევრს მიუღია მონაწილეობა საერთაშორისო პროექტებში. მაგალითად, პარლამენტის სპიკერი წლების განმავლობაში გერმანიის მთავრობის მიერ შექმნილი ორგანიზაციის ერთ-ერთი დეპარტამენტის ხელმძღვანელი იყო. მათ მიზნებს ზედაპირულად თუ ავხსნით, გამოდის, რომ "ქართულ ოცნებას“ არ უნდა ქვეყანაში თავისუფალი სივრცეები არსებობდეს, ამ შემთხვევაში - სამოქალაქო ორგანიზაციები, რომლებიც გააკონტროლებენ იმას, თუ რას აკეთებს მთავრობა და რაში იხარჯება გრანტები.
ადგილი აქვს ფარისევლურ მიდგომას, რომ მთავრობა, რომელსაც არ უნდა იყოს გამჭვირვალე, ცდილობს დახუროს ის ორგანიზაციები, რომლებიც ყველაზე გამჭვირვალენი არიან. გამჭვირვალობის მიზნით ამ კანონის მიღება არის თავიდან ბოლომდე მოგონილი არგუმენტი, რომლის გაბათილებაც შესაძლებელია უბრალოდ თვალის გახელით. თავად მისი ინიციატორები ამბობენ, რომ არასამთავრობო ორგანიზაციები სრულიად გამჭვირვალენი არიან და ფინანსთა სამინისტროს და სხვა უწყებებს ისედაც აქვთ საჭირო ინფორმაცია, ამას თავად აღიარებს ბატონი სუბარი.
ზოგადად, როდესაც ქყვეყანა ითხოვს აგენტების რეგისტრირებას, ძალიან სასაცილო სიტუაციაშია, რადგან ნამდვილი აგენტები ვინც არიან, ძალიან კარგად იცის საზოგადოებამ. კარგად ვიცით, რომ მთელი ამ დროის განმავლობაში "ოცნებას“ რუსეთის არცერთი აგენტი არ გამოუვლენია და დაუკავებია. ახლა ისმის კითხვა - ვინ არიან ნამდვილი აგენტები, ისინი, ვინც იბრძვიან ქართული სახელმწიფოს მედეგობის და სიძლიერის წინააღმდეგ, საზოგადოების ინტერესების წინააღმდეგ, მხარს უჭერენ ოკუპაციას, ჩვენი მოქალაქეების დაჭერას, თუ ის ჩვენი მეგობრები, რომლებიც გვეხმარებიან ინფრასტრუქტურა ავაშენოთ, ეკონომიკური სიდუხჭირიდან გამოვძვრეთ და ერთხელ და სამუდამოდ მივიღოთ სახელმწიფო, სადაც სახელმწიფო ვერ დაჩაგრავს რიგით მოქალაქეებს.
პარტნიორები გვეხმარებიან ისე, რომ ხშირ შემთხვევაში, ჩვენმა მოქალაქეებმა არც იციან, რომ ამაზე ფული წამოვიდა, მაგალითად, შვედეთიდან, ბრიტანეთიდან, თუ ბრიუსელიდან. საბოლოო ჯამში ის, რომ ჩვენი ქვეყანა ვითარდება, დიდწილად ჩვენი პარტნიორების და მეგობრების დახმარების შედეგია. საქართველოს ხელისუფლება ამ კანონს ვერ მიიღებს - კარგად ვხედავთ სამოქალაქო საზოგადოების, თუ პოლიტიკური პარტიების ერთიანობას, ჩვენი პარტნიორების განცხადებებს, რომლებიც პირდაპირ ამბობენ, რომ ის სრულიად შეუთავსებელია დასავლურ ფასეულობებთან და ღირებულებებთან და მეტიც, საქართველოს სურვილთან გახდეს ევროკავშირის წევრი. აქედან გამომდინარე, ამას სავალალო შედეგი ექნება საქართველოს ევროპული მომავლისთვის და, ფაქტობრივად, ყველაზე საშინელი ის შეიძლება მოხდეს, რომ ამ კანონის შედეგად საქართველო პირისპირ დარჩება რუსეთთან დასავლეთის მხარდაჭერის გარეშე. "ქართული ოცნების“ ეს ქმედება ზუსტად იმიტომაა ასეთი სახიფათო, რომ ის პირისპირ გვტოვებს რუსეთთან. ამ კანონის მიღებას ექნება კატასტროფული შედეგები საქართველო-დასავლეთის ურთიერთობაში. ყველაზე ცუდი იქნება ის, რომ პირისპირ დავრჩებით რუსეთთან და საფრთხის წინაშე დადგება ქართული სახელმწიფოებრიობა. რაც შეეხება ეკონომიკურ უკუსვლას, ესეც, რა თქმა უნდა, მოხდება - ამხელა საგარეო დახმარების შემცირების შემთხვევაში, ეკონომიკური სიტუაცია გაუარესდება და მეტიც, გაუარესდება კონკრეტული ადამიანების მდგომარეობა, რომლებიც ვეღარ მიიღებენ თუნდაც უფასო იურიდიულ (რაც ყველაზე ხშირია), სოციალურ დახმარებას, როგორიცაა სკოლებში ბავშვების ინკლუზიური ჩართულობა, შშმ პირების დახმარება, დევნილების ხელშეწყობა, ეკონომიკური ზრდის პროგრამები... საბოლოო ჯამში, ჩვენ მივიღებთ მნიშვნელოვან უკუსვლას და საქართველოს ყველა წარმატება, რასაც დამოუკიდებლობის დღიდან მივაღწიეთ, საფრთხის წინაშე დადგება“.