"ჩვენი სახსრებით მოვახერხეთ ეს ყველაფერი" - ნიკა მელია ბაჩო დოლიძესთან და სხვა პირებთან ერთად ახალ ოფისს ხსნის: როგორ აფასებენ "ნაცმოძრაობაში გადაწყვეტილებას?
გაუგონარია თუ რას ემსახურება პოლიტიკური ოფისის არსებობა, სადაც შეკრებილები თავს „ერთიანი ნაციონალური მოძრაობის” წევრებად ასაღებენ და ამავდროულად ესხმიან მას, - ამის შესახებ ნათქვამია "ერთიანი ნაციონალური მოძრაობის“ განცხადებაში, რომლითაც პარტია ნიკა მელიას მიერ ახალი ოფისის გახსნას ეხმაურება. როგორც განცხადებაშია აღნიშნული, „ერთიან ნაციონალურ მოძრაობას“ უმაღლესი ლეგიტიმაციით არჩეული თავმჯდომარე და არჩევნების შედეგად ჩამოყალიბებული მმართველობითი ორგანოები ჰყავს.
"ყველას აქვს უფლება ჰქონდეს საკუთარი პოლიტიკური დღის წესრიგი, დამოუკიდებლად თუ სხვა პოლიტიკური პარტიის შემადგენლობაში.
მათ შეუძლიათ ჩამოაყალიბონ ახალი პარტია და, შესაბამისად, განსაზღვრონ საკუთარი პოლიტიკა თუმცა, ღარიბაშვილის, კობახიძის, ტვ “იმედის”, პოსტივის" და "ქართული ოცნების” რიტორიკით, “ერთიანი ნაციონალური მოძრაობის” სახელით, ჩვენ პარტიაზე განხორციელებული თავდასხმები სრულიად აუხსნელი მოვლენაა. მათ მიერ გაჟღერებული გზავნილები პირდაპირ ხელს აძლევს “რუსული ოცნების” მტრული პროპაგანდის განმტკიცებას.
გაუგონარია თუ რას ემსახურება პოლიტიკური ოფისის არსებობა, სადაც შეკრებილები თავს „ერთიანი ნაციონალური მოძრაობის” წევრებად ასაღებენ და ამავდროულად ესხმიან მას.
პარტიას თბილისში, მათ შორის ცენტრალურ უბნებში, რამდენიმე ოფისი აქვს, სადაც ჩვენი თანაგუნდელები რუსული რეჟიმის წინააღმდეგ მუშაობენ და საქმიანობენ.
სეპარატიზმის მცდელობები აზიანებს პარტიის საუკეთესო ინტერესებს. სწორედ ამიტომ, მოვუწოდებთ ყველას, აღიარონ და შეეგუონ პირდაპირი და მაღალი ლეგიტიმაციით ჩატარებული არჩევნების შედეგები. ყველა, ვინც საკუთარ თავს “ერთიანი ნაციონალური მოძრაობის” წევრად მივიჩნევთ, ჩვენი პოლიტიკური ორგანიზაციის კუთვნილ სივრცეებში, ერთ პარტიაში უნდა ვიმუშაოთ.
"ქართული ოცნებისთვის" დამახასიათებელი რიტორიკით, გაუგებრობის და ბუნდოვანების შემოტანა, არ ემსახურება არც პარტიისა და არც სახელმწიფოს ინტერესებს“, - ნათქვამია განცხადებაში.
"ტვ პირველის" ინფორმაციით, "ნაციონალური მოძრაობის" ყოფილმა თავმჯდომარემ მის თანაგუნდელებთან ერთად ახალი ოფისი იქირავა. ინფორმაცია ტელეკომპანიას ბაჩო დოლიძემ დაუდასტურა. მისი თქმით, ოფისი ცოტა ხნის წინ იქირავეს. როგორც დოლიძე ამბობს, საკუთარი სახსრებით იხდიან ოფისის ხარჯებს. მისი ინფორმაციით, ენმ-ის წევრებს ახალი ინფორმაცია რამდენიმე დღის წინ მოაწოდეს.
"ჩვენი სახსრებით მოვახერხეთ ეს ყველაფერი და მიხარია, რომ ბევრი ადამიანი გამოჩნდა, რომელსაც სურვილი აქვს, ჩვენს გვერდით დადგეს" - ამბობს ბაჩო დოლიძე.