"მინდა, მნიშვნელოვანი განცხადება გავაკეთო" - როგორ ეხმაურება დავით არახამია გავრცელებულ ინფორმაციას, რომ ქართულ პოლიტიკაში მოსვლას აპირებს
გუშინ, ნიდერლანდურ მედიაში გავრცელდა ინფორმაცია, რომ დავით არახამია ქართულ პოლიტიკაში ღიად ჩართვას აპირებს. ასევე გავრცელდა წერილი, სადაც არახამია თავს წარმოადგენს უცხოეთში მოღვაწე ქართველად და აცხადებს, რომ გადაწყვეტილება მიიღო აქტიურად ჩაერთოს ქართულ პოლიტიკაში.
"არახამიას გადაწყვეტილება მოჰყვა თბილისში ანტისამთავრობო საპროტესტო აქციებს „უცხოური აგენტების შესახებ“ საკამათო კანონპროექტის წინააღმდეგ,“ - წერს მედია.
განცხადებაში ასევე აღნიშნული იყო, რომ არახამია ქართულ პოლიტიკაში ითანამშრომლებდა დასავლეთზე ორიენტირებულ ყველა პარტიასთან, კერძოდ, ექს-პრეზიდენტ მიხეილ სააკაშვილის მიერ დაარსებულ „ნაციონალურ მოძრაობასთან“.
უკრაინის პრეზიდენტ ვოლოდიმირ ზელენსკის ერთ-ერთი მრჩეველი, რომელიც ქართული წარმოშობის გახლავთ, გავრცელებულ ინფორმაციას დღეს გამოეხმაურა და ქართულ პოლიტიკაში მოსვლა უარყო.
"ხალხის მსახურის" თავმჯდომარე ნიდერლანდურ მედიაში გავრცელებულ ინფორმაციას ყალბს უწოდებს და ამბობს, რომ არ აპირებს უკრაინული პოლიტიკიდან ქართულში გადმოინაცვლოს. არახამიამ სპეციალური მიმართა გაავრცელა.
"მივესალმები საქართველოს მოქალაქეებს, მინდა მნიშვნელოვანი განცხადება გავაკეთო ერთ-ერთი ჰოლანდიური გაზეთის მიერ გავრცელებულ ჩემს ინტერვიუზე, რომელშიც ქართულ პოლიტიკაში მოსვლაზე ვსაუბრობ. ჩემთვის არასასიამოვნოა, რომ ამან მსგავსი რეზონანსი გამოიწვია. სამწუხაროდ, ეს ინფორმაცია ტყუილია. სიმართლე ისაა, რომ ჩვენ ვაგრძელებთ მუშაობას რუსეთის აგრესიის დასამარცხებლად და თქვენს გასამარჯვებლად. ეს რუსეთის ან საქართველოს მთავრობის მიერ დაგეგმილი სპეციალური ოპერაციაა, რომლებიც ახლა ცდილობენ, მიიღონ ანტიდემოკრატიული კანონი", - ამბობს არახამია.