პედაგოგი, რომელიც გავრცელებულ ვიდეოში მოსწავლეზე ფიზიკურად ძალადობს, სამსახურიდან გაათავისუფლეს - რა მოხდა გორში? (ვიდეო)
პედაგოგი, რომელიც სოციალური ქსელით გავრცელებულ ვიდეოში მოსწავლეზე ფიზიკურად ძალადობს, სკოლაში აღარ მუშაობს, - ამის შესახებ AMBEBI.GE-ს გორის საგანმანათლებლო რესურსცენტრის დირექტორმა განუცხადა.
ნანა ტერმაკოზაშვილის ინფორმაციით, გეოგრაფიის აღნიშნული მასწავლებლის სკოლიდან გათავისუფლების რეკომენდაციით დირექტორს დისციპლინურმა კომიტეტმა მიმართა.
"მას შემდეგ, რაც გავრცელდა ვიდეო, სადაც გორის მუნიციპალიტეტის ერთ-ერთი სოფლის საჯარო სკოლის პედაგოგი მოსწავლეზე ფიზიკურად ძალადობს - ხელს ურტყამს, სკოლის დისციპლინურმა კომიტეტმა დაიწყო საქმის წარმოება. დისციპლინურმა კომიტეტმა გამოიკვლია საქმისთვის მნიშვნელოვანი ყველა გარემოება, დაადგინა დისციპლინური გადაცდომა და გადაცდომის სიმძიმის ხარისხის გათვალისწინებით, საჯარო სკოლის დირექტორს მიმართა მასწავლებლის სამსახურიდან გათავისუფლების რეკომენდაციით. დირექტორმა გაითვალისწინა დისციპლინური კომიტეტის აღნიშნული რეკომენდაცია და მიიღო შესაბამისი გადაწყვეტილება“, - განაცხადა ნანა ტერმაკოზაშვილმა.
შინაგან საქმეთა სამინისტროს ინფორმაციით, ფაქტზე დაწყებულია გამოძიება საქართველოს სისხლის სამართლის კოდექსის 126-ე მუხლის პირველი პრიმა ნაწილით.
ცნობისთვის, სოციალურ ქსელში გავრცელდა ვიდეო, სადაც ასახულია მასწავლებლის მიერ მეშვიდეკლასელი მოსწავლის ცემის ფაქტი.
ნახეთ ვიდეო: