ფრანგი მინისტრი "ფლეიბოის" გარეკანზე - ვინ არის ქალი, რომელსაც პოპულარული ჟურნალისთვის პოზირების გამო აკრიტიკებენ (ფოტოები)
საფრანგეთის სოციალური საკითხების მინისტრი მარლენ შიაპა საზოგადოების კრიტიკის ობიექტი გახდა მას შემდეგ, რაც პოპულარული ჟურნალის, Playboy-ის ფრანგული გამოცემისთვის იპოზიორა.
ფოტოები ჟურნალის აპრილის გამოცემაში დაიბეჭდება და გარეკანზეც მინისტრის ფოტო იქნება. აღსანიშნავია, რომ გადაღებაზე მარლენ შიაპა სრულად შიშველი არ ყოფილა.
მინისტრის ამგვარმა ნაბიჯმა მისი პოლიტიკური ოპონენტების და კოლეგების აღშფოთება გამოიწვია. ის პრემიერმა ელიზაბეტ ბორნმაც გააკრიტიკა და თქვა, რომ "საფრანგეთში მიმდინარე მოვლენების ფონზე ამგვარი ნაბიჯის გადადგმა სულაც არ იყო შესაბამისი.“ (ცნობისთვის, ბოლო კვირების განმავლობაში საფრანგეთში სამართალდამცველებსა და მომიტინგეებს შორის შეტაკებები იყო. საპროტესტო აქციები საპენსიო რეფორმებს უკავშირდება).
აღნიშნულ თემაზე კომენტარი გააკეთა მწვანეთა პარტიის წარმომადგენელმა, დეპუტატმა და ქალების უფლებადამცველმა სანდრინ რუსომ. მისი თქმით, ქალს ყოველთვის უნდა შეეძლოს გააკეთოს ის, რაც სურს, თუმცა არსებობს სოციალური კონტექსტი. რუსო მიიჩნევს, რომ საფრანგეთში მიმდინარე მოვლენების ფონზე, მინისტრის გადაწყვეტილება, გამოჩნდეს "ფლეიბოიში", მიუღებელია.
მარლენ შიაპა კრიტიკას "ტვიტერზე" გამოეხმაურა. "ქალების უფლებაა, გააკეთონ ის, რაც სურთ, ყველგან და ყოველთვის. საფრანგეთში ქალები თავისუფალნი არიან“, - წერს მინისტრი.
40 წლის მარლენი არის ფემინისტი, ფემინისტური წიგნების ავტორი. სანამ პოლიტიკურ კარიერას დაიწყებდა, დაწერა წიგნი დედობის გამოწვევებზე, ქალის ჯანმრთელობასა და ორსულობაზე.
2017 წელს მას ბრალი წაუყენეს იმისთვის, რომ ეწვია ისეთ ადგილს, სადაც "ქალები არ დაიშვებოდნენ.“
Playboy-ის ფრანგულენოვანი გამოცემის რედაქტორმა მხარი დაუჭირა მინისტრის გადაწყვეტილებას, რომ ფოტოები გადაეღო გამოცემისთვის.
"მაკრონის მინისტრთა კაბინეტიდან ის "ფლეიბოისთან" ყველაზე თავსებადი ქალია ქალთა უფლებების დაცვის კუთხით ხმამაღალი განცხადებების გამო", - ამბობს ჟურნალის რედაქტორი.