"მაცოცხლებელი წყალი, ჩვენი ლეგენდა" – "ბორჯომის" ლეგენდას, ქართველი მსახიობი, თინა დალაქიშვილი მსოფლიო კინოს ვარსკვლავს - ვინსენტ პერესს უზიარებს

11:08 / 13-06-2023

,,მაცოცხლებელი წყალი, ჩვენი ლეგენდა“ - ეს ქართული მინერალური წყალი „ბორჯომის“ ახალი კამპანიის მთავარი გზავნილია, რომელიც მთელ მსოფლიოს მინერალური წყლის აღმოჩენის ლეგენდას, ქართულ კულტურასა და წყლის უნიკალურ, გამაჯანსაღებელ თვისებებს აცნობს. მაყურებელს კი, საქართველოს გარშემო, დროში და ჯადოსნურ სამყაროში ამოგზაურებს.

ბრენდმა ახალი საკომუნიკაციო კამპანია დაიწყო, რომელშიც ასახულია სამი ეპოქა - მითური, რომელიც „ბორჯომის“ აღმოჩენის ლეგენდას გვიამბობს, 1890-იანი წლები, როდესაც „ბორჯომის“ საწარმოო წესით ჩამოსხმა დაიწყო და თანამედროვე ეპოქა. სამივე პერიოდი „ბორჯომის“ მაცოცხლებელ ძალასა და პირველი ქართული მინერალური წყლის მრავალწლიან ისტორიაზე გვიყვება, რომელიც დღეს უკვე ეროვნული მემკვიდრეობის განუყოფელი ნაწილია.

ვიდეორგოლი გვიამბობს ლეგენდას მონადირეზე, რომელმაც „ბორჯომის“ იუვენილური წყალი აღმოაჩინა, იხილა თუ როგორ განკურნა წყალმა დაჭრილი ირემი და ეს ამბავი თაობებს გაუზიარა. სწორედ ამ ლეგენდას, ქართველი მსახიობი, თინა დალაქიშვილი მსოფლიო კინოს ვარსკვლავს - ვინსენტ პერესს უამბობს.

შვეიცარიაში დაბადებული ფრანგი მსახიობი, ბრენდის ახალ საკომუნიკაციო კამპანიას „ბორჯომის“, როგორც ჩვენი ქვეყნის სავიზიტო ბარათის და სიამაყის მთელი მსოფლიოსთვის გასაცნობად შემოუერთდა. ამრიგად, ვინსენტ პერესი „ბორჯომის“ ახალი სარეკლამო რგოლის მთავარი გმირია!

ფრანგ მსახიობს, რომელიც ლოზანაშია დაბადებული, 80-მდე როლი აქვს შესრულებული. თამაშობს ფრანგულ, ესპანურ, იტალიურ, გერმანულ ენებზე... მან ფილმში „სირანო დე ბერჟერაკი“ ჟერარ დეპარდიესთან ერთად საინტერესო სახე შექმნა.

აქტიური კინოკარიერა 90-იანი წლებიდან დაიწყო. 1993 წელს, ვინსენტ პერესი მაყურებელმა სოფი მარსოსთან ერთად იხილა ფილმში „ფან-ფანი“. მისმა რომანტიკულმა პერსონაჟმა არაერთი ქალის გული დაიპყრო... ვინსენტ პერესმა 1996 წელს „ანგელოზების ქალაქში“ ითამაშა, 2003 წელს კი - „ფან-ფან ტიტაში,“ როდესაც ძველი ფილმის ახალი ვერსია გადაიღეს. მას პარტნიორობას მშვენიერი პენელოპე კრუსი უწევდა. ფილმიც და მისი პერსონაჟიც მაყურებელმა ძალიან შეიყვარა...

ვინსენტ პერესის როლებზე კიდევ შეიძლება საუბარი, მაგრამ ახლა მის იმ როლზე შევჩერდებით, რომელიც მან ქართული ლეგენდის - „ბორჯომის“ ახალ საკომუნიკაციო ვიდეოში ითამაშა. ამისთვის საქართველოს მცირე ხნით, თუმცა სიამოვნებით ესტუმრა. როგორც თავად ამბობს, ამ სტუმრობისას ჩვენს ქვეყანაში უამრავი რამ აღმოაჩინა. უხარია, რომ საქართველოში თბილი ხალხი გაიცნო და დააგემოვნა მაცოცხლებელი წყალი - „ბორჯომი,“ რომელიც ძალიან მოეწონა.

ვინსენტ პერესი, მსახიობი:

„ეს თანამშრომლობა საუკეთესო საშუალება იყო, დავკავშირებოდი საქართველოს, მის კულტურას, ისტორიას და ამ ქვეყანაში ჩემს მეგობრებს. გამოგიტყდებით, საქართველოში ჩამოსვლაზე დიდი ხნის განმავლობაში ვოცნებობდი. ქართველ ხალხს ძლიერი ავთენტურობა აქვს, ძალიან თბილები, მიმღებლები და გულუხვები არიან. მიხარია, რომ აღმოვაჩინე ეს ქვეყანა მისი ხალხით, ხელოვნებით და ულამაზესი პეიზაჟებით. ბედნიერი ვარ, რომ აქ ჩამოსვლა განაპირობა, მინერალური წყალი „ბორჯომის“ ახალმა სარეკლამო კამპანიამ, რომლის ერთ-ერთი მონაწილე მეც ვარ. ეს არის პირველი შემთხვევა, როცა ჩავერთე სარეკლამო რგოლის გადაღებაში, რაც ჩემთვის ძალიან საინტერესო გამოცდილებაა. საინტერესო და შთამბეჭდავი დასანახია, თუ როგორ შეუძლია მინერალურ წყალს, ბუნების საჩუქარს, მიჰყვეს ქვეყნის ისტორიას და მის განუყოფელ ნაწილად იქცეს. იმედია, მაყურებელიც ისევე ისიამოვნებს ამ სარეკლამო რგოლით, როგორც მე ვისიამოვნე ამ თანამშრომლობით.“

ვახტანგ ანთაძე, „ბორჯომის“ გლობალური ბრენდ დირექტორი:

„საქართველო, ევროპა და ცენტრალური აზია კვლავ რჩება „ბორჯომის“ მთავარ სტრატეგიულ ბაზრებად, შესაბამისად, ბრენდს სჭირდებოდა ახალი საკომუნიკაციო კამპანია, რომელიც გააძლიერებს მის პოზიციებს და ამავდროულად, ახალ ბაზრებზე შესვლის შესაძლებლობას მოგვცემს. ქართველებს გვიყვარს და გვეამაყება იმაზე საუბარი, რაც ქართულ იდენტობას გამოხატავს. „ბორჯომს“, როგორც მაცოცხლებელ წყალს და თავად ლეგენდას, ჩვენი ქვეყნის საერთაშორისო მასშტაბით წარდგენისას, ასეთი გადამწყვეტი როლი ხშირად აქვს. შესაბამისად, მჯერა, რომ ვინსენტ პერესთან და სხვა ცნობილ ადამიანებთან თანამშრომლობა მნიშვნელოვანია არა მხოლოდ „ბორჯომისთვის“, არამედ მთელი საქართველოსთვის. ამ ფორმით ჩვენ ქართულ კულტურას მთელ მსოფლიოს ვაცნობთ.“

სარეკლამო რგოლსა და საკომუნიკაციო კამპანიაზე ქართული კრეატიული სააგენტო „ლივინგსტონი” მუშაობდა.

ლევან ლეფსვერიძე, სარეკლამო სააგენტო „ლივინგსტონის“ თანადამფუძნებელი და შემოქმედებითი ხელმძღვანელი:

„ბორჯომი ჩვენთვის ძალიან სიმბოლური ბრენდია, რადგან წლების წინ, „ლივინგსტონმა“ პირველი ჯილდო სწორედ „ბორჯომის“ ბრიფით მოვიგეთ. გარდა ამისა, ის ერთადერთი ქართული ბრენდია, რომელიც საუკუნეებია ქვეყნის სავიზიტო ბარათის სტატუსს ინარჩუნებს. სწორედ ამიტომ, კამპანიაშიც ვცადეთ, რომ „ბორჯომი,“ როგორც ეროვნული სიამაყე ყველაზე ავთენტური, ქართული გზით გვეჩვენებინა“.

ვიდეო რგოლში ჩვენი გამორჩეული მრავალხმიანობის „წინწყაროს“ გათანამედროვებული ვერსიის ფონზე, ქართული ნაციონალური ბალეტი „სუხიშვილების“ მოცეკვავეები, ეროვნული ქორეოგრაფიული საგანძურის რამდენიმე ცეკვას ასრულებენ, რომელიც სპეციალურად „ბორჯომის“ სარეკლამო რგოლისთვის „სამაიას,“ მონადირეებისა და სხვა ცეკვების ინსპირაციით შეიქმნა. მუსიკის ეს ვერსია სპეციალურად ამ კამპანიისთვის სტუდია „პოსტრედმა“ დაწერა.

გადაღებები ბორჯომის ხეობის გარდა, სვანეთში, ყაზბეგში, კახეთში, მცხეთასა და თბილისში მიმდინარეობდა. ქართული მინერალური წყლის ისტორიული მნიშვნელობის და ჩვენი ქვეყნის მემკვიდრეობის უკეთ გასაცნობად, სარეკლამო რგოლი საქართველოს გარდა, ევროპისა და ცენტრალურ აზიის ქვეყნებში გავა.

ტეგები თემაზე:

ბორჯომი

"ბორჯომი"