"პანიკის საფუძველი არ გვაქვს, მაგრამ მდგომარეობა საყურადღებოა" - რა ვითარებაა ცოფის გავრცელების მხრივ თბილისსა და რეგიონებში: სტატისტიკა, დაავადების სიმპტომები, რჩევები
სურსათის ეროვნული სააგენტოს ცხოველთა განსაკუთრებით საშიში ინფექციური დაავადებების ზედამხედველობის სამმართველოს უფროსის მოადგილის, თენგიზ ჩალიგავას განცხადებით, წელს საქართველოში ცოფის 46 დადასტურებული შემთხვევაა დაფიქსირებული. როგორც მან განმარტა, ეს შემთხვევები საყურადღებოა, რადგან თითოეულ ძაღლს, შესაძლოა, რამდენიმე ადამიანთან ჰქონოდა შეხება.
"ვინაიდან დაავადება არის ენდემური, საქართველოში ყოველ წელს გვაქვს გამოვლინებები. წელს არის 46 დადასტურებული შემთხვევა, რაც ნიშნავს იმას, რომ ცხოველების უმეტესობა იყო აუცრელი და როცა ცხოველი არის აუცრელი, ყოველთვის თავს იჩენს დაავადება, რადგან ქვეყანაში ვირუსი ცირკულირებს. მნიშვნელოვანია ყველა ადამიანმა გაითავისოს, რომ თავისი ცხოველი დაცული და აცრილი იყოს ამ დაავადების საწინააღმდეგოდ. ჩვენ ვერ ვიტყვით იმას, რომ განსაკუთრებული აფეთქება არის, რადგან ეს შემთხვევები ქვეყანაში ყოველ წელს ფიქსირდება, თუმცა არის საყურადღებო, ვინაიდან ყოველი შემთხვევა ნიშნავს იმას, რომ თითოეულ ძაღლს შეიძლება ჰქონდეს რამდენიმე ადამიანთან შეხება, დააინფიციროს სხვა ცხოველი და დაავადება გავრცელდეს. ყველას შევახსენებთ, რომ ეს დაავადება არის ლეტალური.
- ცოფი 100%-ით კლავს, თუმცა, ამასთანვე, დადებითი მხარე ის არის, რომ დაავადება არის მარტივად კონტროლირებადი. არსებობს ვაქცინები, რომელთა გამოყენების შემთხვევაში, ცხოველი აბსოლუტურად უვნებელია და ჩვენ შეგვიძლია დაავადების გავრცელება თავიდან ავირიდოთ“,-განაცხადა თენგიზ ჩალიგავამ.
მისი თქმით, სურსათის ეროვნული სააგენტო პატრონიან ცხოველებს ცრის, თუმცა, თუ მიმართვიანობა იქნება, ცოფზე სხვა ცხოველებსაც აცრის.
"რაც შეეხება უპატრონო და მიკედლებულ ცხოველებს, თუ იქნება მომართვიანობა ადგილობრივი თვითმმართველობის ან მიკედლებული პირის მხრიდან, სურსათის ეროვნული სააგენტო მზად არის, რომ ამ ცხოველებშიც პროფილაქტიკური ვაქცინაცია ჩაატაროს. მინდა მოვუწოდო მოსახლეობას ან იმ პირებს, რომლებიც პასუხისმგებლობას იღებენ უპატრონო ძაღლებზე, აიღონ პასუხისმგებლობა მათ ვაქცინაციაზეც, რადგან ვაქცინაციის გარეშე ჩვენ ვერ მოვახერხებთ ცოფის დაავადების შემცირებას და შესაბამისად, გამოვლინებები ყოველ წელს იქნება“,- განაცხადა თენგიზ ჩალიგავამ მედიაჰოლდინგ "კვირას“ პრესკლუბში.
ცხოველთა მონიტორინგის სააგენტოს დირექტორის გიორგი კობიაშვილის განცხადებით, წელს, თბილისში ცოფის ორი შემთხვევა გამოვლინდა.
მან მედიაცენტრ "მთავარში“ გამართულ პრესკონფერენციაზე საზოგადოებას მიმართა, რომ საჭიროების შემთხვევაში ცხოველთა მონიტორინგის სააგენტოს მიმართონ და ისინი სრულიად უსასყიდლოდ აცრიან ცხოველს ცოფის საწინააღმდეგო ვაქცინით.
- "წელს, თბილისში ორი გამოვლენილი შემთხვევა გვაქვს. მაგალითად, 2022 წელს ჩვენს დედაქალაქში ცოფის არცერთი შემთხვევა არ იყო. მინიმუმამდე არის თბილისში ცხოველებში ცოფის შემთხვევები გამოვლენილი“, - განაცხადა გიორგი კობიაშვილმა.
მისივე თქმით, საყურადღებოა ის ფაქტი, რომ მეპატრონეებმა, რომლებსაც დაჰყავთ საკუთარი ცხოველი, მაგალითად სანადიროდ, სასურველია, ერთზე მეტჯერ აცრან ცოფის ვაქცინით.
- მან ასევე განმარტა, თუ რა სიმპტომები ახასიათებს ცოფის დროს ძაღლს.
"შეიძლება ამ ძაღლს ყლაპვა გაუჭირდეს იმიტომ, რომ როდესაც ნერვულ სისტემაში გადადის ცოფის ვირუსი, ამის შემდეგ უკვე ხდება კუნთოვანი სისტემის დაზიანება. ასევე ჰალუცინაციებსაც იწვევს ცხოველებში და ყლაპვა ურთულდებათ, როგორც საკვების, ასევ წყლის. როდესაც შევნიშნავთ ცხოველს ისეთ ქცევას, რაც მისთვის არადამახასიათებელია, სასურველია, მაშინვე მივმართოთ ვეტერინარს“, - განაცხადა გიორგი კობიაშვილმა.
როგორც მან განმარტა, აცრები მასობრივად არ ტარდება და გარკვეული რისკი არის, რომ ცოფი მარტივად და სწრაფად გავრცელდეს.
"საბედნიეროდ, ჩვენს დედაქალაქში საგანგაშო მდგომარეობა არ გვაქვს და არავითარი პანიკის საფუძველი არ არსებობს. როგორც ცხოველთა მონიტორინგის სააგენტო, ასევე სურსათის ეროვნული სააგენტო აქტიურად აგრძელებენ ცოფის წინააღმდეგ ცხოველების აცრებს. ამ პროცესში ჩართულები არიან ცხოველთა მიმკედლებლები, რომლებიც ადგილზე გვეხმარებიან და თავის შეკედლებულ ცხოველებს გვახვედრებენ, რაც საქმეს გვიმარტივებს. ჩვენს მუნიციპალურ თავშესაფარში ყოველდღიურად შემოდიან ცხოველები, რომელთაც ადგილზეც უკეთდებათ ცოფის ვაქცინა. ასევე, ყოველდღიურად ჩვენი ჯგუფი გადაადგილდება ქალაქის სხვადასხვა ლოკაციაზე და ადგილზე ატარებენ აცრებს“, - განაცხადა გიორგი კობიაშვილმა.
მისი თქმით, მიუსაფარი ცხოველის აცრა უფასოა და ნებისმიერ ადამიანს შეუძლია ცხოველთა მონიტორინგის სააგენტოს მიმართოს.
"ალბათ, ქუჩაში გინახავთ ცხოველი, რომელსაც ყურზე სპეციალური საჭდი უკეთიათ. ეს იმას ნიშნავს, რომ ცხოველი ერთხელ მაინც არის აცრილი ცოფზე“, - განაცხადა გიორგი კობიაშვილმა.
- ცოფი ვირუსული ზოონოზური ინფექციური დაავადებაა, რომლის დროს ზიანდება თავისა და ზურგის ტვინი. ამ ვირუსით შეიძლება დაავადდეს ყველა თბილსისხლიანი ცხოველი (ძაღლი, კატა, მსხვილფეხა და წვრილფეხა პირუტყვი, ცხენი, ღორი, ვირი, მელა, ტურა, მგელი და სხვა). ცოფით ინფიცირების რისკის ქვეშ მყოფი ცხოველის მიერ კბენის, გაკაწრის ან რაიმე სახის კონტაქტის შემთხვევაში აუცილებელია დაუყოვნებლივ მიმართოთ კლინიკას. ცოფის პრევენცია შესაძლებელია დროული ვაქცინაციით. ცოფის სიმპტომების გამოვლენის შემდეგ დაავადება 100% შემთხვევაში იწვევს სიკვდილს.
იხილეთ ასევე: