ომისგან განადგურებული საფეხბურთო კლუბი "მარიუპოლი" ბრაზილიაში "დაიბადა" - ადგილობრივი გუნდი "მარიუპოლის" ფორმას, ლოგოს და გერბს მიიღებს

სამხრეთ ბრაზილიაში, პრუდენტოპოლისის რეგიონის, პარანაში საფეხბურთო კლუბმა AA Batel-მა, უკრაინელების მხარდასაჭერად გადაწყვიტა, რომ საფეხბურთო კლუბი "მარიუპოლი" გახდეს. "მარიუპოლი" უკრაინაში უმაღლესი კლასის გუნდი იყო, რომელიც რუსეთის შეჭრის შედეგად დაიშალა.

გუნდის ოფიციალური განცხადების თანახმად, ისინი ჩაიცვამენ მარიუპოლის გუნდის შესაბამის სამოსს, მიიღებენ მათ გერბს და ლოგოს. აღსანიშნავია, რომ ბრაზილიის ამ ნაწილში ბევრი უკრაინელი ცხოვრობს და ადგილობრივები ამბობენ, რომ "ეს კლუბი ასეთი ნაბიჯის შემდეგ კიდევ უფრო მეტად გახდება მათი იდენტობის ნაწილი".

• "უკრაინა ყოველთვის მხარს უჭერდა ფეხბურთის დიდ ბრაზილიურ ნიჭს და მნიშვნელოვან კარიბჭეს ქმნიდა ევროპულ ბაზარზე ჩვენი ფეხბურთელების გასასვლელად. ახლა კი ეს ნაბიჯი ყველაზე მცირეა, რაც შეგვიძლია გავაკეთოთ, რათა დავეხმაროთ მათ კლუბის სიცოცხლის შენარჩუნებაში და იმედი მივცეთ უკრაინელებს მთელ მსოფლიოში“, - ამბობს AA Batel-ის პრეზიდენტი, ალექს ლოპესი.

ამბავს მარიუპოლის დაშლილი კლუბის ვიცე-პრეზიდენტი, ანდრეი სანინიც გამოეხმაურა და მადლიერება გამოხატა.

"ჩვენ მადლიერები ვართ AA Batel-ის ასეთი სითბოსთვის. ომმა გაანადგურა ჩვენი ქალაქი. არაერთმა კლუბმა მთელი მსოფლიოდან შემოგვთავაზა მსგავსი რამ. ჩვენი ისტორიის შენარჩუნება, ჩვენი სახელის ამ ბნელ პერიოდში - შეუძლებელია იმის გამოხატვა თუ რამდენს ნიშნავს ეს ჩვენთვის“, - ამბობს ანდრეი სანინი.