უკრაინამ ვიქტორ მედვედჩუკის ცოლზე ძებნა გამოაცხადა
უკრაინის უსაფრთხოების სამსახურმა ყოფილ ტელეწამყვანზე და პრორუსი პოლიტიკოსის, ვიქტორ მედვედჩუკის მეუღლეზე ოქსანა მარჩენკოზე ძებნა გამოაცხადა. ამის შესახებ უკრაინის შინაგან საქმეთა სამინისტრო იტყობინება.
- საგამოძიებო უწყება ქალს ედავება იმ ქმედებების დაფინანსებას, რომლებიც ჩადენილია უკრაინის კონსტიტუციური წესრიგის ძალადობრივი ცვლილების, დამხობის, ხელისუფლების ხელში ჩაგდების და სახელმწიფო საზღვრის შეცვლის მიზნით.
მიმდინარე წლის თებერვალში სასამართლომ ყადაღა დაადო მარჩენკოს ქონებას. როგორც უკრაინული მედია წერს, მარჩენკომ უკრაინის ტერიტორია რუსეთის სრულმასშტაბიანი შეჭრის დაწყებამდე ცოტა ხნით ადრე დატოვა.
- შეგახსენებთ, ვლადიმერ პუტინთან დაახლოებული უკრაინელი პოლიტიკოსი, უკრაინის ოპოზიციური პლატფორმა "სიცოცხლის" ლიდერი, რომლის ქონება 2021 წელს ჟურნალმა "ფორბსმა" 620-მილიონ დოლარად შეაფასა, პატიმრობაში იმყოფებოდა. თებერვლის ბოლოს, რუსეთის ძალების უკრაინაში შეჭრის შემდეგ, უკრაინის ოფიციალურმა პირებმა განაცხადეს, რომ მედვედჩუკი შინაპატიმრობიდან გაიქცა. მისმა ადვოკატმა "როიტერსს“ უთხრა, რომ მედვედჩუკი იძულებული გახდა დაეტოვებინა ადგილი, კონფლიქტის ფონზე "ნაციონალისტური ჯგუფების მუქარის გამო".
12 აპრილს კი ცნობილი გახდა, რომ მედვედჩუკი უკრაინელმა სამართალდამცველებმა დააკავეს. დაკავებისას მას უკრაინის ჯარისკაცის ფორმა ეცვა. მას ბრალი წაუყენეს სახელმწიფოს ღალატისა და ტერორისტული საქმიანობის მხარდაჭერის მუხლებით.
უკრაინის პრეზიდენტმა, ვოლოდიმირ ზელენსკიმ პუტინს მედვედჩუკის უკრაინელ ტყვეებში გაცვლა მისი დაკავებიდან მალევე შესთავაზა, თუმცა რუსი დიქტატორი ნათლიმამის გათავისუფლებას არ ჩქარობდა. მოგვიანებით, როცა მხარეები ტყვეთა გაცვლაზე შეთანხმდნენ, მედვედჩუკი რუსეთისთვის გადაცემულებს შორის იყო.