პუტინისა და ზელენსკის სიკვდილი, დარტყმა კრემლზე - რა წერია პენტაგონიდან გაჟონილ დოკუმენტებში რუსეთ-უკრაინის კონფლიქტის გაგრძელების სავარაუდო სცენარებზე
პენტაგონიდან გაჟონილ საიდუმლო დოკუმენტებში სხვადასხვა საკითხთან ერთად, საუბარია სცენარებზე, რომლის მიხედვითაც შეიძლება განვითარდეს რუსეთის ომი უკრაინის წინააღმდეგ. აღნიშნული სცენარები შეფასებულია, როგორც "გაუთვალისწინებელი" და "მოულოდნელი."
განხილულია, თუ რა იქნება ამერიკის შეერთებული შტატების სამოქმედო გეგმა თითოეული ამ სცენარის განვითარების შემთხვევაში.
ფაილების შინაარსს "ნიუ იორკ თაიმსი" აქვეყნებს. როგორც გამოცემა წერს, პენტაგონიდან გაჟონილი დოკუმენტების მიხედვით, "სავარაუდო სცენარები ეყრდნობა ანალიზს, რომელიც თავდაცვის სადაზვერვო სააგენტომ სრულმასშტაბიანი ომის დაწყებიდან ერთი წლის განმავლობაში ჩაატარა."
ჰიპოთეტური სცენარები მოიცავს შემდეგს:
- ვლადიმერ პუტინის სიკვდილი
- ვოლოდიმირ ზელენსკის სიკვდილი
- რუსეთის შეიარაღებულ ძალებში ხელმძღვანელობის შეცვლა
- კრემლზე უკრაინის დარტყმა
დოკუმენტში აღნიშნულია, რომ ომი, ალბათ, საკმაოდ გაჭიანურდება. გაზეთი ხაზს უსვამს, რომ ასეთი დოკუმენტები სადაზვერვო სამსახურებისთვის ტიპური პროდუქტია და ჩვეულებრივი რამ არის. მათ ქმნიან იმისთვის, რომ სამხედრო ოფიცრებმა, პოლიტიკოსებმა, ან კანონმდებლებმა, იფიქრონ მოვლენების შესაძლო განვითარებაზე, დაინახონ ესა თუ ის ამბავი უფრო ფართო სპექტრში და გრძელვადიან პერსპექტივაში, დასახონ სამოქმედო გეგმა.
- ჰიპოთეტური სცენარებიდან ერთ-ერთია, თუ რა შეიძლება მოხდეს, თუ უკრაინის სამხედრო ძალა, მოსკოვს, კრემლს დაარტყამს. ჩამოთვლილია პოტენციური შედეგების ფართო სპექტრი. ნათქვამია, რომ ამ მოვლენას შეიძლება ესკალაცია მოჰყვეს, ნავარაუდებია, რომ პუტინი უპასუხებს საზოგადოების პროტესტს სრულმასშტაბიანი სამხედრო მობილიზაციის წამოწყებით და ტაქტიკური ბირთვული იარაღის გამოყენების საკითხის განხილვით. ან რუსულ საზოგადოებაში გაჩენილმა შიშმა, პროტესტმა და მათი მხრიდან ხელისუფლებაზე ზეწოლამ შესაძლოა, მოლაპარაკებებისთვის იმპულსი გააჩინოს, აიძულოს პუტინი, რომ დაჯდეს მოლაპარაკების მაგიდასთან.
ასევე აღნიშნულია, რომ ბაიდენის ადმინისტრაცია განსაკუთრებით შეშფოთებულია უკრაინის მიერ მოსკოვზე შესაძლო დარტყმის გამო, რადგან მიიჩნევენ, რომ ამან შეიძლება გამოიწვიოს რუსეთის მხრიდან დრამატული ესკალაცია.
ნათქვამია ისიც, რომ უკრაინის ასეთი თავდასხმის საშიშროება არის ერთ-ერთი მიზეზი, რის გამოც შეერთებულ შტატებს არ სურდა კიევისთვის უფრო გრძელი რადიუსის რაკეტების მიწოდება.