სი ძინპინი რუსეთში ჩავიდა - რა განცხადებას აკეთებს ჩინეთის ლიდერი მოსკოვიდან
ჩინეთის ლიდერი, სი ძინპინი სამდღიანი ვიზიტით მოსკოვში ჩავიდა, სადაც ის თავის რუს კოლეგას, პრეზიდენტ ვლადიმერ პუტინს შეხვდება, - ინფორმაციას რუსული მედია ავრცელებს.
კრემლის ინფორმაციით, რუსეთის პრეზიდენტი ვლადიმერ პუტინი სი ძინპინთან შეხვედრაზე უკრაინის საკითხს განიხილავს.
"თემებს, რომლებსაც ეხება [პეკინის სამშვიდობო] გეგმა, რა თქმა უნდა, აუცილებლად შეეხებიან უკრაინის საკითხზე აზრთა გაცვლის დროს“, - აღნიშნა პესკოვმა.
- რუსეთში ჩასვლის შემდეგ სი ძინპინმა პირველი კომენტარი გააკეთა და განაცხადა, რომ მზადაა, რუსეთის პრეზიდენტ ვლადიმერ პუტინთან ერთად "საერთაშორისო წესრიგის დასაცავად“ იმუშაოს.
"ჩინეთი და რუსეთი არიან როგორც მსოფლიოს დიდი სახელმწიფოები, ასევე გაერო-ს უშიშროების საბჭოს მუდმივი წევრები, რომლებიც მნიშვნელოვან როლს ასრულებენ საერთაშორისო საქმეებში. არასტაბილური და ცვალებადი მსოფლიოს პირობებში ჩინეთი მზადაა, საერთაშორისო წესრიგის მტკიცედ დასაცავად რუსეთთან მუშაობა გააგრძელოს“, - აღნიშნულია სი ძინპინის განცხადებაში.
- მისი თქმით, რუს კოლეგასთან, ვლადიმერ პუტინთან შეხვედრის დროს საერთაშორისო და რეგიონალური საკითხების განხილვას გეგმავს.
"მოუთმენლად ველი ვიზიტის დროს პრეზიდენტ პუტინთან ორმხრივ ურთიერთობებსა და საერთაშორისო და რეგიონალურ საკითხებზე სიღრმისეულ განხილვას, რათა შევქმნათ გეგმა ჩინეთ-რუსეთის სტრატეგიული კოორდინაციისა და პრაქტიკული თანამშრომლობისთვის“, - აცხადებს ჩინეთის პრეზიდენტი.
სი ძინპინი რუსეთს უკრაინაში სრულმასშტაბიანი შეჭრის დაწყების შემდეგ პირველად ეწვია.