ბუნტი ჰონდურასის ქალთა ციხეში - დაჯგუფებებს შორის შეტაკებისას, სულ მცირე 41 პატიმარი დაიღუპა
ჰონდურასის ქალთა ციხეში ბანდებს შორის დაპირისპირებას სულ მცირე 41 პატიმრის სიცოცხლე შეეწირა. ტამარას ციხეში სამართალდამცავებმა ათობით ცხედარი იპოვეს. ზოგიერთი მსხვერპლი ცეცხლსასროლი იარაღით იყო მოკლული, ზოგი კი - დამწვარი. ამ დროისთვის, სულ მცირე შვიდი ქალი ტეგუსიგალპას საავადმყოფოში, ცეცხლსასროლი იარაღით და დანით მიყენებული ჭრილობების გამო მკურნალობს.
ქვეყნის პრეზიდენტმა ქსიომარა კასტრომ განაცხადა, რომ ის შოკირებულია ქალების "მხეცური მკვლელობებით" და ამაში ქუჩის გავლენიანი ბანდები დაადანაშაულა. მან გარდაცვლილთა ოჯახებს სოლიდარობა გამოუცხადა და "ტვიტერზე" დაწერა, რომ მთავრობა რადიკალურ ზომებს მიიღებს.
პატიმართა ოჯახების ასოციაციის პრეზიდენტმა, დელმა ორდონეზმა Reuters-ს განუცხადა, რომ ციხეში დაპირისპირება ორ მეტოქე დაჯგუფებას შორის მოხდა, Barrio 18-ს და Mara Salvatrucha-ს (MS-13) წევრებს შორის.
პატიმართა ახლობლები ციხის გარეთ შეიკრიბნენ, რათა მომხდარში გარკვეულიყვნენ.
"ვცდილობ გავიგო, რა შეემთხვა ჩემს ქალიშვილს, მაგრამ ჯერაც არ გვაძლევენ ინფორმაციას", - აცხადებს ერთ-ერთი პატიმრის დედა.
ჯულისა ვილანუევამ, ქვეყნის სასჯელაღსრულების სისტემის ხელმძღვანელმა კი პრესასთან საუბარში აღნიშნა, რომ მათი ვარაუდით, პატიმრებს შორის არეულობა ხელისუფლების მიერ ციხეებში უკანონო ქმედებების და ორგანიზებული დანაშაულის წინააღმდეგ გატარებულმა რეფორმებმა გამოიწვია.
"ჩვენ უკან არ დავიხევთ", - თქვა ვილანუევამ ბუნტის შემდეგ. დაჯგუფებები ქვეყნის ციხეებში ხშირად ახორციელებენ კონტროლს, სადაც პატიმრები საკუთარ წესებს ადგენენ და აკრძალულ საქონელს ყიდიან.
წყარო: theguardian
მოამზადა: ანა სიბოშვილმა