"წადი უკრაინიდან, რადგან წააგებ" - ვინ არის კაცი, რომელიც სავარაუდოდ, ფინეთის პრემიერი გახდება: პეტერი ორპოს პოლიტიკური კურსი და გზავნილი პუტინს
ფინეთს მალე ახალი პრემიერ-მინისტრი და ახალი მთავრობა ეყოლება. პრემიერ სანა მარინის "სოციალ დემოკრატიული პარტია" საპარლამენტო არჩევნებში დამარცხდა. ხმების 19.9% მოიპოვა და მესამე ადგილზე გავიდა.
- არჩევნებში მემარჯვენე "ეროვნული კოალიციის“ პარტიამ ხმების 20.8%-ით გაიმარჯვა და მეორე ადგილზეა მემარჯვენე პოპულისტური "ფინელების პარტია“ ხმების 20.1%-ით.
სანა მარინმა დამარცხება აღიარა და გამარჯვებული პარტიების ლიდერებს მიულოცა.
"ეროვნული კოალიციის“ პარტიის ლიდერმა, პეტერი ორპომ მედიასთან საუბარში განაცხადა, რომ არჩევნების შედეგები "დიდი გამარჯვებაა“ და დასძინა, რომ მისი პარტია კოალიციის ფორმირებასთან დაკავშირებულ მოლაპარაკებებს უხელმძღვანელებს. არჩევნების შედეგებს მიესალმა მეორე ადგილზე გასული "ფინელების პარტიის“ ლიდერი, რიკა პურაც.
- სავარაუდოდ, ფინეთის პერმიერ-მინისტრის სავარძელს გამარჯვებული პარტიის ლიდერი, კონსერვატორი პეტერი ორპო დაიკავებს.
მისმა პარტიამ საპარლამენტო 200 მანდატიდან 48 მოიპოვა, 43 მანდატი აქვს სანა მარინის პარტიას.
- საზოგადოების ნაწილს აქვს მოლოდინი, რომ მთავრობის ცვლილების შემდეგ ფინეთის პოლიტიკური კურსი მნიშვნელოვნად შეიცვლება, თუმცა ვნახოთ, როგორია რეალობა, ვინ არის და როგორი პოლიტიკური შეხედულებები აქვს ქვეყნის მომავალ პრემიერს, პეტერი ორპოს.
53 წლის ორპოს აქვს მაგისტრის ხარისხი პოლიტიკურ მეცნიერებებში. პოლიტიკაში მოსვლამდე ფინეთის არმიაში მსახურობდა, 2007 წელს დეპუტატის მანდატი მიიღო. 2017 წელს დაინიშნა ვიცე პრემიერად, მოგვინაებით კი პარტიის ლიდერი გახდა. დაქორწინებულია ნიინა კანიაინენზე და ჰყავს ორი შვილი.
- პოლიტიკური შეხედულებები
მიიჩნევა, რომ ორპოს შეხედულებები პარტიის წინამორბედ ლიდერზე ბევრად უფრო კონსერვატიულია. ექსპერტების აზრით, ფინეთის პოლიტიკურ სცენაზე ამგვარი ცვლილება მიანიშნებს, რომ მიიღებენ ახალ მემარჯვენე-ცენტრისტულ მთავრობას, ნაციონალისტური ტონებით.
”მე ვენდობი ფინეთის ტრადიციას, რომ აწარმოო მოლაპარაკებები ყველა მხარესთან და ვცდილობ ვიპოვო საუკეთესო შესაძლებლობა ფინეთის მთავრობის ჩამოსაყალიბებლად.
და იცით რა არის მნიშვნელოვანი? ჩვენ ვართ ევროკავშირის აქტიური წევრები, ვაშენებთ ნატო-ფინეთს, ვცდილობთ, გამოვასწოროთ ჩვენს ეკონომიკაში არსებული მდგომარეობა, ვქმნით ახალ სამუშაო ადგილებს. ეს არის გადამწყვეტი, მთავარი, მნიშვნელოვანი საკითხები, რომლებიც უნდა ჩავწეროთ სამთავრობო პროგრამაში“. - უთხრა ორპომ AP-ს.
სანა მარინმა საერთაშორისო დონეზე უდიდესი მხარდაჭერა მოიპოვა იმისთვის, რომ უკრაინას ყოველთვის ღიად და ხმამაღლა უჭერდა მხარს რუსეთის წინააღმდეგ ბრძოლაში, ფინეთის ნატოში გაწევრების განაცხადების წარმატებული ადვოკატირებისთვის.
- ორპოს პოზიციაც უკრაინასთან დაკავშირებით მკვეთრია და მხარს უჭერს ქვეყანას რუსეთთან ომში.
"ჩვენ თქვენ გვერდით ვდგავართ, თქვენთან ერთად. ვერ მივიღებთ ამ საშინელ ომს. ყველაფერს გავაკეთებთ, რომ დავეხმაროთ უკრაინას, უკრაინელ ხალხს, რადგან ისინი ჩვენთვის იბრძვიან. ეს ნათელია.
და გზავნილი ვლადიმირ პუტინისთვის ასეთია - წადი უკრაინიდან, რადგან წააგებ", - აცხადებს ორპო.
შეგახსენებთ, ფინეთის პრეზიდენტი, საული ნიინისტო სამშაბათს ბრიუსელში გაემგზავრება, რათა ნატო-ს შტაბ-ბინაში გაწევრების ცერემონიას დაესწროს, რომელზეც ოფიციალურად აღინიშნება ქვეყნის სამხედრო ალიანსში წევრობის დაწყება.
ნატოს გენერალური მდივნის, იენს სტოლტენბერგის თქმით, ფინეთის ნატოში გაწევრების აღსანიშნავად დროშის აღმართვის ცერემონია გაიმართება.
"ჩვენ პირველად ავწევთ ფინეთის დროშას აქ ნატო-ს შტაბ-ბინაში. ეს კარგი დღე იქნება ფინეთის უსაფრთხოებისთვის, სკანდინავიური ქვეყნების უსაფრთხოებისთვის და მთლიანად ნატო-სთვის“, - განუცხადა მან ჟურნალისტებს.