ავტორი:

წალენჯიხაში "იუვენტუსის“ აკადემია გაიხსნა

წალენჯიხაში "იუვენტუსის“ აკადემია გაიხსნა

წალენჯიხაში "იუვენტუსის“ აკადემია საზეიმოდ გაიხსნა და კონტრაქტს ოფიციალურად მოეწერა ხელი. ამის შესახებ ინფორმაციას "ლელო“ ავრცელებს.

ასევე აკადემიის აღსაზრდელებს გადაეცათ ფორმები და სრული ეკიპირება

წალენჯიხის "იუვენტუსის“ აკადემიაში იტალიიდან Uefa A ლიცენზირებული მწვრთნელი და ქართველი Uefa B ლიცენზირებული მწვრთნელები ასწავლიან. ასევე დაგეგმილია ვიზიტები ტურინის "იუვეტუსიდან“, მათ შორის მწვრთნელები ჩამოვლენ მასტერკლასებზე.

"ლელოს“ ცნობით, "იუვენტუსთან“ მიმდინარეობს ასევე მოლაპარაკებები რამდენიმე საინტერესო, სამომავლო პროექტებთან დაკავშირებით.

"თუ ყველანი მიზანდასახულობით არ ავივსეთ, დიდ წარმატებებს ვერ მივაღწევთ. ეს პროექტი ამის ერთ-ერთი ამის ნათელი და კარგი მაგალითია. "იუვენტუსის“ წალენჯიხაში ჩამოყვანა და აკადემიის გახსნა, მარტივი არ იყო, მაგრამ ჩვენ ეს მოვახერხეთ, ისევე როგორც სხვა პროექტები, რომელსაც ვაკეთებთ და კიდევ ბევრს დავაანონსებთ.

მინდა მივულოცო ამ ბავშვებს. მათ თვალებში ჩანს ყველაფერი, ის სიხარული და პერსპექტივა, რომელსაც ისინი დღეს ეზიარნენ. ასევე, მადლობას ვუხდი მხარდაჭერისთვის ყველა წალენჯიხელს, რადგან მათი მხარდაჭერის გარეშე ბევრი რამ არ გამოვიდოდა. ეს არის ნათელი მაგალითი, როცა სამშობლოზე, კონკრეტულ საქმეზეა ორიენტირებული პოლიტიკა, არ აქვს მნიშვნელობა, რომელი პარტიის წარმომადგენელი ხარ, მთავარია, რომ ჩვენ ყველა საქმეზე ვიყოთ ორიენტირებული, ჩვენი შვილებისა და ჩვენი მომავლის ცხოვრებაზე, მათ განათლებასა და ჩვენი ქვეყნის წინსვლაზე. წალენჯიხა ამის ძალიან ნათელი მაგალითია და ჩვენ ვაჩვენებთ დანარჩენ საქართველოს, რომ კამათი კარგია, მაგრამ შეთანხმება კონკრეტულ საქმეებზე არის ძალიან მნიშვნელოვანი.

დღეს იყო ე.წ. Soft opening, იმიტომ რომ ბავშვებმა დღეს უკვე მიიღეს მთელი ეკიპირება და დაიწყეს ვარჯიში. ვარჯიშები იტალიელი და იტალიაში გადამზადებული ქართველი მწვრთნელების ხელმძღვანელობით გაიმართება. სექტემბერში კი იქნება ძალიან დიდი გახსნა, სადაც დავპატიჟებთ ფეხბურთის ფედერაციას და ყველა იმ ხალხს, ვინც ფეხბურთს გულშემატკივრობს, მონაწილეობდა წარსულში ფეხბურთში იმისათვის, რომ ვაჩვენოთ, რომ საქართველო არამარტო ფეხბურთის და წარმატებული ქვეყანაა, არამედ ძალიან ბევრი ნიჭიერი ადამიანის ქვეყანაა.კვარაცხელიას სამშობლოსა და კუთხეში, მე ვისურვებდი, რომ ძალიან ბევრი ხვიჩასნაირი ბიჭები და კიდევ უკეთესები გაიზარდონ“, - აცხადებს "ლელოს“ ლიდერი მამუკა ხაზარაძე.

"ლელოს“ ინფორმაციით, სექტემბრისთვის კიდევ ერთი ღონისძიება იგეგმება, რომელსაც ტურინის "იუვენტუსიდან“ ჩამოსული სტუმრები, გუნდის ლეგენდარული ფეხბურთელები და ქართველი ვეტერანი სპორტსმენები დაესწრებიან.