ავტორი:

სარაკეტო და საჰაერო დარტყმები უკრაინის ტერიტორიაზე და უმძიმესი ვითარება ბახმუტში, სადაც ჯერ კიდევ რჩება 3000-მდე მშვიდობიანი მოქალაქე - "ისინი ევაკუაციაზე უარს ამბობენ"

სარაკეტო და საჰაერო დარტყმები უკრაინის ტერიტორიაზე და უმძიმესი ვითარება ბახმუტში, სადაც ჯერ კიდევ რჩება 3000-მდე მშვიდობიანი მოქალაქე - "ისინი ევაკუაციაზე უარს ამბობენ"

რუსულმა ძალებმა, გასული დღის განმავლობაში, უკრაინის ტერიტორიაზე 3 სარაკეტო და 29 საჰაერო დარტყმა განახორციელეს, - ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

"მტერმა, ბოლო დღის განმავლობაში, სამი სარაკეტო დარტყმა განახორციელა, კერძოდ, ქალაქ ხარკოვში სამოქალაქო ინფრასტრუქტურულ ობიექტებზე. მტერმა ასევე 29 საჰაერო დარტყმა განახორციელა", - აღნიშნულია ინფორმაციაში.

გენერალური შტაბის ცნობით, რუსულმა ძალებმა მრავალჯერადი სარაკეტო სისტემებიდან ცეცხლი 79-ჯერ გახსნეს.

"მტრის თავდასხმის ალბათობა ჩვენი სახელმწიფოს მთელ ტერიტორიაზე კვლავ მაღალია“, - აცხადებენ გენშტაბში.

უმძიმესი ვითარებაა ისევ ბახმუტში, რუსული ძალები ქალაქის აღების მცდელობას არ წყვეტენ.

"მოწინააღმდეგის ძირითადი ძალისხმევა კონცენტრირებულია ლიმანის, ბახმუტის, ავდიივკას, მარინკასა და შახტიორკის მიმართულებებზე. ოკუპანტებმა, გასული დღის განმავლობაში, ამ მიმართულებებით 75-ზე მეტი შეტევა განახორციელეს. ჩვენმა დამცველებმა ყველა მათგანი მოიგერიეს“, - აცხადებენ გენშტაბში.

დონეცკის ოლქის სამხედრო ადმინისტრაციის ხელმძღვანელის, პაველ კირილენკოს განცხადებით, ბახმუტში 3 000-მდე მშვიდობიანი მოქალაქე, მათ შორის 33 ბავშვია დარჩენილი.

მისი თქმით, ის ადამიანები, რომლებიც ქალაქში რჩებიან, კატეგორიულად უარს ამბობენ ევაკუაციაზე.

პაველ კირილენკომ ხაზი გაუსვა, რომ ევაკუაცია მოიცავს არა მხოლოდ ბახმუტს, არამედ ფრონტის მთელ ხაზს. მოქალაქეები გაჰყავთ ავდიივკიდანაც, სადაც ერთი კვირის წინ 42 ბავშვი იყო, ახლა კი 13-ია.

კირილენკოს ინფორმაციით, ევაკუირებული ბავშვები უკრაინის სხვა რეგიონებში გადაჰყავთ. იქ მათ ათავსებენ სკოლამდელ დაწესებულებებში, პანსიონატებსა და სანატორიუმებში.