"დაანაბეთ თავი უთავმოყვარეო სირბილს... პირადად ეჩუქებინა რამე, ნაბადი ან ფაფახი" - ბჟანიას ლავროვის დაჯილდოების გამო აფხაზების ნაწილი აკრიტიკებს
რამდენიმე დღის წინ, ოკუპირებული აფხაზეთის ე.წ. პრეზიდენტმა ასლან ბჟანიამ რუსეთის საგარეო საქმეთა მინისტრი სერგეი ლავროვი აფხაზეთის უმაღლესი ხარისხის "ახძ-აფშას" (ქართულად - დიდება და ღირსება) ორდენით დააჯილდოვა.
ლავროვს ჯილდო "აფხაზეთის რესპუბლიკის დამოუკიდებლობის აღიარებისთვის, აფხაზეთ-რუსეთის სახელმწიფოთაშორისი ურთიერთობების განმტკიცებასა და განვითარებაში შეტანილი დიდი პირადი წვლილისთვის" გადაეცა.
აფხაზური მედიის ცნობით, "ღირსებისა და დიდების პირველი ხარისხის ორდენით" სხვადასხვა დროს, დაჯილდოვებულნი არიან ფაზილ ისკანდერი, ვლადისლავ არძინბა, ედუარდ კოკოითი, დანიელ ორტეგა, უგო ჩავესი, ბაშარ ალ-ასადი, სერგეი შოიგუ, ვლადიმერ პუტინი და დიმიტრი მედვედევი.
მათივე ინფორმაციით, სერგეი ლავროვს ეს ჯილდო, 21 მარტს გადაეცა, იმ დღეს, რუსეთის საგარეო უწყების ხელმძღვანელს 73 წელი შეუსრულდა. ბჟანიას გადაწყვეტილებაზე ადგილობრივ მოსახლეობას სხვადასხვა შეხედულებები აქვთ.
"როგორ ამიხსნით იმას, რომ ყველა მოქმედ პოლიტიკოსს, რომელიც ხელისუფლებაშია, მნიშვნელობა არ აქვს, სხვა ბანაკშია თუ არა, ჩვენ ვაჯილდოვებთ?!.. მეგობრებო, ჩვენი სტრატეგიული პარტნიორი ომშია ჩართული, რატომ დარბიხართ მასთან ჯილდოებით, სხვა საქმე არაფერი გაქვთ?! ყველას გვქონდა ჩვენი შეცდომები. ეს ყველას მოსდის, ვისაც ხელმძღვანელობაში უმუშავია, მაგრამ ერთხელ და სამუდამოდ, დაანაბეთ თავი ამ უთავმოყვარეო სირბილს", - წერს ლავროვის "დაჯილდოვებასთან" დაკავშირებით სოციალურ ქსელში ადგილობრივი პოლიტიკოსი ასლან კობახია.
მას ოკუპირებულ რეგიონში კრიტიკოსებიც გამოუჩდნენ და თანამოაზრეებიც.
"ამ ჯილდოს მარჯვნივ და მარცხნივ, ღვეზელივით იქნევს. ძალიან მალე მის მიმართ პატივისცემა დაიკარგება",- წერენ ადგილობრივები. თუმცა აფხაზურ ოპოზიციაში არიან ისეთებიც, რომლებიც ამ პროტესტის გამო კობახიას აკრიტიკებენ.
"მაშინ, როდესაც ამ ჯილდოს, აფხაზეთსა და რუსეთში, ადამიანებს დაუმსახურებლად აძლევდნენ, თქვენ დუმდით. ახლა კი, საუბარია იმ ადამიანზე, რომელმაც აფხაზეთის დამოუკიდებლობის აღიარებას ხელი მოაწერა. რა არ მოგწონთ?!" - ჰკითხეს კობახიას, რაზეც მან უპასუხა, რომ ის "არასდროს დუმდა."
"ეს ყველაფერი შეჯიბრს მაგონებს. ხელისუფლება ლავროვს აჯილდოვებს. ჩვენ კი, მედვედევს ვახსენებთ. ანუ 15 წელი ვიცდიდით?! დიახ, მე ვეთანხმები კობახიას, ახლა ყველას დაჯილდოების დრო არ არის", - მიაჩნია ახრა ბჟანიას.
სხვების თქმით, ბჟანიას ჟესტი არ არის გულწრფელი, რადგან ახლა ლავროვის დაჯილდოებისთვის შესაფერისი დრო ნამდვილად არ არის. ეს არ ემთხვევა, "აფხაზეთის დამოუკიდებლობის აღიარებას", პირიქით, აფხაზეთს "მთავარი მოკავშირის პოლიტიკის მიმართ უამრავი კითხვა აქვს, თუმცა, ბჟანია მას, "ქვეყნის" მთავარი ორდენით აჯილდოვებს, რაც მადლიერების პირადად გამოხატვას უფრო ჰგავს."
"თუ ლავროვის კეთილგანწყობის მოპოვება, ან გამყარება უნდოდა, შეეძლო, პირადად ეჩუქებინა რამე, ნაბადი ან ფაფახი, როგორც ამას ძირითადად ვაკეთებთ სასურველ სტუმართან დაკავშირებით. ეს ჯილდო უკვე იმდენად გააუფასურეს, რომ შემდეგზე შეიძლება სკოლის მოსწავლეებს გადასცენ.
ხელმძღვანელობას არ ვგულისხმობ, აფხაზი ხალხი არავის წინაშე არ არის ვალში. მაპატიეთ, პირდაპირობისთვის, არძინბა-გვაზავას კადრების შემოყვანის გარდა, რუსეთის საგარეო სამინისტროს სხვა "დამსახურებას აფხაზეთის წინაშე ვერ ვიხსენებ", - წერს ილია ხიშბა.