ფოტო ზარქუასთან: მელია ბეჟაშვილის ვიცე-სპიკერობის კანდიდატად დარეგისტრირებას, "ოცნებასთან" კოლაბორაციად მიიჩნევს - რას პასუხობს მას ანა წითლიძე?
მას შემდეგ, რაც ლევან იოსელიანმა სახალხო დამცველის პოსტი დაიკავა, პარლამენტის ვიცე-სპიკერის პოსტი ოპოზიციის კვოტით ვაკანტურია. ორი დღის გავრცელებული ინფორმაციით, ახალი კანდიდატი სავარაუდოდ, "ნაციონალური მოძრაობის" წევრი, ლევან ბეჟაშვილი იქნება. საკითხი გუშინ ბიუროს სხდომაზე დარეგისტრირდა. ლევან ბეჟაშვილის კანდიდატურას უახლოეს პლენარულ სესიაზე უყრიან კენჭს.
ლევან ბეჟაშვილის კანდიდატურის დარეგისტრირების შემდეგ, ენმ-ს ყოფილმა თავჯდომარემ ნიკა მელიამ სოციალურ ქსელში ფოტო გაავრცელა, სადაც ჩანს, რომ პოლიტიკოსის მხარზე "ოცნების" დეპუტატი ირაკლი ზარქუაა დაყრდნობილი. მელიას თქმით, სწორედ ასე გამოიყურება კოლაბორაცია დღეს.
"ამ ადამიანმა ბიუროზე დააფიქსირა სურვილი, გახდეს ქართული ოცნების ხელით პარლამენტის ვიცე-სპიკერი. ირაკლი ზარქუა არ ჩანს წინააღმდეგი, ასე გამოიყურება კოლაბორაცია დღეს! როდესაც იბრძვი ავტორიტარული, ღიად რუსული რეჟიმის წინააღდმეგ, მას შემდეგ რაც ხელისუფლება დაუფარავად მიაქანებს ქვეყანას გეოპოლიტიკური და ცივილიზაციური ჩიხისკენ; გყავს საპარლამენტო უმრავლესობა, რომელიც სრული შემადგებლობით იღებს რუსულ კანონს, როდესაც ქვეყანაში არსებობენ პოლიტპატიმრები და ქვეყნის ღირსებისა და ევროპული კურსის შენარჩუნება ქართველის ხალხის პრინციპულობაზე, სიმყარეზე, ღირსებაზე და ისტორიული არჩევანის პატივიცემაზე გადის, ქართული ოცნების დეპუტატი, მხოლოდ პოლიტიკური ოპონენტი კი არა, ქვეყნის მომავლის მტერია. მტერი, რომელთან გამარჯვებაც მხოლოდ მორალური უპირატესობით და ღირსებითა და პრინციპულობით შეიძლება. "ნაციონალურ მოძრაობაში" არ არის შიდა დაპირისპირება, ეს არის ზუსტად ისეთივე ღირებულებითი და პრინციპული შეუთავსებლობა, როგორიც გვაქვს ყველა კოლაბორაციონისტთან!"
მელიას პოსტსა და გავრცელებულ ფოტოს სოციალურ ქსელში ენმ-ს დეპუტატი ანი წითლიძე გამოეხმაურა. მისი თქმით, ფოტო კომპრომატი არ არის და თავადაც გამოაქვეყნა ზარქუასთან გადაღებული ფოტო.
ანი წითლიძე:
"მე ვდებ წინასწარ და "კომპრომატად" გამოგადგებათ. 2015 წელს ზუგდიდში მარშუტკის მძღოლების აქცია იყო. ღამეებს ათენებდნენ. მე ცხადია მათთან ერთად ვიყავი. ამ აქციაზე მოვიდა სუს-ის მაშინდელი უფროსი რეგიონში გოგი ნაჭყებია. ვინც აქციაზე ვიდექით (ასე 30 ადამიანი) ხელი ჩამოგვართვა ყველას. ცხადია მეც. ეგ ფოტო სადაც მარტო მე და გოგი ვჩანდით როგორ ვართმევ ხელს და მიღიმის, მერე გამომიქვეყნეს დაახლოებით იგივე ტექსტით რაც ბეჟაშვილზე მოხდა. ის ადამიანები მერე მაგას რომ დაათრევდნენ სად არიან აღარ ვიტყვი.
ახლა რაც შეეხება ბეჟაშვილის ვიცე-სპიკერობას - ვიცე სპიკერობის კვოტა არის ოპოზიციის. უფრო სწორედ ყველაზე დიდი ოპოზიციური ფრაქციის. წინაზე ჩვენ რომ არ ვიყავით პარლამენტში ამიტომ აირჩია ლევან იოსელიანი ოცნებამ "ოპოზიციიდან ვიცე სპიკერად" რომელიც მერე მიშაზე იძახდა პოლიტ პატიმარი არ არისო. ახლა ან ჩვენ უნდა წარგვედგინა ან ჩვენს შემდეგ თუ ჩვენ არ წარვადგენდით წარადგენდა "ხალხის ძალა" ყაველაშვილ/ხუნდაძე.
შესაბამისად, მივიღებდით იმას, რომ ვიცე - სპიკერი ოპოზოციიდან ან კოლექტიური ყაველაშვილი გვეყოლებოდა ან ფრიდონ ინჯია. ვფიქრობ, რომ ძალიან სწორად მოვიქეცით, მიუხედავად იმისა რომ გარანტია აირჩევა თუ არა ჩვენი წარდგენილი კანდიდატი არ არსებობს. ჩააგდებენ, კიდევ დავაყენებთ, კიდევ ჩააგდებენ კიდევ - მაგრამ კოლექტიური ყაველაშვილების არჩევის მარტივად საშუალებას არ მივცემთ.
კანონში და რეგლამენტში პირდაპირ წერია, რომ ეგ კვოტა არის მხოლოდ ოპოზიციის. ამიტომ ქართული ოცნების ხმების მიუხედავად მის კეთილ ნებაზე ეს არ არის დამოკიდებული. ან მოუწევს მხარი დაუჭიროს ან ჩააგდებს და აირჩევს სატელიტ კოლექტიურ ყაველაშვილებს.
ახლა იმაზე რაც იკადრეთ: შუბლისძარღვს თუ გაიწყვიტავთ - რა თქმა უნდა ყველაფრის კადრება შეგიძლიათ. უბრალოდ ამის ფასს გადაიხდით ამომრჩეველთან.ჩემი და ზარქუას ფოტოსაც გიდებთ "კომპრომატად." თქვენს პოლიტიკურად გაკოტრებულ ამბავს იქნებ ესეც გამოგადგეთ და რამე ნიუსი შექმნათ.
აქ წალენჯიხაზე ვკამათობთ, ამის შემდეგ გარეთ გავაგრძელეთ კამათი. ისე ქოცებთან უფრო ახლო ფოტოებიც არსებობს თქვენი ვიწრო გუნდიდან ეროვნულ თუ მუნიციპალურ დონეზე. ფოკუსის გამსწორებელს არ გავხართ, სამწუხაროდ.როგორ ასრულებენ ასეთ დროს მინახავს. ასევე სამწუხაროდ.კომენტარებს ამ საღამოს ვერ წავიკითხავ, მძიმე დღე მქონდა და ვითიშები დრო ისე ცხადად ანახებს ყველაფერს როგორც დაგიბარებიათ და როგორც არასოდეს. ვისაც არ ეხება ეს სტატუსი ბოდიში. ვისაც ეხება თავს ამოიცნობს".