"მე ვარ თქვენი მისის რუსეთი. ჩემი ქვეყანა ჩემი ძალაა... რაც შეეხება სიძულვილს, არ მაინტერესებს, შეგიძლიათ გძულდეთ" - ნატალია ოსკარი უარყოფს, რომ პლასტიკური ოპერაციები აქვს გაკეთებული
გუშინ სილამაზის კონკურსის "მისის რუსეთი - 2023“-ის დაჯილდოების ცერემონია გაიმართა. გამარჯვებულის ნანატრი გვირგვინი შორეული აღმოსავლეთის წარმომადგენელმა ნატალია ოსკარმა მიიღო.
სოციალურ ქსელში ფოტოების გავრცელების შემდეგ, ქალი უამრავმა ადამიანმა გააკრიტიკა. ისინი წერდნენ, რომ დაუშვებელია ქალს ამდენი პლასტიკური ოპერაცია ჰქონდეს გაკეთებული და ის სილამაზის კონკურსში იმარჯვებდეს. დამცინავი კომენტარების შემდეგ, ნატალია ოსკარმა რუსულ მედიაში მის შესახებ გამოთქმულ ნეგატიურ შეფასებებზე ისაუბრა და აღნიშნა, რომ მას ეს არ ანაღვლებს.
- "რაც შეეხება სიძულვილს, არ მაინტერესებს, ეს მათი აზრია. მათ აქვთ ამის უფლება. ვფიქრობ, საჭირო არ არის დროის დაკარგვა იმის წაკითხვაზე, თუ რამდენი ადამიანია ჩემი გამარჯვებით უკმაყოფილო. მე ჩემი გზით მივდივარ. ვიცი, რომ კონკურსისთვის პასუხისმგებლობით მოვემზადე და გამარჯვებისთვის დიდი ძალისხმევა დავხარჯე.
დღეში ორი საათი გვეძინა. ბევრი მონაწილე დაიღალა, მაგრამ მე მათ ვამხნევებდი: "გოგოებო, ამხელა გზა გავიარეთ. არ გაბედოთ დანებება! ბოლომდე უნდა მიხვიდეთ“. გუშინ მადლობა გადამიხადეს, ამბობენ, რომ მე მათ მოტივაცია მივეცი. ჩვენ ყველა ძალიან მადლობელი ვართ კონკურსის, რადგან ეს არის დიდი ტრანსფორმაცია, მუშაობა საკუთარ თავზე, გამძლეობაზე. რა თქმა უნდა, რთულია მთელი დღე მაღალქუსლიანი ფეხსაცმლით სიარული, რამდენიმე საათი ძილი და დილიდან შუაღამემდე რეპეტიციებზე დგომა... კარგით, ბოდიში, შეგიძლიათ გძულდეთ. ეცადეთ თავად გაიაროთ ეს გზა!”
გვირგვინის მფლობელი ასევე გულგრილია ბრალდებების მიმართ, რომ თითქოს მისი გარეგნობა პლასტიკური ოპერაციების შედეგია. ქალი ირწმუნება, რომ მოხდენილი ფიგურა და ლამაზი სახე თვითდისციპლინის შედეგია.
- "კვირაში ორ-სამჯერ ტრენერთან ერთად სპორტით ვარ დაკავებული. ვიცავ დიეტას, ტკბილეულს არ ვჭამ. ეს მეხმარება ლამაზად გამოვიყურებოდე, წარმოუდგენელი რაოდენობის კოსმეტიკური პროცედურებისა და ოპერაციების გარეშე. ჩემთვის ეს ყველაფერი ნორმალურია. მაქვს ბუნებრივი სილამაზე. ჯანსაღ სხეულში ჯანსაღი სულია“ - ამბობს გამარჯვებული.
ნატალიამ ნანატრ გამარჯვებამდე გრძელი გზა გაიარა. ჯერ კიდევ 2019 წელს მან მიიღო მონაწილეობა შორეული აღმოსავლეთის დედოფლის კონკურსში, სადაც მხოლოდ მოდის დედოფლის ნომინაციაში გაიმარჯვა. გარდა ამისა, ცდილობს, რომ მუსიკალური კარიერა აიწყოს.
"მე ვარ თქვენი მისის რუსეთი. ჩემი ქვეყანა ჩემი ძალაა“ - შარშან ამ შინაარსის სიმღერა ჩავწერე და ყველა მუსიკალურ პლატფორმაზე გავავრცელე. ჩემი სიმღერა პირველივე დღიდან შეუყვარდა ყველა კონკურსანტს. ცრემლებით მეკითხებოდნენ "ნატაშა, ეს შენ დაწერე? სიმღერა იმდენად მოტივირებულია, სულს წვდება. ჩემთვის ეს იყო ყველაზე მნიშვნელოვანი გამარჯვება. მითუმეტეს, როცა გამოაცხადეს, რომ ამ სიმღერით გავხსნიდით ფინალს“, – თქვა მან.
ნატალიას წინ საერთაშორისო კონკურსი "მის სამყარო“ ელოდება. ის საკმაოდ თავდაჯერებულად გრძნობს თავს, რადგან თავისუფლად საუბრობს უცხო ენაზე.
"ჩემს მოვალეობად მიმაჩნია, რომ ყველაფერი გავაკეთო, რომ ჩემს ქვეყანას გამარჯვება მოვუტანო. ინგლისურის მასწავლებელი ვარ. ნებისმიერ შემთხვევაში, ადეკვატურად წარმოვადგენ ჩემს ქვეყანას. უკვე დავიწყე სიმღერის წერა ინგლისურ ენაზე...“ - "მისის რუსეთი".