ვალერი მელაძის საქმეზე რუსეთში გამოძიება დასრულდა - რა ხდება მომღერლთან დაკავშირებით მას შემდეგ, რაც თქვა სიტყვები - "დიდება გმირებს"
რუსეთის ფედერაციის საგამოძიებო კომიტეტმა და გენერალურმა პროკურატურამ მომღერალ ვალერი მელაძის საქმესთან დაკავშირებით გამოძიება დაასრულა. გამოძიება შეეხებოდა დუბაიში, კორპორატიულ წვეულებაზე მელაძის მიერ წარმოთქმულ სიტყვებს - "დიდება გმირებს.“
აღნიშნულის შესახებ კრემლის პროპაგანდისტული მედია წერს. რუსეთში არაერთი პროპაგანდისტი და ჩინოვნიკი ითხოვდა ხელისუფლებისგან, რომ მელაძეს აკრძალვოდა ქვეყანაში შესვლა, გამოეცხადებინათ "უცხო ქვეყნის აგენტად“ და ჩამოერთმიათ მისთვის ქონება.
- "კომპეტენტურმა ორგანოებმა განიხილეს ვიდეო და გადაწყვიტეს, რომ საქმის მასალებში არ არის საკმარისი ობიექტურად დადასტურებული მონაცემები იმის შესახებ, რომ ვალერი მელაძემ კანონი დაარღვია“, - აცხადებენ რუსი სამართალდამცველები.
ცნობისთვის, 2 იანვარს, ვალერი მელაძემ დუბაიში საახალწლო კორპორატიულ წვეულებაზე იმღერა. ერთ-ერთ მომენტში, სცენასთან ახლოს მყოფმა მსმენელმა მიმართა: "Слава Україні!“, რაზეც მელაძემ უპასუხა - " Героям слава." მომღერალმა ეს სიტყვები მიკროფონის გარეშე წარმოთქვა, მიკროფონში კი ყველას გასაგონად თქვა, რომ პოლიტიკას არ ეხება. ვიდეო სოციალური ქსელებით ვირუსულად გავრცელდა.
რუსეთის პარლამენტის ზედა პალატის, ფედერაციის საბჭოს წევრმა ელენა აფანასიევამ ვალერი მელაძის საქციელს "პირუტყვობა" და "ღალატი" უწოდა და მისთვის მოქალაქეობის ჩამორთმევა მოითხოვა.
აღნიშნულის შემდეგ, რუსეთში გაუქმდა ვალერი მელაძის კონცერტები. მას აღარ მისცეს შესაძლებლობა, ემღერა 8 მარტის კონცერტზე Barvikha Luxury Village-ში. თუმცა ახლა რუსულ მედიაში ვრცელდება ინფორმაცია, რომ მელაძე კვლავ გამართავს რუსეთში კონცერტებს.
მომღერლის ოფიციალურ საიტზე გამოქვეყნებული ინფორმაციის მიხედვით, მას 29 აპრილს რუსეთში, ბარნაულში აქვს კონცერტი დაგეგმილი და ბილეთების ყიდვაც ამავე ვებგვერდზეა შესაძლებელი.